Aua Tou Te Matatau

Na vave aoaoina i le olaga o Maria ma Iosefa le i ai lea o se vaifofo a le Atua mo soo se faafitauli lava. Mo Maria, na fetalai mai le agelu: “Aua e te fefe. … Aua e leai lava se mea e tasi e le mafaia e le Atua” (Luka 1:30, 37).

O nisi taimi e feagai ai le autalavou matutua ma se faafitauli e foliga mai e pei o le Mauga o Everesi. Latou te talitonu e matua maualuga lava ma e faigata tele ona a’ea. Ona latou te le o iloa atu se vaifofo, ua latou loto vaivai ai—atonu e oo lava i le toilalo ma le leai o se faamoemoe—i o latou lumanai. Ae, e pei o Maria ma Iosefa, e mafai ona e aoao e tusa lava po o le a le foliga mai e lē mafo’iaina ni faafitauli, ae e i ai lava se vaifofo a le Atua i taimi uma.

Ina ua iloa e Maria lona valaauga paia e fanauina mai le Alo o le Atua, e mautinoa lava sa lē masino le tele o faafitauli ma popolega na oo atu i lona mafaufau. Ae, ua uma ona fai le la faamau ma Iosefa—pe mata la o le a sona manatu? Ona fautuaina lea e le agelu mai le lagi, “Aua e te fefe” (Luka 1:30). Ina ua logotala Iosefa i le maitaga o Maria, na leai se vaifofo faamalieloto ua na o le tatala o le faamau. Ae na toe fautuaina foi e le agelu e faapea, “Aua e te fefe” (Mataio 1:20). O le taitaiga faalelagi lava e tasi e pei ona tuuina atu muamua ia Sakaria (tagai i le Luka 1:13) ma o le a tuuina atu mulimuli i le au leoleo mamoe: “Aua tou te matatau: aua faauta, ou te au mai ia te outou le talalelei e olioli tele i le nuu uma” (Luka 2:10).

O loo i ai se mata’u tele i le lalolagi i le taimi nei—i le faaipoipo, mauaina o fanau, faia o ni tautinoga, tu atu mo le mea sao, ma le feagai ai ma uunaiga o taaga a tupulaga. Ua i ai le mata’u i tulaga o mea tautupe ma faalavelave faalenatura. Ae o le apoapoaiga a le Alii mo i tatou i le aso e tutusa lava ma lea na tuuina atu ia Maria ma Iosefa: “O lea, ina fiafia ai ia, ma aua le fefe, aua o Au le Alii o loo faatasi ma outou” (MFF 68:6; faaopoopo i ai le faamamafa).

O le fautuaga a le agelu ia Maria ma Iosefa ia “aua le fefe” na sili atu nai lo faatonuga na suia mo le lelei mo o la’ua faafitauli faaletagata. O se faafeiloaiga laugatasia mo tagata uma aua o le a i ai se matafaioi tulaga ese a Maria ma Iosefa i le galuega a le Faaola, o lea galuega o le a mafai ai ona faaitiitia le fefe uma o tagata uma o vaitausaga uma lava.

Ona o le fanau mai o le Faaola, soifuaga, ma le Togiola, ua leai ai ni faafitauli e le mafai ona foia. E moni, e i ai mafatiaga ma faigata lē tumau, ae e le tatau ona tumau pe le faatoilaloina. Pe mafai ona e vaai faalemafaufau i se tasi o i ai se faafitauli e le mafai e le Atua ona foiaina? E ia te Ia lava pea se vaifofo o le a siitia lo tatou alualu i luma e faavavau. O mafuaaga uma na ma le taua o le Togiola. O le ala lena na faapea mai ai Mamona, “E ia te outou le faamoemoe ona o le togiola a Keriso” (Moronae 7:41).

E le fesiligia le mana o le Togiola e saunia ai vaifofo mo o tatou faafitauli. Ua matua faamanino mai e tusitusiga paia lenei tulaga. O mataupu moni nei: Pe tatou te taliaina ea na vaifofo? Pe tatou te filifilia ea le tali a le lalolagi po o le tali a le Atua? Pe tatou te salamo ea pe tuuitiitia, saili le alofa tunoa o le Atua e faatoilaloina ai o tatou vaivaiga po o le “faia na o oe lava e aunoa ma le Atua,” faailoa atu le alofa o le Atua i taimi o puapuaga pe teena o Ia i ala sese uma o le olaga?

O le Togiola o le auala lea e foia ai faafitauli ogaoga o le olaga. Faatasi ai ma le Togiola, na tuuina i tatou e le Atua i le nofoa e faafoeina ai o tatou taunuuga paia, pe a tatou mulimuli i Lona finagalo. O Maria o se faataitaiga maoae o lenei usiusitai. Na ia fai atu i le agelu, “Ia faia ia te a’u e tusa ma lau fetalaiga” (Luka 1:38). Na leai se fetuutuunaiga, leai se tolopo, leai se muimui—ua na o se gauai lotomaualalo i le finagalo o le Atua. Na ia Iosefa foi lea lava ituaiga o usiusitai. E ui lava o malosiaga o le mafuaaga na mafai ona faailoa atu ai atonu e le i faamaoni Maria, ae na “faia e ia e pei ona fai mai ia te ia o le agelu a le Alii; ua na au mai lana ava” (Mataio 1:24).

