O Le Meaalofa

O se tasi o pese o le Kerisimasi ou te fiafia lava i ai o le “For unto Us a Child Is Born” mai le Messiah a Handel. O se faamanatu i le uiga tonu o le Kerisimasi. E masani ona ou mafaufau po o le a se faalogoga a Maria ina ua ta’u i ai e le agelu o Kaperielu, “Si o’u alofa ia te oe le ua alofaina, ua ia te oe le Alii: amuia oe i fafine” (Luka 1:28).

Na atuatuvale Maria ona o lenei mea, ma na faaauau le faapea atu o le agelu:

“Maria e, aua e te fefe: aua ua alofaina mai oe e le Atua.

“Faauta foi, o le a to oe, ma e fanauina se tama tane, e te faaigoa ia te ia o Iesu.

“E sili o ia, e ta’ua foi o le Alo o le Silisili ese: e foai atu e le Alii o le Atua ia te ia le nofoaiga a Tavita lona tama:

“E fai o ia ma tupu i le aiga o Iakopo e faavavau; o lona malo foi e leai sona gataaga” (Luka 1:30–33).

Oka se aafiaga ina a ofoofogia! O le tama na folafolaina ia Maria o le Alo lava e Toatasi Na Fanaua e le Tama Faalelagi i la le tino. Na filifilia o ia e aumaia i lenei lalolagi se meaalofa sili o meaalofa uma: o lo tatou Faaola, o Iesu Keriso.

Na tuuina mai e le Tama Faalelagi lenei meaalofa ia i tatou uma, laiti pe matutua, mauoa pe matitiva. Tatou te le i tau manaomia ona sailia i faleoloa. Tatou te le i faaaluina ai se pene apa se tasi. E le i afifi maia i se pepa iila afifi meaalofa. O le meaalofa sili ona pele o meaalofa uma na aui i le ie ma faataoto i le faatanoa vao. Na auina mai ia i tatou uma ma le alofa mai lo tatou Tama Faalelagi.