O Le Fale Tatala

Na faalogo ma le naunautai Alisona a o faasalalauina e le epikopo o le a faia se fale tatala o le Kerisimasi i lenei tausaga a le uarota. “Matou te mananao ia avea o se afiafi faapitoa,” o lana tala lea. “O le a avea o se avanoa matagofie e valaaulia ai uo ma tuaoi.”

E fiafia Alisona i aso malolo o le Kerisimasi. E fiafia o ia e faatau meaalofa mo lona aiga ma uo ma usuina pese o le Kerisimasi. Ma e fiafia o ia e faitau i le tala o le soifua mai o Iesu ma mafaufau ia te Ia o se pepe itiiti.

O upu na sosoo ai a le epikopo na gauai atu ai o ia. “Ona o le fale tatala, o le a leai sa tatou pati masani a le uarota mo le Kerisimasi i lenei tausaga.”

Na faauu Alisona. “Leai se pati?” o lana musumusu atu lea i lona tina. O le pati o le Kerisimasi a le uarota o se tasi lea o vaega e sili ona fiafia i ai o ia i lea vaitau.

Na tuu le lima o tina i ona laugutu [ia filemu].

“E le malamalama nisi o a tatou uo ma tuaoi o i tatou o ni Kerisiano,” o le faaauau lea a le epikopo. “Tatou te mananao ia latou iloa tatou te talitonu ia Iesu Keriso.”

Na mafaufau Alisona i lena mea. Na ia manatua na fai mai lana uo mamae o, Erika, e le Kerisiano tagata Mamona. Na te lei malamalama i le tala a Erika, o lea na ia fesili ai i ona matua e uiga i ai.

“O le toatele o tagata e taulai atu i le igoa ‘Mamona’ po o le ‘Au Paia o Aso e Gata Ai,’” na faamalamalama mai e Tina. “E galo ia i latou o la tatou Ekalesia ua faaigoaina mo Iesu Keriso.”

Na tau atu e Alisona ia Erika, i le aso na sosoo ai i le aoga, le mataupu faavae muamua o le faatuatua: “Matou te talitonu i le Atua, le Tama Faavavau, ma lona Alo o Iesu Keriso, ma le Agaga Paia.”

Ae na o le faamimigi o tauau o Erika. “Aisea la e le ta’ua ai outou e tagata o Kerisiano nai lo o Mamona?” na ia fesili ai.

Na toe mafaufau i tua Alisona i le epikopo.

“O le a taulai atu le fale tatala ia Iesu Keriso,” o lana tala lea. “Matou te talosaga atu i aiga ia aumaia ni seti faatagata o le vaaiga i le soifua mai o le Faaola, ma o le a faia se faatinoga o le soifua mai o le Faaola.”

Ao latalata mai le taimi o le fale tatala, na amata ona le mau nofo ia Alisona i le fiafia. Na valaaulia e Tina ma Tama se tuaoi matua e malaga atu i le fale tatala. Na valaaulia e Alisona ia Erika.

Na fesoasoani Alisona ia Tina i le po o le fale tatala, e afifi i nusipepa ia seti faatagata e faamatalaina ai le soifua mai o le Faaola. Ona latou o lea ma Tina ma Tama e piki mai ia Erika.

Ina ua latou taunuu atu i le falelotu, na tilotilo Alisona ma Erika i faatagata mai Iapani, Oseteria, Filipaina, ma le tele o isi atunuu e faamatalaina ai le soifua mai o le Faaola.

Ona o lea o teineiti i fafo i le mea na faatino ai e alii ma tamaitai talavou le soifua mai o le Faaola. Na i ai povi mo’i, mamoe, ma sa i ai foi se ’oti fafine. “Sa i ai mea uma lava vagana ai se kamela,” o le tala lea a Alisona.

Na talosaga mai le epikopo i tagata uma e faapotopoto i le falesa. Na nonofo faatasi ia Alisona ma Erika ma tamaiti o le Peraimeri. Na usuina e tamaiti le pese o le “Picture a Christmas”¹ ma le “Pese O Le Kerisimasi,”² ma na faatinoina e le aufaipese a le uarota ni vaega o le Messiah.

“Matuai manaia tele,” o le tala lea a Erika ao agai atu i le fale. “Maimau pe a na mafai ona o mai o’u matua.”

“Atonu o lea tausaga,” o le tala lea a Alisona, ma ataata. Na ia mafaufau i le fale tatala ma iloa ai e na te lei misia lava le pati o le Kerisimasi.