Naʻe Lea ʻa e Laumālié ʻIate Au

ʻI heʻeku maʻu hoku uiuiʻi ke ngāue ʻi he Misiona Falanisē Tulusí, naʻá ku fiefia ke ngāue ʻi ha fonua muli mo ako ai ha lea fakafonua foʻou. Neongo ne teʻeki ai ke u ako lea faka-Falanisē kimuʻa, ka naʻá ku falala pē ʻe faingofua haʻaku ako ʻa e leá.

Naʻe tāpuakiʻi au ʻe heʻeku palesiteni fakasiteikí ʻaki ʻa e meʻafoaki ʻo e ngaahi lea kehekehé ʻi he taimi naʻá ne vaheʻi ai au ke u hoko ko ha faifekaú. Ne ʻai ʻe he tāpuaki ko ʻení ke toe lahi ange ʻeku falala ʻe vave pē ʻeku ako ʻa e lea faka-Falaniseé.

ʻI heʻeku aʻu atu ki he senitā akoʻanga fakafaifekau ʻi Polovo ʻi ʻIutaá, ne u vēkeveke ke fai mou kamata, ka naʻe fakatupu loto fakatōkilalo hoku taimi ʻi he MTC. Ne u ongoʻi lōmekina pea ne u fāinga mo ia he ʻaho kotoa pē. ʻI he taimi ne u mavahe ai mei he MTC, ne u ongoʻi kuo ʻi ai pē ʻeku kiʻi fakalakalaka he lea faka-Falaniseé. Ne u fifili pe te u maʻu koā ʻa fē ʻa e meʻafoaki ʻo e ngaahi lea kehekehé.

Ko e ʻuluaki feituʻu naʻe vahe au ki ai ʻi he malaʻe ngāue fakafaifekaú ko ha kiʻi kolo ʻi he feituʻu fakatonga ʻo Falaniseé. Hili pē ha ngaahi ʻaho siʻi ʻeku aʻu atú, naʻá ma ō mo hoku hoá ʻi ha hoʻatā ʻe taha ʻo uiui. Naʻe ʻikai ke u faʻa lea ʻi heʻema talanoa mo e kakaí—naʻe ʻikai ke mei mahino kiate au ʻenau leá, pea naʻe ʻikai mahino kiate kinautolu ʻeku leá.

Naʻá ma ō mai ki ha fefine pea kamata fakamatala ki ai hoku hoá ʻo kau ki he Siasí. Naʻe kiʻi fanongo taimi siʻi ʻa e fefiné peá ne tafoki fakafokifā hake ʻo pehē mai kiate au, “Ko e hā leva hoʻo fakamatala ʻaʻaú?”

Ne u haka holo he feinga ke manatuʻi ha faʻahinga meʻa naʻá ku ako. Ne tete hoku leʻó ʻi heʻeku fai ha kiʻi fakamoʻoni faingofua pē kau ki he Tamai Hēvaní mo e Tohi ʻa Molomoná. ʻI heʻeku fai ʻení, naʻe fakamoʻoniʻi kiate au ʻe he Laumālié naʻe moʻoni ʻa e meʻa naʻá ku lea ʻakí. ʻOku ʻikai te u ʻilo pe naʻe ongoʻi ʻe he fefiné ha meʻa, ka naʻá ne malimali, tafoki ki hoku hoá, ʻo kole ange ke hoko atu ʻene pōpoakí.

Naʻe akoʻi kiate au ʻe he meʻa ko ʻeni naʻe hokó ha lēsoni mahuʻinga. Ne u ʻiloʻi neongo naʻe ʻikai ke u poto lelei he lea faka-Falaniseé, ka naʻe lava ke lea ʻa e Laumālié ʻiate au. Ne u ʻiloʻi mahalo ko e tāpuaki ko ia ne u maʻu mei heʻeku palesiteni fakasiteikí ko ha tāpuaki ia ke lava ʻo lea ʻaki e lea ʻo e Laumālié.

Naʻe akonaki ʻa Palesiteni Tōmasi S. Monisoni ʻo pehē: “ʻOku ʻi ai ʻa e lea ʻe taha … ʻoku maheni mo e faifekau kotoa pē—ʻa ia ko e lea ʻo e Laumālié. ʻOku ʻikai ako ia mei ha ngaahi tohi naʻe faʻu ʻe he kau tangata potó, pe maʻu mei he lau tohí pe ako maʻulotó. ʻOku [maʻu] ʻa e lea ʻo e Laumālié ʻe he taha ko ē ʻokú ne fekumi ʻaki hono lotó kotoa ke ʻiloʻi e ʻOtuá mo tauhi ʻEne ngaahi fekau fakalangí. ʻOku lava ʻe heʻete poto he leá ni ʻo fakaʻatā kita ke te holoki e ʻā vahevahé, ikunaʻi e ngaahi faingataʻá, mo ueʻi e loto ʻo e tangatá” (“ʻOku Foaki Moʻui ʻe he Laumālié,” Liahona, Sune 1997, 4).

Naʻe kei takiekina pē au ʻe he meʻa ko ʻeni naʻe hokó hili ia ha ngaahi taʻu lahi mei ai. ʻOku ʻikai kei fie maʻu ia ke u malanga ʻaki ʻa e ongoongoleleí ʻi he lea faka-Falaniseé, ka ʻoku ou fie maʻu e tokoni ʻa e Laumālié ʻi he taimi ʻoku kole mai ai ke u akoʻi ha lēsoni pe fai ha lea he lotú. ʻI he taimi ʻoku ou ongoʻi ai ʻoku faingataʻa ke u fakamatalaʻi e meʻa ʻoku ou ongoʻí, ʻoku ou ongoʻi fiemālie ʻi heʻeku manatuʻi ʻoku lava ke lea ʻa e Laumālié ki he loto ʻo e fānau kotoa ʻa e ʻOtuá.