Seksen 44
Revelesen we Lod i givim long Profet Josef Smit mo Sidni Rigdon, long Ketlan, Ohaeo, long las pat blong Febwari 1831. Blong obei long wanem we revelesen ia i talem se i mas hapen, Jos i putum taem blong wan konfrens we bae oli holem long stat blong nekis manis blong Jun.
1–3, Ol elda oli mas kam tugeta long wan konfrens; 4–6, Oli mas oganaesem olgeta folem ol loa blong kantri mo oli mas kea long olgeta we oli pua.
1 Luk, olsem ia nao Lod i talem long yufala, ol wokman blong mi, se long mi, i nid blong ol elda blong jos blong mi oli mas kam tugeta, long Is mo long Wes, mo long Not mo long Saot, tru long leta o long sam nara wei.
2 Mo bae i kam blong hapen se, folem hamas oli fetful, mo yusum fet we oli gat long mi, bambae mi kapsaetem Spirit blong mi long olgeta long dei ia we bae oli kam tugeta.
3 Mo bae i kam blong hapen se bambae oli mas go aot, i go long ol eria we oli stap raonabaot, mo bae oli prijim fasin blong sakem sin long ol pipol.
4 Mo plante bambae oli jenisim laef blong olgeta, mekem se bambae yufala i kasem paoa blong oganaesem yufala folem ol loa blong man;
5 Blong mekem se ol enemi blong yufala bae oli no gat paoa ova long yufala; blong Lod i kipim yufala i stap gud long saed blong evri samting; blong yufala i save obei ol loa blong mi; blong evri rop i brok, ol rop ia we enemi i wantem prapa spolem gud ol pipol blong mi wetem.
6 Luk, mi talem long yufala, se yufala i mas visitim olgeta we oli pua mo olgeta we oli stap long nid mo blong yufala i givim han long olgeta, blong olgeta oli stap gud kasem taem we evri samting i hapen folem loa blong mi we yufala i kasem. Amen.