Ngaahi Fakakaukau Maʻá e Efiafi Fakafāmili ʻi ʻApí
ʻOku maʻu ʻi he makasini ko ʻení ha ngaahi fakamatala mo e ʻekitivitī ʻe malava ke ngāue ʻaki maʻá e efiafi fakafāmili ʻi ʻapí. Ko e niʻihi ʻeni ʻo e ngaahi sīpingá.
“ʻOku Teuteuʻi Kitautolu ki he Kahaʻú ʻe he Moʻui Fakapotopotó,” peesi 12: Lau e ngaahi tafaʻaki ʻe ono ʻoku lau ki ai e talanoá ʻe lava ke tau hoko ai ʻo moʻui fakafalala pē kiate kitautolú. Ko e hā ha ngaahi meʻa fakatuʻupakē pe palopalema ʻe lava ke tau fakaʻehiʻehi mei ai ʻo kapau te tau fakatupulaki ʻetau moʻui fakafalala pē kiate kitautolu he ngaahi tafaʻaki ko ʻení? Fakaafeʻi e kau mēmipa ʻo e fāmilí ke nau fakakaukauʻi ʻi he faʻa lotu pe ko e fē ngaahi tafaʻaki ʻoku fie maʻu ke nau fakalakalaka aí pea ke nau fokotuʻu ha ngaahi taumuʻa ke fakatupulaki ʻenau moʻui fakafalala pē kiate kinautolu ʻi he ngaahi tafaʻaki ko ʻení.
“Angamaʻa ʻi ha Māmani Taʻe Angamaʻa,” peesi 42: Mou aleaʻi mo e kau mēmipa ʻo e fāmilí e ngaahi fehuʻi ʻoku fai ʻi he fakamatalá. Fakakaukau ke ke vahevahe ʻa e tefitoʻi moʻoni mo e ngaahi aʻusia kuó ne fakamālohia hoʻo fakamoʻoni ki he angamaʻá. Mou aleaʻi ha ngaahi founga ke fakaʻaongaʻi ai e faleʻi mei he talanoá.
“Ke ke Poto mo Hoko ko ha Kaungāmeʻa,” peesi 48: Kamata ʻaki haʻo lau e kiʻi sivi ʻa ʻEletā Heili ki hono ʻiloʻi e ngaahi kaungāmeʻa leleí. Fakakaukau ke mou aleaʻi ʻa hono mahuʻinga ʻo e hoko ko ha kaungāmeʻa leleí. Fakaafeʻi e mēmipa takitaha ʻo e fāmilí ke nau fakakaukau ki ha founga ʻe tolu ʻe lava ke nau hoko ai ki ha kaungāmeʻa leleí.
“Siʻi Kaungāmeʻa,” peesi 60, mo e “Ko Hono Talitali Lelei ha ʻĒpoki Foʻou ʻo e Moʻuí,” peesi 61: Lau e talanoa fekauʻaki mo e fānau Palaimeli ko ʻení mo e founga ʻoku nau teuteu ai ke hiki ki he Kau Finemuí mo e Kau Talavoú. ʻI hoʻomou hoko ko ha fāmilí, mou aleaʻi ʻa e meʻa ne fai ʻe he fānau ko ʻení ke nau teuteu aí. Fakaafeʻi e kau mēmipa ʻo e fāmilí ke nau lau e kiʻi tohi Fakalakalaka Fakatāutahá pe Fatongia ki he ʻOtuá pea nau kumi ha fanga kiʻi ʻekitivitī ʻoku nau mahuʻingaʻia ʻi hono fakakakato he kahaʻú.
Efiafi Fakafāmili ʻi ʻApi ʻe Taha, Lēsoni ʻe Ua
ʻI ha pō ʻe taha, naʻe omi ai ʻeku ongomātuʻá mo e ongomātuʻa ʻeku faʻeé ke ʻaʻahi mai ki heʻemau efiafi fakafāmili ʻi ʻapí. ʻOku saiʻia ʻeku fānau ʻe toko tolú ke nau kau atu ki ai pea ʻi he pō ko ʻení, ko hoku foha taʻu fitú naʻe totonu ke ne fai ʻa e lēsoní. Ne mau teuteu ha kiʻi fakaʻaliʻali mo fakapipiki ha ʻū tā fekauʻaki mo e Fakatupú pea ne mau ako mo toe vakaiʻi e meʻa te ne akoʻí. Naʻe mateuteu mo loto vēkeveke hoku fohá.
Lolotonga e lēsoní, ne mau fakafanongo tokanga ki he fakamatala hoku fohá. ʻI he ʻosi ʻene fakamatalá naʻe pehē leva ʻe homa foha taʻu tolu ko Samuelá ʻoku fie faiako mo ia. Ko ia naʻá ne toʻo e ʻū fakatātaá ʻo toe fokotuʻutuʻu kinautolu ʻi he tēpilé.
Pea ʻi hono kiʻi leʻo vaivaí mo e faʻa hala ʻene puʻaki leá, naʻe fai mai ai ʻe Samuela ha lēsoni efiafi fakafāmili ʻi ʻapi. Pea neongo naʻe ʻikai ke ne mateuteu, ka naʻá ne fakafanongo. Naʻá ne fakamatalaʻi mai e founga naʻe fakatupu ai e māmaní mo fakamatalaʻi mai e ʻofa ʻa Sīsū Kalaisi maʻamautolu takitahá.
Ne mau ofo he vakai ki he faingofua ʻene fai e lēsoní—ʻo hangē ko ia ne fai ʻe hono taʻoketé. Naʻe ofo mo fiefia ʻeku ongomātuʻa mo ʻeku ongo kuí. Naʻe lava ke mau mamata ki he ʻofa ʻoku maʻu ʻe he longaʻi fānau ko ʻení ki he ongoongoleleí—kae pehē ki he ʻofa ʻoku maʻu ʻe Sīsū Kalaisi maʻanautolú.
Lizbeth Sánchez Fajardo, Mekisikou