Pein Nei Pwuken Mormon

Nan Oahkos 2005, ni ansou me President Gordon B. Hinckley (1910–2008) poahngoangkihieng towe kan en Mwomwohdiso en wadek Pwuken Mormon mwohn imwin pahro, I pein inoukihiengie me I pahn wadek pwuhko ni unsek. I ese audepen soai kan nan Pwuken Mormon ahpw I saikinte pak ehu wadekala pwuhko ni unsek. Met I koasoanehdi ien kolokol ahi inouo.

I alehdi padahk en karasahieng pwuhk sarawi kan ong ahi mour oh wiahda ren wia pein ahi. Eri ni ei wadek, I ntingihdi ni keilen teho dah me I medewe wia oaralap en ireo. I pil kalipwih pahn lepin lokaia kan oh ire kan me kin kopwkopwurpwurieng pwehn kasalehda dah me kesempwal.

Mwuri I kihdi edei limwahn ahd akan nan pwuhk sarawi kan pwehn seweseie taman me mahsen en Koht ong mehteikan pil kak wia mahsen ong ie. Ni karasaras, nan 2 Nephi 2:28 I ntingihdi edei: “Oh met, [Hillary], I men ken sohpeilahng Sountomw lapalapo, oh rong sapwellime kosonned akan.” Ni ei wiahkihla me Pwuken Mormon doke pein ngehi, I kin ahpwete perenikihda ei kin wadewadek rahn koaros.

Ni ei kin wadek rahn koaros, mohngiongi audehla ahi kapakap kan oh wiahla pein ahi mehlel. I pil kin kak rongorong mwahu nan ahi pwihn en kasukuhl kan oh idawehn kemwekid kapehm kan en Ngehno en pirienohng mehteikan. Ni keimwseklahn nihpwong en pahro, I kanekehla Pwuken Mormon.

Ngehi eri wehwehki kesempwalpen wadek Pwuken Mormon ni unsek, iangahki pwuhk sarawi teikan, oh men pil wadek pak tohto nan ahi mour.