Faaineine no te mau Haamaitairaa o te Hiero

Ua papa‘ihia i ni‘a i te mau hiero atoa teie mau parau « Haamo‘ahia i te Fatu ».¹ Te faaite ra taua mau parau ra e, e mea mo‘a te hiero e ta’na mau opuaraa. Te feia atoa e tomo i roto i te hiero no ratou atoa ïa taua parau ra no te mo‘araa.² Ua faaineinehia te mau hiero no te taata, no reira, ua titauhia ia faaineine te taata ia ratou iho no te hiero.

E mea taa‘e te hiero i te tahi atu mau fare haamoriraa. E ere mai te mau fare pureraa, te hiero e opani oia i te Sabati ia ti‘a ho‘i i te taata ia haere i te pureraa e to ratou mau utuafare i taua mahana haamo‘araa ra. E matara te mau hiero no te rave i te ohipa mo‘a i te tahi atu mau mahana o te hepetoma. Te hiero e fare mau ïa no te Fatu, faataahia no te mau oro‘a mure ore. Taua mau oro‘a ra, o te bapetizoraa ïa, te faaipoiporaa, te mau oro‘a hiero, e te mau taatiraa.

Ua riro te hiero tata‘itahi ei tapa‘o no to tatou faaroo i te Atua e ei faaiteraa no to tatou ti‘aturi i roto i te oraraa i muri a‘e i te pohe. Ua riro te hiero ei tumu no te mau ohipa atoa, te mau haapiiraa atoa, te mau taahiraa atoa o te haereraa i mua i roto i te Ekalesia nei. Ta tatou mau tautooraa atoa i roto i te pororaa i te evanelia, te haamaitairaa i te Feia Mo‘a, e te faaoraraa i tei pohe, e arata‘i ti‘a te reira i te hiero mo‘a. E mea faufaa rahi mau te mau oro‘a o te hiero. E ore e ti‘a ia tatou ia ho‘i i roto i te hanahana o te Atua ma te ore te reira mau oro‘a.

I roto i te hiero e farii tatou i te hoê oro‘a hiero, oia ho‘i, ia au i to’na ra i‘oa, te hoê horo‘a. E mea ti‘a ia tatou ia haroaroa i te auraa pae varua o te reira e i te faufaa no te haapa‘oraa i te mau fafauraa e te mau titauraa mo‘a ta tatou i rave a farii ai tatou i teie horo‘a. « E ere te oro‘a hiero i te hoê noa peu e rave, e fafauraa hanahana râ ».³

Ua horo‘ahia mai te oro‘a hiero na roto i te heheuraa. No reira, e haroaroa-maitai-hia te reira na roto i te heheuraa, te imi-maite-raa na roto i te aau mâ. Ua haapii mai te Peresideni Brigham Young e « to outou oro‘a, o te fariiraa ïa i te mau oro‘a atoa i roto i te fare o te Fatu, tei riro ei ohipa faufaa roa no outou, i muri a‘e i to outou faaru‘eraa mai i teie oraraa, ia ti‘a ia outou ia ho‘i i mua i te aro o te Metua, ma te haere na mua i te mau melahi tia‘i, … e ia roaa to outou faateiteiraa ».⁴

Te faaohipahia nei te mana taati o te autahu‘araa i roto i te hiero tata‘itahi. Ua haamaramarama mai te Peresideni Gordon B. Hinckley e « aita e arii, aita e peresideni no te hoê fenua, aita e ti‘a mana no te hoê pŭpŭ i roto i te ao nei ta tatou i apiti atu, e mau nei i te mana no te mau mea i ô mai i te menema. Aita hoê a‘e ta te taata nei e rave‘a i mua i te haru a te pohe, area te tahu‘a rahi maitai, parau ti‘a, haehaa roa a‘e tei mau i te mana taati, e nehenehe ïa ta’na e haamau i ni‘a i te ra‘i i te mea tei haamauhia i te fenua nei ».⁵

Mai te huru mure ore o te autahu‘araa – aita e haamataraa e aore râ aita e hopearaa – oia atoa ïa te mana o te reira autahu‘araa.⁶ No reira, te mau oro‘a e te mau fafauraa o te autahu‘araa, e mea mure ore atoa te reira. Te heheuraa matamua i horo‘ahia mai e te melahi Moroni i te Peropheta Iosepha Semita ra, no ni‘a ïa i teie mana autahu‘araa.⁷ I roto i te mau arata‘iraa i horo‘ahia i te Peropheta i muri a‘e ra no ni‘a i te hiero, ua parau te Fatu e:

