Fesoasoani i Fanau e Faaaoga lo Latou Faitalia

Ina ua gaosia Atamu ma Eva e le Tama Faalelagi, na loto mama i la’ua. E lei lava lo la malamalama e uiga i le olaga ma ona taunuuga. Ae na savavali faatasi ma aoaoina i la’ua e le Tama Faalelagi, ma na Ia onosaia i laua ao la aoao e uiga i lo la auai iinei.

I le avea ai ma matua o loo ia i tatou foi le avanoa e mafuta ai ma a tatou fanau laiti ma aoao i latou. Ae peitai, ou te manatu o nisi taimi atonu e galo ia i tatou o a tatou fanau o fanau agaga foi ia a lo tatou Tama Faalelagi. E i ai so tatou tiutetauave e fesoasoani ai ia i latou e aoao a latou lesona muamua, ma o la tatou misiona o le taitaiina lea o i latou e agai atu i le Faaola o Iesu Keriso.

Afai tatou te mulimuli i le faataitaiga a le Tama Faalelagi i le Faatoaga i Etena, o le a tatou tauaveina i o tatou luga le tiutetauave o le faafaileleina o a tatou fanau ma aoaoina i latou e uiga i le talalelei a Iesu Keriso. Ao tatou faia faapea, e manaomia lo tatou aoaoina o i latou e uiga i taunuuga o a latou gaoioiga. E le faigofie lenei galuega, talu ai ona o loo tatou aoao foi, ma o nisi taimi tatou te le faia ai le finagalo o lo tatou Tama Faalelagi. Ma o nisi taimi tatou te mananao ai e feosofi atu ai e laveai a tatou fanau e tusa lava pe o le a faamanuiaina i latou i le aoao mai ia latou mea sese.

Na aoaoina Atamu ma Eva ma le onosai e le Tama Faalelagi mai le amataga e uiga i le faitalia. Na Ia tuuina atu ia i laua poloaiga, taunuuga, ma le malosiaga e faaaoga ai lo laua faitalia, ma fetalai atu, “O laau uma o i le faatoaga lua te aai saoloto ai. Ao le laau e iloa ai le lelei ma le leaga, aua lua te aai ai, ae ui i lea, ia faitalia oulua ma le lua filifiliga i ai, aua ua tuuina atu ia te oulua; peitai, ia lua manatua ua ou faasaina, aua o le aso lua te aai ai lua te oti ai lava” (Mose 3:16–17; faaopopo le faamamafa).

Atonu tatou te tau mafaufau pe faapefea ona faamalosiau atu ia tatou fanau ia mulimuli i poloaiga e aunoa ma le faamalosia o i latou. E tele ni mea e mafai ona tatou faia e fesoasoani atu ai. E mafai ona tatou aoao atu le talalelei ia tatou fanau, ae maise lava mai tusitusiga paia, ona ola ai lea e tusa ma na mataupu faavae. E mafai ona tatou aoaoina i latou i le upu ma faataitaiga ina ia latou faalagolago i le Tama Faalelagi ma faasoa atu ia i latou faamanuiaga e oo mai ona o le ola ai i le talalelei. E mafai ona tatou aoaoina i latou, ona o o tatou vaivaiga, i le avea ai ma ni matua tatou te manaomia Lona alofa, alofa tunoa ma le onosai e pei lava ona manaomia e a tatou fanau.

O nisi o taimi, pe a faalogogata a tatou fanau laiti, e ono amata ona leai so tatou faamoemoe, ae e le aveesea ai lava le faamoemoe o le Tama Faalelagi ia i tatou. E tatau ona tatou aoao e vaai atu ia tatou fanau e pei ona silasila lo tatou Tama Faalelagi ia i tatou: o Ona atalii ma afafine ma le faamoemoe ina ia faapei o Ia e ala atu i le mana ma le alofa tunoa o Lona Alo. E leai so tatou mana e laveai ai a tatou fanau, ae e mafai ona avea i tatou ma faataitaiga lelei ma faatino le faatuatua mo i latou.

Tatou te le o i ai iinei e faamalosia se tasi e fai le finagalo o le Tama Faalelagi. E moni, o le tele o le saolotoga ma tiutetauave tatou te tuuina atu ia tatou fanau e faalagolago i lo latou matutua ma malosiaga. Ao tatou fesoasoani atu ia tatou fanau e faaaoga tatau lo latou faitalia, o le a faigofie atu le aoao ma alofa ia i latou, e tusa lava po o a a latou mea e fai.

Na silafia e lo tatou Tama Faalelagi o le a faaosoosoina Atamu ma Eva ma o le a aai i le laau e iloa ai le lelei ma le leaga. Na uma ona Ia saunia le ala mo i laua e toe foi atu ai e ala i Lona Alo. Na Ia auina atu se agelu e aoaoina i laua e uiga i le taulaga togiola a lo tatou Faaola, mataupu faavae o le salamo, ma pe faapefea ona la valaau atu i le Atua i le suafa o le Alo ma maua se faamagaloga o a la agasala e ala i le alofa tunoa ma le alofa o le Tama Faalelagi (tagai Mose 5).

Ao tatou faaalia le alofa mo a tatou fanau ma aoaoina i latou e tusa lava pe latou te se ese, o le a tatou tumau, faamoemoe ma tatalo mo i latou ina ia latou maua le olioli e ala i le faatuatua ia Iesu Keriso ma le salamo moni. Ao teuina i o tatou mafaufau nei mataupu faavae, o le a faamanuiaina i tatou i le saga faatumulia pea i le alofa mama o Keriso ma o le a sili atu le faamanuiaina i le avea ai ma ni matua (tagai MFF 121:41–46).