Nahea te Hiero i te Tauturu

Ua ite te mau metua atoa e, te faaamuraa i te tamarii e horo‘a mai te reira i te mau titauraa e te mau haamaitairaa. Ua ite a‘e ra ta‘u tane e o vau nei e, ia hi‘o ana‘e maua i te hi‘oraa mure ore o te ti‘araa metua, e ite maua i te teimaha rahi o te hopoi‘a e tae noa’tu i te ti‘aturiraa rahi.

Oia mau, ua horo‘a mai te Fatu ia maua i te mau haamaitairaa varua no te haamama i ta maua hopoi‘a. No to maua utuafare, te haamaitairaa varua rahi a‘e i te mau haamaitairaa varua atoa, o te haereraa ïa i te fare o te Fatu no te farii i Ta’na tauturu a tupu ai te tamarii i te paariraa e a haere noa ai te oraraa i te fifiraa. Ua itehia ia maua e, e nehenehe ta maua e tuu i te mau fifi taa‘e i mua i te Fatu i roto i To’na hiero.

Ia paari rii mai ta maua mau tamarii, ua ite a‘e ra maua e, e nehenehe ratou e rave i te mau hape fifi roa. Penei a‘e te iteraa ri‘ari‘a roa o te iteraa ïa e, ua rave mau maua i te mau mea atoa ta maua i ite nahea ia rave, tera râ, te vai noa ra â te mau tapa‘o o te ati i mua ia maua.

E ua ite a‘e ra maua e, e nehenehe te parau no te hiero e riro ei tuhaa faufaa roa i roto i ta maua mau tautooraa no te tauturu i ta maua mau tamarii ia ma‘iti i te maitai. Ua iteahia ia maua te puai rahi e te haamaitairaa na roto i te haereraa i te hiero na roto i te varua haapae e te pure no ta maua mau tamarii. E pure tatou no te faaineine ia tatou iho, no te farii i te mau mana‘o e te huru tano hou a tomo ai i roto i te hiero. Mai te mea e tano, e feruri hohonu tatou i roto i te hiero no ni‘a i ta tatou hopoi‘a ei mau metua e no ni‘a i te mau hinaaro o te hoê tamarii taa‘e.

I te tahi taime ua tae oioi mai te pahonoraa ma te maramarama. Te taime matamua a tupu ai te reira, ua feruri paha maua e, e mea hape noa te reira. Aita râ i maoro ua ite papû maua e, tei roto maua i te hoê tereraa ohipa o te horo‘a mai i te mau haamaitairaa no te ra‘i mai.

I te tahi taime ua tae mai te mau pahonoraa na roto mai i te tahi mau taata o tei haaputapû i te oraraa o ta maua mau tamarii, mai te hoê episekopo maitai tei tauturu i ta maua tamahine haapiiraa tuarua i roto i te hoê fifi teimaha. Mai te reira atoa te huru te haamaitai-raa-hia te tahi atu mau tamarii. E ti‘amâraa to ratou tata‘itahi, e e nehenehe ratou e faaoti eiaha e pahono mai ta maua e ti‘aturi ra, tera râ, ua feruri maua e, na te ohipa ta maua i rave i roto i te hiero i horo‘a mai i te tauturu a te ra‘i i roto i te oraraa o ta maua mau tamarii.

Ua tae roa te mau maitai o to maua taviniraa i roto i te hiero i ni‘a i ta maua mau tamarii. I te hoê taime, ua tupu te hoê fifi i roto i te ohipa a to‘u hoa faaipoipo e no reira, ua faaoti oia e, e tuu te reira i roto i te hiero. I taua mahana ra, ua haamaitai te Fatu ia’na ma te horo‘a ia’na i te mana‘o e, e riro te hoê papa‘iraa mo‘a ei pahonoraa i ta’na uiraa.

Ia tae oia i te fare, ua iriti oioi oia i te mau papa‘iraa mo‘a e, ma te oaoa rahi, ua itehia ia’na te tauturu no to’na fifi. Na teie ohipa i iriti i te hoê huru faaohiparaa apî o te papa‘iraa mo‘a. E nehenehe te Fatu e paraparau i Ta’na mau tamarii na roto i te faahaamana‘oraa ia tatou i te mau papa‘iraa mo‘a tei roto i reira te mau pahonoraa i ta tatou mau titauraa. Te oaoa nei au no teie haapiiraa ta maua i apo mai i roto i te hiero.

I roto i te hoê ao tei î roa i te ino e tei reira ho‘i o Satane i te tuuraa i to’na mau puai no te haamou i te mau utuafare, e mea mahanahana ia ite e, e nehenehe ta tatou e haere i te fare o te Fatu e ia titau i Ta’na arata‘iraa. Noa’tu te huru o te titauraa ta tatou e farerei nei i roto i te aupururaa tatou i to tatou mau utuafare, e itehia ia tatou te oaoa mai te mea e, e imi tatou i te haapûraa e te tamahanahanaraa o te hiero.