Naʻe Tāpuni e Temipalé!

Naʻe teu ʻema mali he temipalé ki he ʻaho 7 ʻo Siulai 2009—ʻa ia ko ha ʻaho ne ma hanganaki fiefia atu ki ai. Naʻá ma tupu hake pē ʻo ofi ki he Temipale ʻApā Naisīliá, pea naʻá ma fiefia ai he neongo ne ma hiki mei ai, ka ʻoku kei nofo pē he feituʻu ko iá homa ngaahi kaungāmeʻa tokolahi mo e kau mēmipa ʻo homa fāmilí ʻa ia ʻe lava ke ō mai ki he temipalé pe ki he kai fakafiefia ʻe faí.

Hili haʻama fononga ʻi ha houa ʻe ono pe lahi ange ai mei Lākosi mo fai e ngaahi teuteu fakaʻosi ki heʻema silá mo e kaí, naʻá ma aʻu mai ki ʻApā. Ka naʻe fakahā ange ʻi he ʻaho ʻe tolu kimuʻa he ʻaho naʻe teu ke fai ai ʻa e malí, ʻa hono tāpuni fakatuʻupakē e temipalé pea ʻe toki fakanongonongo mai ha taimi ʻe ava ai. Naʻe hohaʻa ʻema fakakaukaú peá ma puputuʻu. Naʻe ʻikai lava ʻe ha taha ʻo talamai pe ʻe fakaava ʻa fē, he naʻe tāpuni ia ko ha maveuveu ʻi he feituʻu ko iá. Naʻá ma loto mamahi peá ma tala ki homa ngaahi kaungāmeʻá mo e fāmilí kuo toloi ʻema silá, peá ma foki loto mamahi ki Lākosi ʻo ʻikai ke ma ʻiloʻi pe ko e fē ha ʻaho ʻe lava ke ma toe fakataimi-tēpileʻi ki ai ʻema sila he temipalé.

ʻI heʻema foki ki Lākosí, naʻá ma lotu fakamātoato ke toe fakaava ʻa e Temipale ʻApā Naisīliá. Ne ʻosi atu e uike mo e ʻikai pē ha ongoongo kau ki ha ʻaho ʻe fakaava ai. Naʻe hangē ʻa e uike ia ʻe taha ko ʻení ko ha taʻu ʻe taha kiate kimauá. Naʻá ma hanganaki atu ki hano fakahoko ʻema mali temipalé pea fakafiefiaʻi ia mo homa ngaahi kaungāmeʻá mo e fāmilí he vave tahá.

Ne ʻalu pē taimí mo e ʻikai pē ha ongoongo ki hano toe fakaava ʻo e temipalé, pea naʻá ma ongoʻi ke fakakaukauʻi ha faʻahinga tafaʻaki ange ʻe taha. Ko e Temipale ʻApā Naisīliá pē ʻa e temipale ʻi Naisīliá, ko ia ne ma ʻiloʻi kuo pau ke ma ō ki he Tempale ʻAkalā Kaná kapau ʻokú ma loto ke vave hano fakahoko ʻema silá. Kae meʻapangó ko e paʻanga lahi ʻe fakamole ki aí pea naʻe ʻikai ke ʻi ai haʻama paʻanga. Ka ne ma ʻosi palani maʻu pē ke ma mali he temipalé, pea naʻá ma ʻiloʻi ʻoku totonu ke hoko atu ʻema moʻuí.

Naʻá ma kole ha paʻanga mei homa fāmilí mo e ngaahi kaungāmeʻá, ʻai mo ʻema paasipoti fakavahaʻapuleʻanga, telefoni ki he Temipale ʻAkalā Kaná ʻo fakataimi-tēpileʻi ha ʻaho, pea totongi ʻema tikite puna ki Kaná.

Ne ma tūʻuta ʻi ʻAkalā he ʻaho 14 ʻo ʻAokosi 2009, pea ma ō ki he temipalé he ʻaho hono hokó. Ko e faisila pē ʻa e temipalé mo e ongo fakamoʻoní pea mo kimaua naʻe ʻi he loki silá. Naʻe ʻikai ke ʻi ai homa ngaahi kaungāmeʻá, ʻikai ke ʻi ai ha fāmili, pea naʻe ʻikai ke ʻi ai ha taha naʻá ma ʻiloʻi. Naʻá ma ʻi ha fonua naʻe ʻikai ke ma maheni ai, ʻi ha feituʻu mamaʻo mei homa ʻapí, ka naʻa ma ʻiloʻi naʻá ma ʻi he feituʻu totonú ʻo fai ʻa e meʻa totonú. ʻI he momeniti ko iá, ne ma ongoʻi ʻa e ngaahi mālohi ʻo ʻitānití pea toe mahino lelei ange kiate kimaua ʻa e ʻofa ʻa e Tamai Hēvaní ʻiate kimauá pea mo hono kotoa ʻo ʻEne fānaú.

Ko e meʻa fakamamahi ʻa e mālōlō hoku uaifí ʻi he 2010 hili ia ʻene fāʻeleʻi ʻema ʻuluaki pēpeé. ʻOku ou ʻofa lahi ki ai ka ʻoku fakafiemālieʻi au ʻe heʻeku ʻiloʻi kuó ma ʻosi sila ʻi he temipalé. ʻOku ou fakamālō taʻetūkua ko e ʻikai ke ma toloi ʻema mali temipalé ʻaki haʻama nofo ʻo tatali ki ha taimi ʻe toki faingamālie ai. Te u manatu ʻofa maʻu pē ki heʻema nofo malí pea ʻoku kau ia ha talanoa he ʻikai teitei ngalo ʻiate au.