O Le Mana o Afiafi Faaleaiga

E i ai a ma molimau maoae ma lo’u toalua, o Luiz Antonio, i le mana o afiafi faaleaiga ma lona malosi e faamalosia atili o tatou aiga i le talalelei. E lei faigofie lava lenei taumafaiga i taimi uma, ae i le aluga o taimi ua i ai se eseesega tele lava ua faia mo ma’ua ma le ma fanau e toafa.

O se tasi o mea e sili ona taua na tupu i le afiafi faaleaiga o le taimi lea na sauni ai le ma tama tama, o Renan, e papatiso. Na ofo mai le ma fanau teine matutua e toalua, o Cynthia ma Lilian, e faiaoga mo le masina ao loma lona aso fanau lona valu. Ma te fiafia tele ma lo’u toalua e vaavaai atu ao la aoaoina le uiga ma le faamoemoega o le papatisoga—o lesona lava ia na ma aoaoina ai i laua a o sauni mo o la papatisoga. E fa tausaga mulimuli ane na faia ai foi e Renan le faataitaiga a ona tuafafine matutua ma aoao atu lesona e uiga i le papatisoga i lona tuafafine laitiiti o Ellen.

Na faaauau pea ona faamanuiaina e afiafi faaleaiga i maua ma le ma fanau ao latou feagai ma luitau o o latou tausaga talavou. Na fesoasoani e faamalolosia a latou molimau ma tumau faamaoni ai i le talalelei. O le taimi nei ua maea le misiona a le ma tama tama, ma ua faaipoipo le ma fanau teine i le malumalu ma ua i ai a latou lava fanau.

O le ma molimau, o afiafi faaleaiga o se tasi lea o polokalama sili i le Ekalesia. Ma te iloa o le mulimuli i taitaiga faaperofeta ina ia faia i taimi uma afiafi faaleaiga ua aumaia ai ni faamanuiaga sili i o matou olaga, ma e ma te iloa e mafai foi ona aumaia faamanuiaga i soo se tasi e mulimuli i lena taitaiga. Ma te ioeina le manaomia o le tele o galuega ma fuafuaga, ae peitai o faamanuiaga na matou maua o le faavavau o le a taua ai minute uma o na taumafaiga.