Fakaului ki he Ongoongoleleí—mo Ngāue Fakafaifekau

Naʻá ku tupuʻi Siasi pea ne u palani maʻu pē ke u ngāue fakafaifekau. Ka ʻi he hokosia e taimi ke u ngāue fakafaifekau aí, ne u fakaʻamu ke ʻi ai ha faʻahinga meʻa mālohi ʻe hoko ʻo fakaului ai au hangē ko e ngaahi meʻa ʻoku fakamatalaʻi ʻe he kakaí fekauʻaki mo ʻenau kau ki he Siasí.

Naʻá ku ʻiloʻi ʻe fie maʻu ke fai ha ngaahi feilaulau ki he ngāue fakafaifekaú. Naʻe lelei ʻeku ngāué pea vahe lelei, pea ne u fakakaukau pe ʻe lava nai ke u toe maʻu ha ngāue lelei tatau mo ia ʻi haʻaku foki mai. Naʻá ku hohaʻa naʻa motuhia ʻeku akó peá u ʻalu mei hoku fāmilí mo e ngaahi kaungāmeʻá. Ka naʻá ku ʻiloʻi lelei pē ko e meʻa totonú ke u ngāue fakafaifekau, ko ia naʻe hokohoko atu pē ʻeku teuteú.

Ko e konga ʻo e teuteu ko iá ko ʻeku ʻalu mo e ongo ʻeletā ʻi hoku feituʻú ki heʻena ngaahi akoʻí. Ne mau akoʻi mo e ongo ʻeletaá ha tangata kau ki he Lea ʻo e Potó ʻi he efiafi ʻe taha, ka naʻe ʻikai ke ne fie tali ʻa e tefitoʻi moʻoní. ʻI heʻemau mavahe mei hono ʻapí, naʻe lava pē ke u tala naʻe loto foʻi e ongo ʻeletaá, peá u ongoʻi loto mamahi ai pē mo au.

Naʻe ʻikai ke u fakapapauʻi hono ʻuhinga ʻeku loto mamahí, he naʻe ʻikai ke u fuʻu ʻiloʻi lelei e tangata ko ʻení. Naʻá ku nofo pē ʻo fakakaukau ki ai, pea naʻá ku ʻiloʻi leva ne u maʻu e ngaahi ongo peheé he naʻá ku ongoʻi ʻa e Laumālié lolotonga e lēsoní. Naʻá ku loto mamahi hono taʻetali ʻe he tangatá ni e meʻa naʻá ne ʻomi ʻa e fiefia lahi kiate aú.

ʻI he fakakaukau ko iá ne u ʻiloʻi ai naʻe fakaului moʻoni au. Naʻá ku ʻiloʻi naʻe moʻoni ʻa e ongoongoleleí, pea naʻe ʻikai ke u faʻa tatali ke vahevahe atu ia. Naʻe taimi siʻi pē kuo ui au ke u ngāue ʻi he Misiona ʻĪtali Lomá.

Naʻe tāpuakiʻi lahi au ʻi he ngaahi feilaulau ko ia kuó u fakahoko ʻi he teuteu ki heʻeku ngāue fakafaifekaú. Ne u akoʻi ʻa e ongoongoleleí ki ha kakai lelei tokolahi, maʻu hoku ngaahi kaungāmeʻa mamae, peá u ako ʻa e lea faka-Pilitāniá. Ne kei maʻu hokohoko ai pē ʻa e ngaahi tāpuakí hili ʻeku foki ki ʻapí. Naʻá ku toe maʻu pē ʻeku ngāue kimuʻa heʻeku ngāue fakafaifekaú pea naʻa mo hoku tuʻunga fakangāué naʻe toe hiki hake.

Neongo ia, mahalo ko e tāpuaki maʻongoʻonga tahá ʻa e tupulaki ʻeku fakamoʻoni ki he ongoongoleleí. Naʻe ʻikai hano tatau ʻeku tupulaki fakalaumālié ʻi he vahaʻataimi naʻá ku ngāue fakafaifekau aí, pea te u fakamālō maʻu ai pē.