« Ia haamaitaihia teie nei fare i to‘u nei i‘oa, ia ti‘a ia‘u ia heheu atu i ta‘u mau oro‘a i roto i te reira i ta‘u mau taata;

« No te mea te opua nei au i te heheu atu i to ta‘u ekalesia nei i te mau mea o tei vai-huna-noa-hia mai mua’tu i te faatumuraa o te ao nei, te mau mea ho‘i no ni‘a i te tau tuuraa no te îraa i te mau tau atoa ».⁸

Te ora nei tatou i roto i te reira tau tuuraa. Ua faaho‘i-faahou-hia mai te mau hiero, te mau oro‘a, te mau fafauraa, te mau oro‘a hiero, e te mau taatiraa, mai tei tohuhia ra. Na te mau oro‘a o te hiero e horo‘a mai i te faatupuraa hau i te Fatu e ia taati amui i te utuafare e amuri noa’tu. Na te haapa‘oraa i te mau fafauraa mo‘a i ravehia i roto i te hiero e horo‘a mai ia tatou i te ora mure ore – te horo‘a rahi a‘e a te Atua i te taata nei.⁹

No te mo‘a o te hiero, te ani nei te Fatu ia paruruhia te reira eiaha ia haaviiviihia. Te mau taata atoa tei faaineine ma te hinaaro mau e farii ïa i te reira haamaitairaa. E faufaa rahi to te parau o te faaineineraa i roto i te tahi atu mau tautooraa. Te haamana‘o nei au i to‘u tau tamarii-rii-raa, ua parau vau i to‘u na metua e, e hinaaro vau e haere i te haapiiraa tuatoru. Ua parau mai raua e, e nehenehe ta‘u e na reira, tera râ, hoê noa iho rave‘a maori râ, ia haapa‘o maitai au i te mau tuhaa haapiiraa i raro mai e ia manuïa vau i roto i te mau titauraa atoa no te faaô i roto i te haapiiraa tuatoru. Mai te reira atoa tatou, e mea ti‘a ia tatou ia manuïa i roto i te mau titauraa no te faaoraa i roto i te hiero. E faaineine tatou ia tatou i te pae tino, i te pae o te feruriraa e i te pae varua. Ei ti‘araa to te taata tata‘itahi e titau ra i te hoê parau faati‘a no te hiero.

Na te feia e mau ra i te mau taviri no te mana e te hopoi‘a o te autahu‘araa e tauturu ia faaineine ia tatou na roto i te faatereraa i te mau uiuiraa no te parau faati‘a no te hiero. E haapa‘o teie mau ti‘a faatere ia tatou e e tauturu ho‘i ia tatou i te faataaraa e, ua ineine anei tatou no te haere i te hiero. Ua here atoa ratou i te Fatu e na ratou e haapapû e « eiaha te hoê mea viivii ia tomo i roto i (To’na) ra fare ».¹⁰ No reira, e faaterehia teie mau uiuiraa i roto i te varua o te tiaauraa.

Nahea outou i te faaineine ia outou no te hoê parau faati‘a no te hiero ? E ti‘a ia outou ia farerei i to outou episekopo, e tae noa’tu i to outou na metua, te utuafare, te peresideniraa tĭtĭ te orometua, e aore râ, te tauturu haamaramarama o te pŭpŭ. E mea ohie roa te mau titauraa. Ei haapotoraa noa, ua titauhia i te hoê taata ia haapa‘o i te mau faaueraa a te Taata No’na te fare. Na’na i haamau i te mau ture. E tomo tatou i roto i te hiero ei mau manihini.

