Iren Mahsen en Padahk en Pas, Septempe 2010

Atail Pwukoa en Apwaliada Dih Me Kohkohda

Onopiki dipwisou pwukat oh, ni eh pahn konehng, koasoaiahieng lih akan me komw kin pwarek. Doadoahngki peidek kan pwehn sewese kakehlailih lih akan oh wiahda Pwihn en Sawas en Lih en wia mehlel kisehn pein ahmw mour.

Kilel

Relief Society seal

Pwoson • Peneinei • Sawas

Sang Pwuhk Sarawi Kan

Lepin Padahk Audapan Kan 22:6; Episos 6:4; Enos 1:1; Alma 53:20–21; 56:47; 57:27

Ma sohte epwel mwahu, neitail dih me kohkohda kak en mihmi nan keperpen wiahla duwehte dih me kawehwehpe mie nan Mosiah 26. Me pwulopwul tohto sohte kamehlele tiahk kan en arail pahpa kan oh wiahla aramas tohrohr ong me pid arail pwoson, ihte duwe met kohkohlahte mwurin mwo. Neitail dih me kohkohda kak pil salongasang kitail duwe met ma re sohte pahn wehwehki arail pali nan sapwellimen Sahm Nanleng pilahn.

Eri dah me pahn kolokol dih me kohkohda en silasildi? Nan Mwomwohdiso kitail kin padahngki tepin padahk kan en komour, oh tepin padahk pwuko iei tepin padahk me pid peneinei, tepin padahk kan me pahn sewese dih me kohkohda en wiahda peneinei, padahkih peneineio, oh kaunopada peneineio ong tiahk kan oh inou kan —oh eri dih me kohkohda pahn padahkihieng dih en mwuhro doudoula.

Ni atail wia pahpa nohno, kaun kan, oh towe kan en Mwomwohdiso, kitail kaukaunop dih wet ong kapai kan en Eipraam, ong tehnpas sarawi. Kitail ahniki pwukoa en sansal mehlel ong me pid ire kesempwal akan en rongamwahuo me dierek nan kalohk me pid peneinei. Wia nohno oh pahpa wia irair oh pwukoa poatoapoat. Emenemen kitail ahniki pwukoa en wia pali en ohl de lih nan pilahno.

Kitail kak kihda padahk wet nan sohte lipilipil wasa. Kitail uhdahn anahne mahsen ni waun duwen me pid pwopwoud oh peneinei. Oh sang ni atail karasaras, dih me kohkohda kak alehdi koapwoaroapwoar laud oh wehwe —kaidehnte sang lepin lokaia kan me kitail kin nda ahpw sang ni duwen atail kin pehm oh kihla ngehn de soaren peneinei.

Julie B. Beck, president lap en Pwihn en Sawas en Lih.

Sang Atail Poadoapoad

Nan sapwellime mahsen ong lih akan ni mihting lap en Pwihn en Sawas en Lih ni Septempe 23, 1995, President Gordon B. Hinckley mahsanih: “Sampah me kitail mihmi loale iei sampah ehu en pingiping, oh wekiwekideklahn ire kesempwal akan. Ngihl en wie weriwerki soahng ehu de ehu tohrohr ni eh uhweng koasoandi en tiahk mwahu me sansaldahr nan ansou kan kohkohdo.”¹ President Hinckley eri doula kapehsehieng lih akan, Mwomwohdiso, oh eri aramas wasa koaros “Peneinei: Kalohk Ehu Ong Sampah.”

Nan pahr akan doudoudo mwuri iren kokohp wet kawehwehdier ong lokaia tohto oh nehnehieng kaun kan en sampah. E peki rehn towe kan en wehi oh kaun kan en kopworment “en utung irair pwuko me koasoandi en kolokol oh kakehlailih peneinei nin duwen eh wia pwihn poahsoan en wehi.”²

Kalohk wet wialahr poahsoan en lamalam en Souleng en Imwin Rahn Akan me pid peneinei, ire ehu me kitail kak koledi teng oh ese me sang ni momourki padahngkan loale, kitail wie kangkakehlailih atail peneinei kan oh imwatail kan.

© 2010 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/09. Kamanaman ong kawehwe: 6/09. Kawehwehpen Visiting Teaching Message, September 2010. Pohnpeian. 09369 885

Dahme Me I Kak Wia?

Ia duwen ei kak sewese riei lih akan doadoahngki “Peneinei: Kalohk Ehu Ong Sampah” pwehn apwalih dih me kohkohda? Komw kak medewe ehukihda ehu koapi en kalohko oh sewese lih akan kasawiada oh kalipwiala ire pwuko me pahn keieu padahkih mwahu padahk kesempwal kan.
Ia duwen ahi kak apwalih dih me kohkohda? Komw kak medewe komwi en tehkada towe kan en ahmw ward, prans, peneinei, de kousapw me kak paieki ahmw nsenoh oh limpoak.