Katingalahan nga Grasya

“Sa among mga miting sa Simbahan, dili kami kanunay maghisgot mahitungod sa grasya,” miingon ang akong magtutudlo sa relihiyon sa Brigham Young University, “apan kami, isip mga miyembro sa Ang Simbahan ni Jesukristo sa mga Santos sa Ulahing mga Adlaw mituo, gayud sa grasya.”

Sa pagkatinuod, wala koy mahinumduman nga mga leksyon sa Young Women o Sunday School kabahin sa grasya, apan ang akong mga hunahuna namalik sa paghandom sa choir sa akong pagka-high school ug nanganta og “Amazing Grace.”

“Ang grasya mao ang gahum sa Dios gumikan sa Pag-ula ni Jesukristo,” mipasabut ang akong magtutudlo. “Akong gibahin ang grasya ngadto sa upat ka bahin: pagkabanhaw, pagtubos, pag-ayo, ug paglig-on.” Gipadayon niya ang pagpasabut sa matag gahum, apan ang akong hunahuna namalik na usab ngadto sa akong mga panumduman.

Mao gihapon kadto nga choir sa high school ang mibiyahi sa California, USA, aron mosangka sa usa ka kompetisyon sa musika. Nagkasakit ko sa hapit na ang paglarga, ug ang sakit nakong tutunlan nagpasabut nga dili ko mahimong mokanta uban sa akong choir ngadto sa kompetisyon—o kon mokanta man ko, dili maayo ang akong tingog, inubanan sa kasakit. Mihangyo ko og panalangin sa priesthood sa akong amahan ug ang sunod nga adlaw akong gigahin sa pag-ampo aron maayo.

Tingali adtong panahona dili hingpit ang akong pagkasabut, samtang mikanta ko sa “Amazing Grace” gamit ang hingpit nga naayo nga tutunlan didto sa festival, nga ako nagkanta kabahin sa mao gayud nga gahum nga miayo kanako sa miagi lang gayud nga adlaw. Ang Pag-ula sa Manluluwas mipanalangin kanako nianang adlawa; Ang iyang grasya mao ang tinubdan sa akong pagkaayo.

“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan” (Alma 7:11).

Human sa high school, sama sa daghang mga freshmen, nabug-atan ko sa akong kurso ug sa mga hagit sa dungan-dungan nga pagkalayo sa panimalay apan may kauban usab nga lima sa kwarto.

Niini nga panahon nakakat-on ko sa pagsabut sa makalig-on ug makaabag nga gahum sa grasya ni Kristo. Akong gigahin ang akong mga adlaw sa pagtrabaho ug pagtuon, apan ako misalig sa inadlaw nga mga pag-ampo diin nangamuyo ko sa Langitnong Amahan alang sa kasarang sa paghuman sa gikinahanglan nga mga tahas. Samtang nagpadayon ang tuig nga ting-eskwela, akong nadiskubrihan sa akong kalipay nga uban sa makalig-on ug makaabag nga gahum sa Pag-ula ni Kristo, dili lamang kay makalihok ko og maayo apan usab sa walay kalisud.

“Mahimo ko ang tanang butang pinaagi kaniya nga nagapalig-on kanako” (Mga Taga-Filipos 4:13).

Bisan og gikinahanglan pa nakong mosinati sa duha pa ka aspeto sa Iyang grasya—sa pagkabanhaw ug sa kahingpitan sa pagtubos—sa gihapon misalig ako sa Pag-ula ni Jesukristo sa matag adlaw. Ang grasya, ang gahum sa Dios gikan sa Pag-ula ni Jesukristo, miayo kanako ug milig-on kanako. Samtang naningkamot ko nga makasunod sa mga sugo sa Dios ug makatuman sa Iyang kabubut-on, nakadawat ko og langitnong panabang nga lapaw kaayo sa kaugalingon nakong kasarang.

“Pinaagi sa grasya kami maluwas, human sa tanan nga atong mabuhat” (2 Nephi 25:23).