Pīsope Gérald Caussé
Tokoni ʻUluaki ʻi he Kau Pīsopeliki Pulé
Talu mei heʻene kei siʻí mo hono maʻu maʻu pē ʻe Pīsope Sēlati Kōsei, ʻa ia naʻe toki uí ni ko e Tokoni ʻUluaki ʻi he Kau Pīsopeliki Pulé, ha fiefia ʻi he ngāue he Siasí. Naʻá ne pehē ko ha meʻa lelei ia, he naʻe fie maʻu ʻi hono kiʻi kolo siʻisiʻi ʻi Pōteaú ʻi Falaniseé ʻa e taha kotoa ke pukepuke ʻa e kiʻi ʻiuinití. Makehe mei heʻene ngāue ʻi he ngaahi kōlomu ʻo e Lakanga Taulaʻeiki Faka-ʻĒloné ʻi heʻene tupu haké, naʻe toe hoko foki ko ha tā-piano ʻa e Palaimelí ʻi hono taʻu 12, ko ha tokoni ʻi he kau palesitenisī ʻo e Lautohi Faka-Sāpaté ʻi hono taʻu 14, pea palesiteni Lautohi Faka-Sāpate ʻi hono taʻu 16.
Naʻá ne pehē, ʻ“Naʻe tokoni ʻeku ngāue ʻi he Siasí ke maʻu ʻeku fakamoʻoní. Naʻe kau lahi ʻa ʻene tangataʻeikí, ʻa ia naʻe tuʻo lahi ʻene hoko ko ha palesiteni fakakolo mo ha pīsopé ki he maʻu ʻe Pīsope Kōsei ha aʻusia leleí.
Naʻe pehē ʻe Pīsope Kōsei, “ʻI hoku taʻu hongofulu tupú, naʻá ne fakakau au ʻi hono fai ʻo e faiako fakaʻapí pe ʻaʻahi ki he ngaahi fāmili faingataʻaʻiá. Mahalo ne hoko ʻeku sio ki he meʻa naʻá ne faí ko e akoʻanga lelei taha ʻi he teuteu ki he tuʻunga fakatakimuʻa he lakanga fakataulaʻeikí.”
Naʻe hoko kimui ʻa Pīsope Kōsei ko ha kalake fakauooti, palesiteni he kōlomu ʻo e kaumātuʻá, kupululita ʻo e kau taulaʻeiki lahí, tokoni pīsope, tokoni palesiteni fakasiteiki, palesiteni fakasiteiki, Fitungofulu Fakaʻēlia, pea ki muí ni maí, ko ha mēmipa ʻo e Kōlomu ʻUluaki ʻo e Kau Fitungofulú.
Naʻe fāʻeleʻi ʻa Pīsope Kōsei ʻi Pōteau ʻi Falanisē ʻi Mē 1963, kia Sione mo Malia-Palanisē Kōsei. ʻI heʻene kei talavoú naʻá ne kau ʻi he Laulāpuna Falaniseé ʻi ha taʻu ʻe taha, ʻo vahe ai ke ngāue ʻi ha vaʻa ʻa e NATO.
Naʻe maʻu hano mataʻitohi MA ʻi he pisinisí mei he ESSEC ʻi he 1987. Naʻe kamata ʻene ngāué ko ha taha fai faleʻi ʻi he ngāue foungá, ʻo ngāue ai ʻi ha taʻu ʻe ono ki ha kautaha faleʻi ʻi ha ʻōfisi ʻi Pālesi mo Lonitoni. Naʻe ngāue kimui ki ha kulupu fakatau koloa fakamovetevete lahi ʻi ʻIulope, pea kimuʻa pea toki ui ki he Kōlomu ʻUluaki ʻo e Kau Fitungofulú ʻi he 2008, naʻá ne ngāue ko ha pule lahi pea mo ha mēmipa ʻo e poate ki he kautaha fakatau meʻakai lahi taha ʻi Falaniseé.
Naʻá ne mali mo Valeli Lusieni Pāpini ʻi ʻAokosi 1986 ʻi he Temipale Peeni Suisalaní. ʻOku ʻi ai haʻana fānau ʻe toko nima.