Linda S. Reeves
Tokoni Ua ʻi he Kau Palesitenisī Lahi ʻo e Fineʻofá
Naʻe ako ʻe Linitā Sēfila Liivi ʻi heʻene tupu haké, mei heʻene faʻē naʻe uluí ke tafoki ki he ʻOtuá ʻi he taimi ʻo e faingataʻá pea faifeinga ki he lelei tahá ʻo hangē ko hono akoʻi ʻe heʻene tamaí.
Naʻá ne pehē, “Naʻá ku maʻu kei siʻi ʻi heʻeku moʻuí ha fakamoʻoni mālohi koeʻuhí ko e ngaahi faingataʻa naʻa nau tokoniʻi fakalaumālie au ke u fakapotopoto vavé.”
Naʻe fāʻeleʻi ʻa Sisitā Liivi ʻi Losi ʻEniselisi ʻi Kalefōnia ʻi he USA, ʻi ʻAokosi 1951 kia ʻElepeti Soli mo Pāpulā Uēlisi Sēfila. ʻOkú ne manatuʻi ʻene vakai hake ki he langi fetuʻuʻiá ʻi heʻene kei taʻu 13, ʻi ha kemi ʻa e Kau Finemuí mo hono fai ha kiʻi lotu nounou ʻi hono lotó: “Tamai, ʻokú Ke ʻi Hena?”
Naʻá ne pehē, “Naʻe ʻōʻōfaki au ʻe Hono Laumālié, ʻe he ʻilo ʻokú Ne ʻi aí, pea mo ʻEne ʻofa kiate aú.”
Naʻe fetaulaki ʻa Sisitā Liivi mo Melevini Kemi Liivi ʻi hono uōtí ʻi Pasatina. Naʻá na teiti he lolotonga ʻena ʻi he ʻUnivēsiti ko Pilikihami ʻIongí ʻi he ʻosi ʻo ʻene ngāue fakafaifekaú. Naʻá na mali ʻi Sune 1973 ʻi he Temipale Losi ʻEniselisi Kalefōniá pea ʻokú na hoko ko ha mātuʻa ki ha fānau ʻe toko 13.
Neongo ʻa e ngaahi faingataʻá, ka kuo kei pīkitai pē ʻa Sisitā Liivi ki heʻene fakamoʻoni ki he Fakaleleí, ʻo tautautefito ki he hili ʻo e mālōlō ʻene tama taʻu 17 ko ʻEmilī Mīselá ʻi ha fepaki ʻa ha kā he 2005.
Naʻá ne pehē, “Ko e faingataʻá ko ha faiako maʻongoʻonga. ʻOku hanga ʻe he faingataʻá ʻo langaki hake mo teuteuʻi kitautolu ki he ngāue he puleʻangá ʻi kahaʻú, ʻi hotau ngaahi ʻapí, pea ʻi hotau koló, pea mo tau hoko ko ha meʻangāue ʻi he toʻukupu ʻo e ʻEikí.”
Kimuʻa pea ui ʻa Sisitā Liivi ki he kau palesitenisī lahi ʻo e Fineʻofá, naʻe ngāue mo hono husepānití ʻi heʻene tokangaʻi ʻo e Misiona Kalefōnia Livasaití mei he 2008 ki he 2011. Kuó ne ʻosi hoko ko ha palesiteni ʻo e Fineʻofá he siteikí, palesiteni ʻo e Kau Finemuí he uōtí, faihiva ʻi he Palaimelí, pea mo ha faiako Lautohi Faka-Sāpate.
Naʻe ʻosi ʻa Sisitā Liivi mei BYU ʻi he 1974 mo ha mataʻitohi BA ʻi he ako makehé (special education). ʻOku lahi hono ngaahi manakó, ʻo kau ai ʻa e ʻātí, mūsiká, faitaá, hisitōlia fakafāmilí, mo e ngāue fakafaifekaú. ʻOku ʻikai manavasiʻi ia ke lea ʻaki ʻene fakakaukaú, tautautefito ki he taimi ke vahevahe ai ʻa e ongoongolelei ʻo Sīsū Kalaisí mo e taha kotoa pē ʻoku fetaulaki mo iá.