Paglaum diha sa Pag-ula

Nakahimamat ako og mga tawo nga nawad-an na gayud sa paglaum. Ilang gibati nga ang paghinulsol dili alang kanila ug walay kapasayloan alang kanila. Sila wala makasabut sa makalimpyo nga gahum sa Pag-ula. O, kon sila nakasabut, wala gayud nila masabti ang kahulugan sa pag-antus ni Jesukristo sa Getsemani ug sa krus. Alang kanato ang pagkawala sa paglaum alang sa paglimpyo sa atong kinabuhi mao ang pagsalikway sa kalalum, gahum, ug kinutuban sa Iyang pag-antus alang kanato.

Mga pipila ka tuig ang milabay aduna koy buluhaton samtang anaa sa komperensya sa stake sa pag-interbyu sa 21 anyos nga lalaki sa pagtino sa iyang katakus sa pagserbisyo og misyon. Karon, sa kasagaran ang mga General Authority dili mointerbyu og potensyal nga mga misyonaryo. Mao nga kini talagsaon. Samtang nagbasa ko sa background sa mga rason alang sa interbyu, nasagmuyo ko. Kini nga batan-ong lalaki nakahimo og grabeng kalapasan. Natingala ko nganong gihangyo ko nga mointerbyu sa usa ka tawo nga ingon niini ang background, nakahukom nga talagsaon kaayo alang kanako ang pagrekomendar og pagtugot kaniya isip misyonaryo.

Pagkahuman sa Sabado sa gabii nga sesyon sa komperensya, miadto ko sa opisina sa presidente sa stake para sa interbyu. Samtang nagpaabut ko, usa ka gwapo nga batan-ong lalaki nga may talagsaong panagway ang miduol. Naghunahuna kon unsaon nako sa pagrason nga dili ko makig-istorya kaniya tungod kay nakita nako nga gusto niyang makig-istorya kanako ug ako adunay sabut uban sa usa ka problemadong lalaki. Dayon iyang gipaila-ila ang iyang kaugalingon. Siya mao ang batan-ong lalaki nga akong interbyuhunon.

Sa pagkapribado sa opisina, nangutana lang ko og usa ra ka pangutana: “Nganong mointerbyu man ko nimo?”

Iyang gisaysay ang iyang kaagi. Sa dihang natapos na siya, siya misugod sa pagpasabut sa mga lakang ug personal nga pag-antus nga iyang giagian. Siya naghigsut kabahin sa Pag-ula—ang mahangturong gahum sa Pag-ula. Siya mipamatuod ug mipahayag sa iyang gugma alang sa Manluluwas. Ug dayon siya miingon, “Nagtuo ko nga ang personal nga pag-antus sa Manluluwas sa Getsemani ug sa Iyang sakripisyo diha sa krus may igong gahum sa pagluwas gani sa tawo nga sama nako.”

Natandog sa iyang pagkamapainubsanon ug sa Espiritu, miingon ko, “Morekomendar ko nimo sa pagserbisyo isip usa ka representante ni Jesukristo.” Ug dayon miingon ko, “Usa lang ka butang ang akong hangyoon kanimo. Gusto ko nga mahimo kang pinakamaayo nga misyonaryo sa tibuok Simbahan. Kana lang.”

Tulo o upat ka bulan ang milabay, si Sister Edgley ug ako namulong sa missionary training center. Sa pagtapos sa debosyonal, nakighimamat ko sa mga misyonaryo sa dihang nakakita ko og usa ka batan-ong lalaki nga pamilyar ang dagway.

Siya nangutana, “Nakahinumdom ka kanako?”

Ingon og naulaw, miingon ko, “Pasayloa ko. Morag kaila gyud ko nimo, dili lang gyud ko kahinumdom.”

Dayon siya miingon, “Tuguti ko sa pagsulti kon si kinsa ako. Ako mao ang pinakamaayo nga misyonaryo sa missionary training center.” Ug mituo ko kaniya.

Ang paglaum niining batan-ong lalaki wala lamang nakabase sa kahibalo ug pagpamatuod sa Pag-ula apan nakabase kini sa paghimong personal niini nga gasa. Siya nakasabut nga kini personal alang kaniya! Siya nasayud sa gahum sa Pag-ula ug sa paglaum nga mahatag niini kon ang tanan ingon og nawala na o wala nay paglaum.