Tānaki Atu ki he LDS.org ha Fakamatala Foʻou maʻá e Kau Mataotao ki he Faingataʻaʻia Fakaesinó

Naʻe ohi hake ʻe Suli Pilingi ʻo ʻInitiana ʻi USA, haʻane tama naʻe Tuli ʻi ha ngaahi taʻu lahi pea naʻe hoko ko ha fakatonulea ʻi he Lea Fakaʻilonga Nima ʻa ʻAmeliká ʻi hono siteikí. Naʻe ngāue fuoloa foki mo ʻElaine ʻAlisoni ʻo ʻAlesona ʻi USA, ko ha faiako ʻi ha ako puleʻanga, ʻa ia naʻe fetuʻutaki fakahangatonu mo ʻikai fakahangatonu ai he taimi ʻe niʻihi mo e kau ako naʻe faingataʻaʻia fakaesinó. ʻOku ʻi ai foki mo hano ʻilamutu ʻoku palopalema fakaʻatamai (Down syndrome) pea mo hano ngaahi kaungāmeʻa ofi ne puke ʻi he uesia ʻo e ʻutó mo e filo silivá (multiple sclerosis) mo e ALS, pe mahaki ʻo e neavé (Lou Gehrig).

Naʻe ʻikai ke pehē ʻe Sisitā Pilingi pe ko Sisitā ʻAlisoni ko ha “ongo taukei” kinaua ʻi he malaʻe ʻo e faingataʻaʻia fakaesinó, ka naʻá na ʻosi hoko fakatouʻosi ko ha ongo mataotao fakasiteiki ʻi he faingataʻaʻia fakaesinó, ʻa ia ko ha uiuiʻi kuo tānaki atu ai ha fakamatala foʻou ki he konga ko e Ngāue ʻi he Siasí he LDS.org ʻi ha lea fakafonua ʻe 10. (ʻE lava ʻa e uiuiʻí ni ke ʻi ha tuʻunga ʻo e siteikí pe uōtí pe, ʻi ha feituʻu ʻoku mahino ai e fie maʻú, pe fakatouʻosi.)

Neongo ʻoku fakamatalaʻi nounou pē ʻi he Tohi Tuʻutuʻuni Fika 2: Ko Hono Puleʻi ʻo e Siasí, ki he kau mataotao fakasiteiki ki he faingataʻaʻia fakaesinó, ka ʻoku tuku ai ha kau taki ʻe niʻihi ke nau fifili pe ko e hā ʻe fai ʻe he uiuiʻi ko iá.

Naʻe pehē ʻe Kulisitofā Filipe, ko e pule ki he Potungāue ʻa e Siasí ki he Faingataʻaʻiá, “ʻOku ʻi ai ha ngaahi tūkunga he ʻikai fakatokangaʻi ai ʻe he kau taki fakauōtí ia ha fie maʻu pe ʻilo e meʻa ke faí ʻi ha fie maʻu ʻe niʻihi he taimi te nau ʻilo aí. ʻOku ʻi ai ha ngaahi tūkunga lahi ʻe lava ai ha mataotao he faingataʻaʻia fakaesinó ʻo tokoni, ka ʻoku ʻikai ʻiloʻi ʻe he taha kotoa ʻoku ʻi ai ha uiuiʻi peheni.

Naʻá ne hoko atu ʻo pehē, “Ko e konga foʻou ko ʻeni ʻi he ʻInitanetí ʻo e Ngāue ʻi he Siasí, ʻoku ʻikai ke ne fakamatalaʻi fakaikiiki ʻa e meʻa kotoa pē ʻoku totonu ke fai ʻe ha taha ʻoku ʻi he fatongia ko ʻení, ka ʻokú ne ʻomi ha ngaahi fakakaukau mo ha ngaahi maʻuʻanga fakamatala koeʻuhí ke lava ha taha ʻoku ngāue ʻi he fatongiá ni ʻo tokoni ki he kau takí, kau faiakó, mo e ngaahi fāmilí ʻi he ngaahi palopalema ʻo e faingataʻaʻia fakaesinó.”

Ko e fakamatala ʻoku ʻoatu ʻi he LDS.org ʻi he lea fakafonua ʻe 10, ʻoku nofotaha pē ki he founga ʻe lava ai ʻa e kau mataotaó ʻo tokoni ki he kau taki fakauooti mo fakasiteikí:

• Kumi pea maheni mo e niʻihi fakafoʻituitui ʻoku faingataʻaʻia fakaesinó pea mo honau ngaahi fāmilí he uōtí pe siteikí.

• Fakakau ʻa e kāingalotu ʻoku faingataʻaʻia fakaesinó ʻi he ngaahi fakatahá mo e ngaahi ʻekitivitií.

• Tokoni ki he ngaahi fehuʻi mo e ngaahi palopalema fekauʻaki mo e faingataʻaʻia fakaesinó ʻoku ʻomi mei he matuʻá, kau takí, mo e niʻihi fakafoʻituitui kehé.

• Kumi ha ngaahi faingamālie ʻaonga ke ngāue ai ʻa e kāingalotu ʻoku faingataʻaʻia fakaesinó.

• Kumi e ngaahi fie maʻu mahino ʻa e ngaahi fāmilí (kau ai e ngaahi fie maʻu ki he tauhí) pea, ʻi he feituʻu ʻe taau aí, kumi ha ngaahi maʻuʻanga tokoni ʻi he koló, uōtí, mo e siteikí ke tokoni ʻi he ngaahi fie maʻu ko iá.

ʻOku mahuʻinga ke fakatokangaʻi ʻoku ʻikai ko e mataotao pē ʻi he faingataʻaʻia fakaesinó ʻokú ne fakahoko ʻa e ngaahi meʻa ko ʻení. Ka, ko hono fatongiá ke tokoni ke mahino lelei ange ki he kau taki kehé pea mo tokoniʻi kinautolu ʻoku faingataʻaʻia fakaesinó. ʻIkai ngata aí, ʻoku toe tokoni foki ʻa e mataotao ki he faingataʻaʻia fakaesinó “ki he fakafoʻituitui pea mo e mātuʻa ʻoku uesia ʻe he ngaahi faingataʻaʻia fakaesinó ʻi hono vahevahe ʻo e fakamatalá mo e kāingalotu mo e kau taki ʻo e uōtí ʻi ha founga ʻoku ʻaongá.”