E mauruuru te Fatu mai te mea e, e mea ti‘amâ te melo paari tata‘itahi no te farii i te hoê parau faati‘a no te hiero. « Ua riro te mau uiuiraa … no te parau faati‘a no te hiero, na roto i (te mau melo o to outou episekoporaa) e te mau melo o to outou peresideniraa tĭtĭ ei mau iteraa faufaa rahi roa. E nehenehe outou e ‘faanehenehe maitai’ ia outou no taua farereiraa rahi ra a ti‘a ai outou i mua i te Haava Rahi ».¹¹

I teie nei, ma te parau faati‘a no te hiero i roto i te rima, ua ineine outou no te tahi atu mau faaineineraa. E faaineine outou ia outou i te pae tino na roto i te ahuraa i te ahu tano no te haere i te hiero. E ere teie i te hoê vahi no te ahu i te mau ahu mahana. Ua faaite mai te mau peropheta no te mau mahana hopea nei i te faufaa no te faaturaraa i to tatou tino. Ia haapa‘ohia taua faaturaraa ra e ti‘a ai, no te feia iho â râ e tomo atu i roto i te hiero mo‘a.¹²

I roto i te hiero, ua ahuhia te mau taata atoa i te ahu uouo mâ maitai. « Ua riro atoa te tapa‘o no te viivii-ore o te uouo ei faahaamana‘oraa ia tatou e, ei nunaa viivii-ore to te Atua ».¹³ Te matahiti, te ti‘araa nunaa, te reo – te ti‘araa i roto i te Ekalesia – e faufaaraa iti to te reira. Ua haere au i roto i te mau oro‘a e rave rahi e te reira atoa te Peresideni o te Ekalesia. Ua aifaito te aupururaa i te mau taata atoa i roto i te reira piha i te aupururaa i haapa‘ohia no te Peresideni. Ua parahi te mau taata atoa te tahi i piha‘i iho i te tahi, e ua aifaito ratou paatoa i mua i te mata o te Fatu. Na roto i te ahuraa ti‘amâ, ua riro te haereraa i te hiero ei faahaamana‘oraa ia tatou e « aita te Atua e ma‘iti i te huru o te taata ».¹⁴

E tomo te tane e te vahine i roto i te hiero no te faaipoipo ia raua no te tau e amuri noa’tu. I roto i te hiero e oomo te tane faaipoipo i te ahu uouo, rima roa, te au maite te faito e te hoho‘a, e ma te faaunauna ore. Aita te tane e oomo i te pereue e aore râ, te ahu i au i te hiro‘a tumu. Ua papa‘i te Peresideni Boyd K. Packer, Peresideni no te Pŭpŭ Tino Ahuru Ma Piti Aposetolo i teie nei e: « E mea au ïa i te Fatu ia hopu tatou i to tatou tino i te pape e ia oomo i te ahu mâ, eiaha râ i te mau ahu moni rarahi. E faanehenehe tatou ia tatou mai te huru e, te haere ra tatou i te pureraa oro‘a e aore râ i te hoê putuputuraa au maitai e te tura ».¹⁵

No ni‘a i te mau ahu o te hiero, e nehenehe ta te mau metua vahine e te mau mama ruau e faaite i te hoê hi‘oraa maitai i ni‘a i ta ratou mau tamarii e te mau mootua. Ia au i to ratou aravihi e ta ratou mau rave‘a, e nehenehe ta ratou e faatupu i te hoê faaitoitoraa papû i ni‘a i to ratou utuafare. E riro te tao‘a horo‘a o te hoê horoi hamani-rima-hia na te hoê metua vahine e aore râ te tahi atu tuhaa o te ahu hiero ei faaitoitoraa puai i te tamarii e aore râ i te mootua ia poihere maite i te reira.

Ua riro te oomoraa i te ahu hiero ei tapa‘o faufaa rahi, e ei faaiteraa tamau no te fafauraa. Mai te Faaora i faaite mai ia tatou i te hoê hi‘oraa o To’na ti‘araa ia rohi tamau e tae noa’tu i te hopea, ua riro te oomoraa i te ahu hiero ei rave‘a faaiteraa i to tatou faaroo tamau Ia’na e i Ta’na mau fafauraa mure ore ia tatou.

Ua faaineine te Peresideniraa Matamua i te hoê rata i to te Ekalesia no ni‘a i teie tumu parau. Teie ta ratou i papa‘i:

« Na te mau peu i ite-pinepine-hia i rotopu i te mau melo o te Ekalesia i faaite mai e, te vai ra te tahi mau melo aita ratou i maramarama hope roa i te fafauraa ta ratou i rave i roto i te hiero ia oomo i te ahu hiero mai te au i te varua o te oro‘a mo‘a.

