ʻOku Fakafehokotaki ʻe he Ouau Silá ʻa e Ngaahi Fāmilí ke Taʻengata

ʻOku lava ke tau fai ha ngaahi fuakava toputapu (ngaahi palōmesi) mo e ʻOtuá ʻi he temipale māʻoniʻoní ʻi he mafai ʻo e lakanga fakataulaʻeikí lolotonga ʻetau ʻi he māmaní. ʻOku kau ʻi he ngaahi fuakava ko ʻení ʻa e faingamālie ke silaʻi ai ʻa e husepānití mo e uaifí (mali ki he taʻengatá) pea silaʻi mo ena fānaú kiate kinaua. ʻOku ʻuhinga leva ʻeni, kapau te tau tauhi ʻetau ngaahi fuakava mo e ʻEikí pea mo ʻetau fefuakavaʻakí, he ʻikai lava ke toe fakamāvae kitautolu ʻe he maté. Ko e ouau ko ʻeni ʻo e silá ko ha konga mahuʻinga ia ʻo e palani ʻa ʻetau Tamai Hēvaní ke tau nofo fakataha mo Ia ʻo taʻengatá. (Vakai, T&F 128:9–10; 132:19.)

Ko ʻetau fakahoko pē ʻa e ngaahi fuakava ʻo e temipalé maʻatautolú, ʻe lava leva ke tau tānaki mai hotau hisitōlia fakafāmilí pea fakahoko e ngaahi ouau fakatemipalé maʻa ʻetau ngaahi kui kuo pekiá. ʻE lava ke nau maʻu heni e ngaahi fuakava ʻo e temipalé (vakai,T&F 138:29–37).

Naʻe kikiteʻi e mālohi ʻo e lakanga fakataulaʻeikí ki hono silaʻi ʻo e ngaahi fāmilí ʻi he kuonga muʻá (vakai, Malakai 4:5–6) pea ʻi onopooni (vakai,T&F 2). Naʻe fakatou fakahā ʻe he ongo kikité “ʻe tō [ʻe he palōfita ko ʻIlaisiaá] ʻi he loto ʻo e fānaú ʻa e ngaahi talaʻofa naʻe fai ki he ngaahi tamaí, pea ʻe liliu ʻa e loto ʻo e fānaú ki heʻenau ngaahi tamaí” (T&F 2:2).

Naʻe fakahoko ʻa e talaʻofa ʻe toe foki mai ʻa ʻIlaisiaá ʻi he ʻaho 3 ʻo ʻEpeleli 1836, ʻi he Temipale foʻou ʻi Ketilani ne toki fakatapuí ʻi ʻOhaiō, USA, ʻi he hā mai ʻa ʻIlaisiā fakataha mo ha niʻihi kehe ʻo foaki ʻa e ngaahi kī ʻo e lakanga fakataulaʻeikí ki he Palōfita ko Siosefa Sāmitá (vakai,T&F 110:13–15).

ʻOku ʻi ai ha temipale ʻe 134 ʻoku lolotonga fakaʻaongaʻi he māmaní, ʻa ia ʻoku lava ke fai ai ʻe he Kāingalotu moʻui tāú ha ngaahi fuakava mo e ʻOtuá pea silaʻi ai kinautolu ko e ngaahi fāmili he taʻengatá. ʻE lava ke nau toe foki ʻo ngāue fakafofonga maʻa ʻenau ngaahi kui kuo pekiá, ʻo fakahoko ai ʻa e kikite ko ia ʻe liliu e loto ʻo e fānaú ki he ngaahi tamaí.

Kuo pau ke tau maʻu ʻa e ngaahi fuakava mo e ngaahi ouau pau kae lava ke tau foki ʻo nofo mo ʻetau Tamai Hēvaní:

1. ʻOku papitaiso pea hilifakinima kitautolu (vakai,Mātiu 3:16–17; Sione 3:5; 2 Nīfai 31:5–18).

2. ʻOku maʻu ʻe he houʻeiki tangatá ʻa e Lakanga Taulaʻeiki Faka-ʻĒloné pea toki maʻu mo e Lakanga Taulaʻeiki Faka-Melekisētekí kimui ai (vakai, T&F 128:11).

3. ʻOku tau fai ʻi he temipalé mo ha toe ngaahi fuakava ʻoku fekauʻaki mo e ʻenitaumení.

4. ʻOku sila (mali) ʻa e husepānití mo e uaifí ʻi he temipalé ki he nofo taimí mo hono kotoa ʻo e nofo taʻengatá.

5. Ko e fānau ko ia ʻoku fāʻeleʻi ki ha mātuʻa kuo nau ʻosi silá, ʻoku fāʻeleʻi kinautolu “ʻi he fuakavá.” ʻE lava ke sila ʻa e fānau ʻoku ʻikai fāʻeleʻi ʻi he fuakavá ki heʻenau mātuʻá.

6. ʻOku tau teuteuʻi leva e ngaahi hingoa ʻo ʻetau ngaahi kuí ki he ngāue fakatemipalé pea ʻoku fakahoko maʻanautolu ʻi he temipalé ʻa e ngaahi ouau ʻoku fie maʻú (vakai,1 Kolinitō 15:29; T&F 128:15–16, 24).