Kau ʻi he Konifelenisi Lahi hono 182 Hano Fetongi ʻo e Kau Taki ʻi he Kau Fitungofulú, Kau Pīsopelikí, mo e Fineʻofá

Naʻe pehē ʻe Palesiteni Tōmasi S. Monisoni, ko e Palesiteni ʻo e Siasí, ʻi he ʻuluaki fakataha ʻo e Konifelenisi Lahi Fakataʻu hono 182 ʻi he ʻaho 31 ʻo Māʻasi 2012, “He ʻikai lava ke tau fakataha kotoa mai ʻi ha fale pē ʻe taha, ka ʻoku tau malava he taimí ni ke tau kau mai ki he konifelenisí ʻi he founga fakaofo ko e televīsoné, letioó, keipoló, satelaité pea mo e ʻInitanetí—kae pehē ki ha ngaahi meʻangāue ʻoku toʻotoʻo pē. ʻOku tau fakataha mai ko e kakai pē ʻe taha, ʻoku tau lea ʻaki ha ngaahi lea fakafonua kehekehe mo nofo ʻi ha ngaahi fonua lahi ka ʻoku tau taha kotoa pē ʻi he tuí, taha ʻi he tokāteliné pea taha ʻetau taumuʻá.”

Naʻe moʻoni ʻa e fakamatala ko iá ʻi he kakai ʻe toko 100,000 tupu naʻe kau atu ki he ngaahi fakataha ʻo e konifelenisi lahí ʻi he Senitā Konifelenisí ʻi Sōleki Siti ʻi ʻIutā, USA he ʻaho 31 ʻo Māʻasí mo e ʻaho 1 ʻo ʻEpelelí—kae ʻumaʻā ʻa e toko lauimiliona tupu naʻa nau mamata pe fanongo mai ki hono fakamafola ʻi he TV, letioó, satelaité, mo e ʻInitanetí. ʻI he ngaahi fakamafola hangatonu pe toloí, ʻoku lava ai pē ʻa e kāingalotu he funga ʻo e māmaní mo ha niʻihi kehe ke kau mai ʻi ha ngaahi lea fakafonua ʻe 94.

Kae kimuʻa pea toki kamata ʻa e konifelenisi lahí, naʻe ʻosi fakaʻaongaʻi ʻe ha kāingalotu tokolahi ia ʻa e ngaahi tekinolosia fakaonopooni ko ʻení ke fakaafeʻi ha niʻihi ke nau kau atu ʻi he konifelenisí. Ko e fanga kiʻi meʻa, fuka, mo e fakatātā naʻe fakafeʻiloaki ʻi Māʻasí, ʻa ia ʻoku maʻu ʻi ha ngaahi lea fakafonua kehekehé, ʻe kei fakaʻaongaʻi pē ʻi he konga ki hono Fakaafeʻi ʻo e Niʻihi Kehé (Invite Others) ʻi he gc.lds.org.

Naʻe fakahoko ha ngaahi liliu ʻi he kau taki ʻo e Siasí lolotonga e fakataha ʻo e hoʻatā Tokonakí; ne kau ʻi he niʻihi naʻe tukuangé ʻa e kau mēmipa ʻo e Kau Pīsopeliki Pulé mo e kau palesitenisī lahi ʻo e Fineʻofá. Naʻe tukuange ʻa ʻEletā Sitīveni E. Sinou mei he Kau Palesitenisī ʻo e Kau Fitungofulú; naʻe tukuange foki mo ha Kau Fitungofulu Fakaʻēlia ʻe toko 37. Ke maʻu e lisi kakato ʻo e ngaahi fokotuʻú mo e tukuangé, vakai, peesi 27.

Ui ki he Kau Pīsopeliki Pulé ʻa Keuli E. Sitīvenisoni, Pīsope Pule; Sēleti Kāsei, ko e Tokoni ʻUluaki; mo Tiini M. Tēvisi, ko e Tokoni Ua. Naʻe ui ki he kau palesitenisī lahi ʻo e Fineʻofá ʻa Linitā K. Pētoni, ko e palesiteni; Kalo M. Sitīveni, ko e tokoni ʻuluaki; mo Linitā S. Liivi, ko e tokoni ua.

Naʻe ui ʻa ʻEletā Lisiate J. Meini ʻo e Kōlomu ʻUluaki ʻo e Kau Fitungofulú ke ngāue ʻi he Kau Palesitenisī ʻo e Kau Fitungofulú.

Ui ko ha mēmipa ʻo e Kōlomu ʻUluaki ʻo e Kau Fitungofulú ʻa ʻEletā Leli ʻEko Hōkei, ʻEletā Lōpeti C. Kei, mo ʻEletā Sikoti D. Uatingi. Naʻe ui mei he Kōlomu hono Ua ʻo e Kau Fitungofulú ki he Kōlomu ʻUluakí ʻa e ʻEletā Kuleki A. Kātoni mo ʻEletā Sitenilī G. ʻĒlisi.

Naʻe ngāue fakataha ʻa Pīsope H. Tēvita Peatoni mo hono ongo tokoni ʻi he Kau Pīsopeliki Pulé ʻo laka hake ʻi he taʻu ʻe 16. Neongo naʻe ʻi ai ha kau Pīsope Pule ne ngāue lōloa ange, ka naʻe teʻeki ʻi ai ha Kau Pīsopeliki Pule ne ngāue fakataha lōloa pehē.

Lau e ngaahi piokālafi ʻo kinautolu naʻe toki ui foʻoú ʻi he peesi 135.