Na aoaoina e Maria ma Iosefa se tasi o lesona sili ona mamana o le olaga: afai e te talitonu i le Togiola ma faia le finagalo o le Atua, e le mamanomia lou fefe aua o le a i ai i taimi uma se vaifofo mo ou faafitauli.

E le i aoaoina lava e tagata faitio o le lalolagi le lesona lenei. E sa’o lava, e tele lava ina atamamai i latou ma mataalia. Latou te iloa le toatele ma le lavelave o faafitauli o loo feagai ma i tatou, ae e tele lava ina latou faavaivai i le le mautonu aua latou te le iloa se vaifofo. E mafua lea tulaga ona latou te le malamalama i le Togiola. E mafai ona latou vaaia le faafitauli tele i o latou luma, ae papa’u la latou vaai. E foliga mai e i ai se pa puipui o loo poloka ai lo latou iloa atu o le tafailagi; pau lava le mea o loo latou iloa atu o le faafitauli. O le taunuuga la, latou te le talitonu ma masalosalo ma leai se faamoemoe. O la latou vaaiga o loo faaalia i le ata 1.

Ata 1: Au Faitio

mata faaletino

faafitauli

vaifofo

I le isi itu, e toatele isi o e o loo sailiili faaleagaga e aunoa ma se faitio. E atamamai foi i latou ma mataalia. Latou te iloa atu foi le lavelave ma le faigata o faafitauli o le olaga, ae e matua ese lava la latou vaaiga. E leai se pa puipui e punitia ai la latou vaai. Ae, e i ai a latou tioata e faamatamatatetele e fesoasoani e le gata ina latou iloa atu ai faafitauli ae o tua atu foi. I se isi faaupuga, latou te iloa atu foi ia vaifofo ua ofoina mai i le Togiola. O la latou vaaiga i le olaga o loo faaalia i le ata 2.

Ata 2: Sailiiliga Faaleagaga

mata faaleagaga

faafitauli

vaifofo na ofoina mai i le Togiola

O lea la, e itiiti lava ni mea e matatau ai nei tagata, pe afai e i ai. Latou te talia ma manatu i le itu lelei ma fiafia i le olaga aua ua latou mautinoa mo soo se faafitauli lava, o loo i ai se vaifofo faaleagaga. Na folafola mai e le Faaola, “Ia outou loto tetele; ua Ou manumalo i le lalolagi” (Ioane 16:33). O lea la, e leai se avanoa mo le le manatu i mea lelei i le Ekalesia a Keriso. O le le manatu i le itu lelei ma le masalosalo e tupu mai ia Satani. O le fiafia ma le manatu i le itu lelei e tupu mai ia Keriso.

O faafitauli uma o le lalolagi e foliga mai e pau i ni faavasegaga autu se fa, o vaega taitasi ia na afio ifo ai le Faaola i lalo ma manumalo ai, o lea na afua ai Lana poloaiga “ia loto tele.”

• Muamua, oti. Ua ta’u mai e tusitusiga paia, “Aua e faapei ona oti uma ia Atamu, e faapea foi ona faaolaina uma ia Keriso” (1 Korinito 15:22).

• Lona lua, agasala. Na ta’u atu e le agelu ia Iosefa o Iesu o le a “faaola e ia lona nuu ai a latou agasala” (Mataio 1:21).

• Lona tolu, vaivaiga. Na aoaoina Moronae e le Faaola o Lona “alofa tunoa [o le mana tatala o le Togiola] i tagata uma o e e faamaualaloina i latou lava i o’u luma; aua afai latou te faamaualaloina i latou lava i o’u luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27).

• Lona fa, o gasegase masani o le olaga lea atonu e leai se faiā ma le agasala (e pei o ma’i, teena, faanoanoa, leai se galuega, ma isi mea faapena). Na valoia e Isaia o le Faaola o le a “fufusi i e loto momomo,” “avatu le fiafia i e faanoanoa,” ma “foaiina atu ia i latou le matagofie e sui ai le efuefu” (Isaia 61:1–3; tagai foi i le Alema 7:9–13).

Mo mafatiaga uma e lia’i mai e le lalolagi ia i tatou, o loo i ai lava i le Faaola se vaifofo o le mana maoae o le faamalologa. Leitioa a maofa ia Maria, “Ua vivii atu lo’u loto i le Alii, ma ua fiafia lava lo’u loto i le Atua lo’u Faaola” (Luka 1:46–47). O Ia lava o le Faaola aua Na te mafaia ona faasaoina i tatou mai le oti ma le agasala ma vaivaiga ma gasegase masani o le olaga.

Na finagalo lo tatou Tama Faalelagi ina ia amataina e Maria ma Iosefa se auala le mautinoa o le olaga e aunoa ma le matau, i le iloaina lea na i ai iina Lona Alo ma Ona mana faaola uma. E finagalo o Ia ina ia tatou aoaoina vave i le olaga lenei lesona: “Aua e te fefe. … Aua e leai lava se mea e tasi e le mafaia e le Atua” (Luka 1:30, 37).