Ide për Mbrëmje Familjare në Shtëpi
Ky numër përmban artikuj dhe aktivitete që mund të përdoren për mbrëmjen familjare në shtëpi. Në vijim janë dy shembuj.
“Bekimet e Seminarit”, faqja 20: Shqyrtojini artikujt para kohe dhe vendosni se si ta zbatoni më së miri mesazhin me familjen tuaj. Nëse keni adoleshentë në seminar, filloni duke i pyetur përse seminari është i rëndësishëm për ta. Më pas lexoni pjesën e titulluar “Marrja e Bekimeve të Premtuara”. Nxitini fëmijët e vegjël që të përgatiten për të marrë pjesë në seminar kur të arrijnë moshën e duhur. Nëse nuk keni të rinj të moshës së seminarit, ju mund të dëshironi ta lexoni artikullin dhe më pas të diskutoni mbi rëndësinë e seminarit për rininë e sotme.
“Të Gjithë e Njohin Bllekun”, faqja 42: Mendoni për të kënduar “Bëj Ç’Ësht’ e Drejt’” (Himne dhe Këngë të Fëmijëve, nr. 34) si himn hapjeje. Lexoni ose përmblidhni historinë rreth Bllekut. Kërkojuni pjesëtarëve të familjes të tregojnë një përvojë kur u duhej të merrnin një vendim të vështirë midis rrugëve të ndryshme dhe çfarë pasojash rrodhën nga vendimi që ata morën. Mbylleni duke lexuar citatin nga Presidenti Tomas S. Monson.
E Thjeshtë, e Qetë dhe e Paharrueshme
Ishte një mbrëmje e paharrueshme familjare me dy vajzat tona të vogla, Anxhelika, 6 vjeç dhe Bethani, 4 vjeç. Unë edhe bashkëshorti im ishim kruspullosur në karriget tona, të lodhur dhe duke mos ditur nga t’ia fillonim. Kështu që vajzat tona morën situatën në dorë dhe përgatitën grafikun e caktimit të detyrave për mbrëmjen familjare, duke na dhënë secilit një detyrë. Detyra e bashkëshortit tim ishte të drejtonte, Bethani u caktua për muzikën, unë kisha aktivitetet dhe Anxhelika duhet të jepte mësimin.
Bethani zgjodhi këngën “I Love to See the Temple” [“Unë e Dua Tempullin”] (Children’s Songbook, 95), dhe e kënduam atë së bashku. Babai bëri lutjen e hapjes. Më pas Anxhelika mori botimin më të fundit të revistës Liahona dhe zgjodhi një artikull në pjesën për fëmijët. Ajo po mëson të lexojë në shkollë, kështu që ajo na e lexoi artikullin. Ndjenja në shtëpinë tonë ishte një ndjenjë qetësie. Shpirti dëshmoi se ajo që ajo po lexonte ishte e vërtetë.
Ne luajtëm disa lojëra së bashku dhe unë bëra lutjen e mbylljes. Teksa po lutesha, nuk reshtja së falënderuari Atin tonë Qiellor për Shpirtin e dashurinë e Tij, dhe gjithashtu që na kishte bekuar shtëpinë me këta shpirtra të vegjël. Unë dhe bashkëshorti im e dimë se përgjegjësia jonë është të kujdesemi për to dhe t’u mësojmë atyre ungjillin. Mbajtja e mbrëmjes familjare është pjesë e asaj përgjegjësie të shenjtë.
Silvi Pusin, Reunion