« Te mau melo o te Ekalesia tei faaahuhia i te ahu hiero i roto i te hiero, ua fafau ïa ratou ia oomo i te reira i roto i to ratou oraraa taatoa. Te auraa maori râ, e oomohia te reira ei mau ahu roto i te ao e te pô. … Te fafauraa o te parururaa e o te mau haamaitairaa, ua niuhia ïa i ni‘a i te ti‘amâraa e te itoito i te haapa‘oraa i te reira fafauraa.

« Te ture tumu o te oomoraa ïa i te ahu hiero e eiaha e imi i te mau rave‘a e iriti ai i te reira. No reira, eiaha te mau melo e iriti i te hoê tuhaa e aore râ te taatoaraa o te ahu hiero no te rave i te ohipa i roto i te aua e aore râ ia ori haere noa na te fare i roto i te ahu hopuraa miti e aore râ te ahu tano ore. Eiaha atoa ratou e iriti i te reira no te rave i te mau ohipa faaoaoaraa o te nehenehe ho‘i e ravehia ma te oomo noa i te ahu hiero i raro a‘e i te ahu rapae. Mai te mea e, e tatarahia te ahu hiero, mai te huru i te taime hopuraa miti, e ti‘a ïa ia oomo-oioi-hia te reira i te taime e ti‘a ai.

« Te parau no te ahuraa e te tapoiraa i te tino ma te au maite, e parau mana ïa i roto i te fafauraa, e na te reira e arata‘i i te huru o te oomoraa ahu. Te oomo nei te mau melo o te Ekalesia i te ahu hiero ei faahaamana‘oraa i te mau fafauraa mo‘a ta ratou i fafau i te Fatu, e ei parururaa atoa ia ratou i te mau faahemaraa e i te ino. Ua riro te huru o te oomoraa i te reira ei faaiteraa i te fafauraa ia pee i te Faaora ».¹⁶

Taa‘e atu te faaineineraa i te pae tino, e mea ti‘a ia tatou ia ineine atoa i te pae feruriraa e i te pae varua. No te mea ho‘i e mea mo‘a te mau oro‘a e te fafauraa o te hiero, ua titau-hope-hia tatou eiaha e aparau i rapae i te hiero i te mau mea e tupu i roto i te hiero. E titauhia te faaturaraa mo‘a no te mau mea mo‘a.

I roto i teie fare no te haapiiraa, e haapiihia tatou ia au i ta te Fatu rave‘a. E ere Ta’na rave‘a i ta tatou rave‘a.¹⁷ Eiaha tatou e maere mai te mea e, ua taa‘e rii te mau rave‘a haapiiraa i te mau rave‘a haapiiraa ta tatou i mataro. Ua riro te mau oro‘a e te mau fafauraa ei tuhaa tamau no te evanelia mai te anotau mai o Admau e o Eva. I mutaa iho ra, ua faaohipahia te mau tapa‘o no te haapii i te mau parau mau hohonu, e te faaohipahia nei te reira huru rave‘a haapiiraa i roto i te hiero i teie mahana.

No reira, e mea ti‘a roa ia feruri hohonu tatou i te mau tapa‘o i faaitehia i roto i te hiero e ia hi‘o i te mau parau mau puai ta te tapa‘o tata‘itahi e faahi‘o ra.¹⁸ « Ua î roa te mau oro‘a o te hiero i te mau tapa‘o e ua riro ïa ei rave‘a no te feruriraa e te haapiiraa maitai no te oraraa taatoa ».¹⁹ E mea ohie roa te mau haapiiraa o te hiero, e e mea nehenehe ho‘i. E haroaroahia te reira na te mau taata e mea iti to ratou ite, e faaha‘uti atoa râ te reira i te feruriraa o te mau taata maramarama.

Te parau nei au e, te mau melo e haere nei i te hiero no te taime matamua, e mea ti‘a ia ratou ia tai‘o i te mau papa‘iraa i roto i te Faatoro Bibilia no ni‘a i te hiero, mai te « faatahinuraa », « te Fafauraa », « te Tusia », e « te Hiero ». E hinaaro atoa paha te hoê taata e tai‘o i te Exodo pene 26-29, e te Levitiko, pene 8. Te faaite maitai ra te Faufaa Tahito, e tae noa’tu i te buka a Mose e a Aberahama i roto i te Poe Tao‘a Rahi, i te vairaa maoro o te ohipa o te hiero e i te huru mure ore o te mau oro‘a.

