I Se Aupito Itiiti o i Latou Nei

I le avea ai ma se tina o se fanau laiti e toafa, na foliga mai e leai so’u taimi avanoa. I se tasi o o’u aso pisi ma le le mautonu, na valaau mai ai lo matou epikopo ma fesili mai pe mafai ona ia feiloai ia i maua ma lou toalua. Na ou ofo i lona valaauina o au e avea ma peresitene o le Aualofa.

Na ou fai atu i le epikopo e manaomia lo’u tatalo e uiga i lenei mea. Sa matuai ou le iloaina lava pe faapefea ona ou faataunuuina se valaauga e tele le taimi e manaomia ai i lena vaitaimi o lo’u olaga. Na faatumulia lo’u mafaufau i lagona o le le agavaa ma le le mautonu, ma e lua aso o fai lava ma ou tagi.

Na valaau mai se tasi o o’u faiaoga asiasi e fuafuaina se taimi e asiasi mai ai ia te au, ae na te le o iloa le tulaga le mautonu sa ou aafia ai. Ao faia lana asiasiga sa ia faasoa mai se tala e uiga ia Emma Somerville McConkie, o le sa avea ma se peresitene o le Aualofa i taimi o le popofou o le Ekalesia i Iuta. Sa i ai se tina i le uarota a Uso McConkie e toatele sana fanau, e aofia ai ma se pepe fou. Ona o le matitiva o le aiga o le tina, sa asiasi atu ai Uso McConkie i aso uma lava i le aiga, e ave meaai ma fesoasoani i le tina i le tausiga o le pepe.

“I se tasi aso na foi mai ai [Sister McConkie] i le fale ua matua le lēlava lava ma ua vaivai. Sa moe i lona nofoa. Na miti o ia sa ia faataeleina se pepe lea na ia iloaina o le Pepe o Keriso. Na ia mafaufau, Oka, o se faamamaluga tele le auauna atu ia Keriso lava ia. Ao ia siiina le pepe i ona vae, sa matuai faagaeetia lava o ia. … Na faatumuina lona tagata atoa i se olioli e lē mafaamatalaina. … Sa matuai maoae lona olioli ma na fafaguina ai o ia. Ao ala mai o ia, na tautala mai nei upu ia te ia, ‘aua ua faia e outou i le tasi o e aupito itiiti o ou uso nei o au lea ua outou faia i ai.’”¹

Na faatumulia lo’u loto ma lo’u agaga i le mafanafana ma le toafilemu. Na ou iloa e silafia e le Alii lo’u tulaga, na finagalo o Ia ia ou auauna atu i uso i le uarota, ma o le a Ia faamanuiaina au ina ia mafai ona ou faataunuuina ou tiutetauave uma lava. Na ou taliaina le valaauga.

O loo ou maofa pea ona sa mafai ona ou faataunuuina lo’u valaauga ao tausia manaoga ma mea e manaomia e lo’u aiga, ma e ou te faafetai i se faiaoga asiasi na musuia e faasoa mai se savali i se taimi talafeagai lelei lava. Talu mai lena taimi ou te le o toe faatuai lava e talia se valaauga. E i ai la’u molimau, afai tatou te auauna atu i lo tatou Tama Faalelagi, Na te faamanuiaina i tatou i le taimi, malosi, ma le tomai tatou te manaomia e faataunuu ai o tatou valaauga.