O Outou o Agelu

Na ou tei ina ua ou faitauina le pepa lautele o loo i ai se savali: “Messiah a Handel na faatinoina e le Faili a Swansea ma le Aufaipese a Welsh.”

Na ou i ai i la’u misiona i Swansea, Uelese, mo le ono masina ma na lagonaina moomooga e masani ona oo i faifeautalai fou ao i ai i le vaitau o le Kerisimasi. Na tele a matou aga masani faaleaiga e faia i aso malolo, ae o le mea ou te fiafia lava i ai o le faalogologo lea i le Messiah a Handel. Na taina e lo’u tina le okeni mo le tele o na faafiafiaga. Ou te nofo, faalogo, ma lagonaina le musika.

Faatasi ai ma le faatagaga mai le peresitene o le misiona, na ou faatauina ni pepa ulufale mo faifeautalai i la matou eria. I le po o le faafiafiaga, na matou oofuina ni ofu mafanafana e tatali ai le malulu ma savavali atu i le nofoaga o loo faia ai le konaseti. Na ou tatalo lemu ia matou lagonaina uma le paia o musika musuia.

Ina ua matou taunuu, na ou iloa ai ua matou tuai ma ua amata le faafiafiaga. Na le faatagaina i matou i totonu sei iloga e faia le malologa! A o ou faalogologo i le musika mai le faitotoa, na le mafai ona taofia o’u loimata.

Masalo na iloa mai e se tasi o faasino nofoa lo’u naunau tele ma filifili ai e ave i matou i totonu. Na fai mai o ia matou te tutu i tua seia oo i le taimi o le malologa ina ia aua nei o matou faalavelave i pesepesega. Na ia tatalaina lemu le faitotoa, ma matou o atu lemu i totonu.

O le savavali atu i le potu tele na pei lava o le savavali atu i le lagi. O le lagona o le filemu ma le olioli na faagaeetia ai au. Ae peitai, e le i umi, ae matou iloaina le faliu mai o ulu o tagata, tusitusi mai o latou lima ma sioa mai ia i matou. Na matou ulufale lemu uma atu lava i totonu ma e matou te le iloa le mea na matou faia ua tosina mai ai ia i matou. I le taimi lava na amata ai le malologa, na maua ai o matou nofoa.

Ina ua faaauau pesepesega faalelotu, na faatumulia lo’u agaga e le musika. Na ou tagi i le taimi o le tali o le “Aleluia” ma ina ua peseina e le vaega a le usu le “Ou te Iloa o loo Soifua Lo’u Faaola.” Na lagonaina foi e faifeautalai na i ou autafa le mana o le musika ma sa taufai tofu ma solosolo. O lea aafiaga o se mea o le a matou manatua pea. Ae o le taimi na mae’a ai le faafiafiaga, na faatoa oo mai ai lagona e manatua pea.

Ao matou agai ese mai le fale faafiafia, sa taumusumusu ma tusitusi mai pea lima o tagata, ae leai se tasi na fai mai se tala vagana ai ina ua matou oo i fafo. Na sau se tamaloa ma fai mai, “O outou na! O outou na!”

Na matou faatali uma mo se faamalamalamaga.

“Ao faia le vaega muamua o le faafiafiaga, na matou faalogonaina se suiga i totonu o le potu—o se faalagoga malosi o loo i ai Keriso iina,” o le tala lea a le tamaloa. “O lea na matou faliu atu ai po o le a le mafuaaga o le suiga. Ina ua matou vaai atu i tua o le potu faafiafia, na matou vaaia tagata e toafitu na susulu e pei o ni agelu. Ina ua outou o mai i totonu o le potu, na outou aumaia le Agaga Paia. Na outou i ai iina e fai ma sui o Keriso; o outou o agelu.”

Ao ia talanoa mai, na ou vaai ifo i la’u pine faifeautalai ma faitau mataitusi matamata tetele i lalo ifo o lo’u igoa: “O Le Ekalesia a Iesu Keriso o le Au Paia o Aso e Gata Ai.” Na matua faamaualaloina au i lena taimi i le avea o se sui o le Mesia ma na mafai ona molimau atu lemu ia te Ia i lena po i luma o le faitau afe o tagata.