Te vai ra e piti ture o te ti‘a ia tatou ia tapea taa‘e i roto i to tatou feruriraa a faaineine ai tatou i te haere i te hiero. A tahi o te fafauraa ïa. Ua titauhia ia tatou ia haamana‘o e, te hoê fafauraa o te hoê ïa euheraa. Te hoê fafauraa i ravehia i mua i te Atua ia riro ïa te reira eiaha ei taaoti‘araa ei parururaa râ. Ia fafau tatou i mua Ia’na, e paruru te reira ia tatou i te fifi.

E ere teie haapiiraa i te haapiiraa apî. Ei hi‘oraa, mai te mea e, e ere ta tatou haapahuraa pape i te mea mâ, e titi‘a ïa tatou i te pape. Oia atoa te mau fafauraa hanahana, na te reira e paruru ia tatou i te ati. Ia faaoti ana‘e tatou ia haapae i te mau mea ti‘a ore atoa,²⁰ eita tatou e ere i te mau mea faufaa, e e roaa ho‘i ia tatou te hanahana tei itehia e te feia ana‘e tei roaa ia ratou te ora mure ore. Te haapa‘oraa i te hoê fafauraa no te hiero, e ere ïa i te ohipa teimaha, e haamaitairaa râ. E faateitei te reira ia tatou i ô atu i te mau oti‘a o ta tatou ti‘aturiraa e to tatou puai. E au ïa mai te taa‘eraa i rotopu i te haereraa ma te teimaha na roto i te vari paruparu e te tereraa na roto i te reva na ni‘a i te hoê manureva tutuha auahi. Te haapa‘oraa i te hoê fafauraa i mua i te Atua ua riro ïa ei rave‘a parururaa e te haamaitairaa

Te piti o te haapiiraa e ti‘a ia haapapû i roto i to tatou faaineineraa i te pae o te feruriraa o te Taraehara ïa.Te Taraehara a Iesu Mesia o te haapûraa ïa o te aamu o te taata nei. O te faufaa tumu ïa o te faanahonahoraa no te faaoraraa. Ahiri aita e Taraehara hopea ore, e hope paatoa te taata nei i te pohe. Te haapii mai nei te mau oro‘a o te hiero e te mau fafauraa i te mana faaora o te Taraehara.

E horo‘a mai te ohipa taviniraa i roto i te hiero i te mau haamaitairaa ia tatou nei i roto i teie oraraa e i roto i te oraraa amuri a‘e. Ua parau mai o Elder Neal A. Maxwell no te Pŭpŭ Tino Ahuru Ma Piti Aposetolo e « e ere te ohipa hiero i te aperaa i te mau mea o te ao nei, e haapuairaa râ i to tatou hinaaro ia haamaitai i te ao nei na roto i te faaineineraa ia tatou no te tahi atu ao atea e te hau atu i te maitai. No reira, ia haere tatou i roto i te fare o te Fatu e nehenehe te reira e tauturu ia tatou ia taa‘e i to te ao no te faatupuraa i te taa‘eraa hau atu i te rahi i roto i te ao nei ».²¹

Mai te mea e, e vai parau ti‘a tatou e te haapa‘o i roto i teie oraraa, e farii tatou i te ora mure ore. Te tahuti ore o te oraraa ïa e amuri noa’tu. Te ora mure ore e ere ïa i te riro-noa-raa ei taata tahuti ore. Te ora mure ore o te fariiraa ïa i te faateiteiraa i roto i te ra‘i teitei a‘e e ia ora i roto i te utuafare. Ua faaite te Atua e, Ta’na ohipa rahi roa – « ta‘u ohipa e to‘u hanahana » – oia ho‘i « te faatupuraa i te tahuti ore e te ora mure ore o te taata nei ».²² Aita e faaheporaa no te farii i Ta’na horo‘a no te tahuti ore – e horo‘a hoo ore no te faaoraraa no te mau taata atoa. E roaa ia tatou te ora mure ore – te faateiteiraa – na roto i to tatou haapa‘o i te mau fafauraa i ravehia e te mau oro‘a i fariihia i roto i te mau hiero o te Atua.

