O Iesu Keriso O Le Alo e Toatasi Na Fanaua e le Atua

O Iesu ona pau lea o le tagata na fanau mai i se tina faaletino, o Maria, ma se tama tino ola pea, o le Atua le Tama. O le pogai lena ua ta’ua ai Iesu o le Alo e Toatasi na Fanaua e le Atua. Sa maua e Ia mana faalelagi mai Lona Tama (tagai Ioane 10:17–18). Mai Lona tina, na Ia maua ai le tino faaletino ma oo ai ia te Ia le fia ai, fia inu, vaivai, tiga, ma le oti.

O le olaga faaletino o Iesu Keriso na amata ina ua fanau i Peteleema. Na tuuina mai e Luka lenei faamatalaga: “Ua auina mai ai e le Atua le agelu o Kaperielu … i se taupou ua faufautane i le tagata e igoa ia Iosefa. … Ua fai mai foi le agelu ia te ia, … o le a to oe, ma e fanauina se tama tane, e te faaigoa ia te ia o Iesu. E sili o Ia, e taua foi o le Alo o le Silisili ese. … E afio ifo le Agaga Paia i luga ia te oe, e faamalumalu ifo foi ia te oe le mana o le Silisili ese: o le mea lea e ta’ua ai le tama paia o le Alo o le Atua” (Luka 1:26–27, 30–32, 35; tagai foi i le 1 Nifae 11:16–21; Alema 7:10).

Na tusia e Mataio, na faaali foi se agelu ia Iosefa i se miti, ua faapea atu, “[o Maria] e fanau mai e ia le tama tane, e te faaigoa foi ia te ia o Iesu: aua e faaola e ia lona nuu ai a latou agasala” (tagai Mataio 1:20–21). Na malamalama uma Maria ma Iosefa o le tama o le a fanau mai ia Maria ma o le a faaigoa ia Iesu o le Alo e Toatasi na Fanaua e le Atua.

Na ta’u atu foi e le agelu o Kaperielu ia Maria o lona tausoga o Elisapeta ua to foi o ia ma o se tama tane. Ina ua asiasi atu Maria ia te ia, sa tumu Elisapeta i le Agaga Paia ma faapea atu, “Pe faapefea lenei mea, ina ua sau le tina o lo’u Alii ia te au nei?” (tagai Luka 1:39–45). Na iloa i lena taimi e Elisapeta o Maria o le a avea ma tina o le Alo o le Atua.

Na maua foi e nisi se molimau mai le Agaga Paia o Iesu Keriso o le Alo o le Atua. O nisi nei o a latou molimau.

1. O nisi o soo o le Faaola sa i ai i totonu o le vaa ina ua latou vaai ia Iesu Keriso o savali i luga o le vai. Na latou “o mai ma ifo mai ia te ia, ua faapea mai, E moni o oe lava o le Alo o le Atua” (Mataio 14:33).

2. Ina ua fesili atu Iesu i Ona soo, “Pe se a la outou upu ia te au, po o ai?” Na tali Peteru, “O oe o le Keriso, o le Alo o le Atua soifua” (Mataio 16:15, 16).

3. Ao lei faatuina mai e Iesu ia Lasalo mai le oti, na Ia fesili atu i le tuafafine o Lasalo o Mareta pe na te talitonu o Ia “o le toetu, ma le ola.” Na ia tali atu, “Ioe, le Alii e: ou te talitonu o oe o le Keriso, o le Alo o le Atua” (Ioane 11:25, 27).

4. Na osi e Atamu ma Eva ni taulaga e avea ma “se faatusa o le taulaga a le Alo e Toatasi na Fanaua e le Tama” (Mose 5:7).

5. Na aoaoina e le Atua ia Atamu e tatau ona ia “papatisoina, i le vai, i le suafa o lo’u Atalii e Toatasi na Fanaua, o Le tumu i le alofa tunoa ma le upu moni, o Iesu Keriso” (Mose 6:52).

6. I Amerika, i le toe lima tausaga fanau le Faaola, na vavalo ai Samuelu le sa Lamana, “E afio mai le Alo o le Atua e togiola i latou uma o e faatuatua i lona suafa” (Helamana 14:2).