Pese faamoe Pepe mo Timoteo

Ou te manatuaina upu taufaamatau a la’u faatosaga: “Ou te manatu e i ai ni nai mea e faaletonu.” I le taimi lava lena, na vave a ona faatumulia le potu faafanau i le tau faamanavaina o la’u pepe fou o loo i ai i se tulaga matautia.

Sa ou oo muamua i ni vaaiga faapea i le tele o taimi, ae o se vaaiga mai le isi itu, i le avea ai ma se tamaitai tausimai. O au sa tatau ona taufaaolaina le pepe fou. Ae o le taimi nei ua avea au ma le tina o loo aapa atu i le faitotoa o le pusa tioata ina ia pa’i atu i le lima o la’u tama, ao faatali le vaega o fela’ua’iga e ave o ia i le isi falemai.

O le taeao na sosoo ai na ou maua ai se telefoni mai le potu o pepe fou tigaina (PPFT), lea o loo i ai lo’u toalua, o Anitelea, o loo saofai ai ae siomia e fomai, ao latou faamatalaina le taotoga o le a manaomia vave lava e Timoteo e aveesea ai ni fula lapopoa mai lona manava.

Sa ou piimau i le faamoemoe o le a malosi le ma tama i le taotoga ma ola i se olaga malosi, ma le fiafia. Sa ou vaai faalemafaufau ia te ia o se tamaitiiti veveni e i ai se maila manaia, o se faamanatu o se faate’i puupuu lea na ia aumaia i ona matua.

O le tolu vaiaso mulimuli ane i totonu o lena lava potu fono o le falemai, na taumafai ai se fomai faapitoa o neura e faamatala mai le tulaga lē atoatoa o le faiai o le ma tama ma oo ai ina tuai lona mafaufau, faigata ona tautala, ma iu ai lava ina maua i le ma’ilili.

O ni nai aso mulimuli ane, i lena lava potu, na fai mai ai le fomai faapitoa e vaaia pepe fou, “E le mafai ona ou mafaufau e alu Timoteo i le fale e aunoa ma se faagaau e fafaga ai.” O le ma pepe sa tolu pauna ma e laitiiti lava (1.4 kk) ua mama atu nai lo le taimi na fanau mai ai, ua samasama, ma ua tauau lava ina le toe tei i se togafiti. Pe a tuu atu i ai se fagu, sa matua vaivai lava lana mimiti, ma e laoa ai.

O faamoemoega mo le ma pepe na foliga mai ua faaitiitia i le leai. Ua tanumia au i lalo e lo’u lalolagi. Na ou fesiligia le folafolaga a le Alii o le a Ia le faatagaina lava se tofotofoga e sili atu i le mea e mafaia e se tasi ona tauave. Na ou lagona le tanumiaina o au faaletino e lenei avega, faalemafaufau, ma le faaleagaga. I taimi uumi i le falemai, sa ou moomoo e fia faatasi i la’u fanau matutua e toalua ma faaauau lo matou olaga toafilemu. Pe a ou i ai i le fale, e faatumuina au i le popole i le tulaga o la’u pepe ma, o le mea moni lava, na ou mafaufau i le amata faataumaoia o o matou olaga.

I lo’u tulaga sili ona maualalo na ou augani atu ai i le Alii, ma faailoa atu ia te Ia auala matagofie uma lava o le a ou auauna atu ai ia te Ia pe afai o le a Ia toe avea Timoteo, tuu au e faavauvau i lona maliu, ma faatagaina au e faaauau lo’u olaga. So o se isi lava mea na sili atu ona manino lo’u le mafai ona tauaveina.

Ao tutupu nei mea uma, sa amata la’u lava vavega. O le toatele o tagata o le matou uarota, faatasi ai ma nai tagata o aiga ma uo, na anapopogi ma tatalo mo lo matou aiga. Ina ua ou ala ae i luga i le taeao o se tasi Aso Sa, na ou mauaina se uunaiga malosi lava o le a tupu se mea maoae i lena aso e avea o se taunuuga o anapogi ma tatalo. E moni, sa ou faamoemoe, ina ia faafuasei lava ona mataalia Timoteo ma tupu se vavega e amata ai ona ’ai. Ina ua ou taunuu atu i le potu o pepe fou tigaina (PPFT) sa tumau pea le le tei mai o Timoteo e pei o le taimi muamua, ma sa leai sona fiafia i le fagu susu. O le tulaga masani lava, sa ou faanoanoa, ae peitai ao ou siiina o ia, na oo mai ia te au se lagona malosi lava o le a LELEI mea uma. Sa ou lei iloa po o le a le uiga o le “LELEI”, ae sa leai sou masalosalo ua pule le Alii ma o loo silafia lo matou aiga.

I ni nai vaiaso mulimuli ane na ma o atu ai ma lo’u tina i le falemai. I lena potu filemu, taupogipogi, na opoina ai e lo’u tina lau tamai pepe vaivai i lona fatafata ma luelue o ia ao ia usuina le pese faamoe pepe o le Kerisimasi:

Na ou iloa o le a oo mai le filemu e ala mai lo’u Faaola, o Le na afio mai i le lalolagi lenei e aumai le filemu ma le fiafia faavavau mo i tatou taitoatasi. E mautinoa lava o le a Ia tausia lana pele laitiiti lenei ma siitiaina i matou o e ua filifilia e tausia o ia.

I ni nai vaiaso mulimuli ane na siitia atu ai Timoteo i le falemai o pepe, lea o loo ou faigaluega ai, mo le vaaiga faapitoa. O iina na ia aoao ai faavavega e ‘ai. Ma na ou toe lagonaina ai foi se faalogoga matautia o le a LELEI mea uma. Ma e ui lava na faasolo ina manuia o ia i le tele lava o itu, ae ou te lei iloaina lava le uiga o lena mea. Ae na ou mauaina lava se faamafanafanaga e faatasi ma au talu mai lena taimi. Ma soo se taimi lava ou te maua ai se mea e tatau ona ou popole ai, e ufitia au e lena lagona, ma e tutusa lava le savali: “Aua le popole. O le a LELEI mea uma. Tau lava o le fiafia ia te ia.”

O lenei vaitau o le Kerisimasi ua liliu atu ai ou manatu i meaalofa matagofie ua tuuina mai e le Faaola ia i tatou. Ua Ia faatagaina i tatou i le tele o auala ina ia maua le filemu i lenei lalolagi. O se tasi o meaalofa sili ona matagofie o le filemu o le avanoa lea tatou te faia ai mea uma i le agaga o le tatalo ma tuu atu ia te Ia o tatou faanoanoaga.

I le tuuina atu o lo tatou faatuatua i le Alii, ua mafai ai ona tatou tuuina atu ia te Ia o tatou popolega, ma Ia siitiaina i tatou, i le tuuina mai o meaalofa faapitoa e fesoasoani ia i tatou—e masani lava e ala mai isi tagata. Mo au o nei meaalofa na oo mai i se tulaga o tausitama mo lau fanau matutua e toalua, meaai mai tagata o le uarota, tausimai ma fomai lelei, ma le lagolago alofa mai o aiga ma uo. Ae peitai, o le meaalofa sili ona mamana, o le filemu lea na tuuina mai e le Tama Faalelagi ina ua tauaveina e Lona Alo ou faanoanoaga ma popolega. Ona o Ia, ua ou saoloto ai e alofa ma fiafia i la’u pepe o Timoteo ma faamanatuina tagata uma ma faamanuiaga ua tuuina mai i lo’u ala ona o lona olaga faapitoa.