E riro mai te mau haamaitairaa o te hiero ei mau haamaitairaa faufaa mau ia hopoi ê ana‘e te pohe i tei herehia e tatou i rapae au i te utuafare. Ia ite ana‘e tatou e, no te hoê tau noa to tatou taa‘eraa, e horo‘a mai te reira i te hoê hau faito ore.²³ Ua papa‘i te Peresideni Joseph Fielding Smith e, « Na roto i te mana o teie autahu‘araa ta Elia i horo‘a mai, e nehenehe te tane e te vahine e taatihia, e aore râ e faaipoipohia no te tau e amuri noa’tu; e nehenehe te mau tamarii e taatihia i to ratou na metua no te tau e amuri noa’tu; e na roto i te reira ua riro te utuafare ei utuafare mure ore, e e ore roa te pohe e faataa‘e i te mau melo ».²⁴ Ma te haamaitaihia tatou i te haamaitairaa o te taatiraa mure ore, e nehenehe ta tatou e hi‘o i te pohe ei tuhaa faufaa no te faanahoraa rahi no te oaoa a te Atua.²⁵

Na te hoê hi‘oraa mure ore e tauturu ia tatou ia haapa‘o maite i te mau fafauraa ta tatou i rave. Ua haapapû mai te Peresideni Packer e « e riro te mau oro‘a e te mau fafauraa ei faaiteraa no to tatou farii-raa-hia i mua i te aro o te (Atua). Ua riro te fariiraa i te reira ei titauraa no te oraraa taatoa; e ua riro te tape‘a-maite-raa i te reira ei titauraa no te tahuti nei ».²⁶

E ere te mau oro‘a o te hiero no to tatou noa hanahana mure ore, no to tatou atoa râ mau tupuna i reva ra. « E mea titauhia ho‘i to ratou faaoraraa no to tatou faaoraraa, … e ore ho‘i ratou e maitai roa mai te mea e, aita tatou – e aita atoa tatou e maitai roa mai te mea e, aita ratou ».²⁷ Ia rave tatou i te ohipa no ratou e riro ïa te reira ei tautururaa ia tatou ia tamau noa i te haamori i roto i te hiero, ma te rave i te ohipa ei mono no ratou mai ta te Fatu i riro ei Taraehara no te haamaitai i te mau taata atoa e ora.

I te hoê mahana e mea papû e, e farerei tatou i tei poiete ia tatou e e ti‘a tatou i mua Ia’na i te auri o te haavaraa. Te haapii mai nei te mau papa‘iraa mo‘a ia tatou e « Te tia‘i o te uputa o tei Mo‘a ïa i Iseraela; e aita oia e tuu i te hoê tavini i reira; e aita e e‘a ê atu maori râ taua uputa ra; no te mea eita oia e haavarehia, no te mea o te Fatu te Atua to’na i‘oa ».²⁸ Na te Fatu iho e faataa e ua haapa‘o anei tatou i te mau fafauraa ta tatou i rave i mua Ia’na i roto i te hiero e i reira ho‘i e farii ai i te mau haamaitairaa hanahana Ta’na i fafau i te feia e haapa‘o i ta ratou mau fafauraa.

Na te reira iteraa e horo‘a ia tatou i te puai no te faaoroma‘i i te mau tamataraa o te oraraa. Ua parau te Peresideni Packer e, « Te tumu hopea o te mau mea atoa ta tatou i haapii o te tahoêraa ïa i te mau metua e te mau tamarii i roto i te faaroo i te Fatu ia Iesu Mesia, ia oaoa ratou i te fare, ma te taatihia i roto i te hoê faaipoiporaa mure ore, ma te taamuhia i to ratou mau u‘i, e ia roaa te faateiteiraa i mua i te aro o to tatou Metua i te Ao ra ».²⁹

Ua riro te hiero tata‘itahi ei taipe no to tatou ti‘araa melo i roto i te Ekalesia, ei tapa‘o no to tatou faaroo i roto i te oraraa i muri a‘e i te pohe, e ei taahiraa no tatou e no to tatou utuafare e tae atu ai i te hanahana mure ore. Te pure nei au ia faaineine te melo tata‘itahi o te Ekalesia ia ratou no te farii i te mau haamaitairaa nehenehe o te hiero.