Lotú mo e Nongá

Ne u felauʻaki mo ʻeku faʻeé ʻi ha efiafi ʻe taha pea ne u fuʻu ongoʻi loto mamahi. Ko ia ne u fakakaukau ai ke u lotu. Neongo naʻá ku fuʻu loto mamahi pea ʻikai ke u fie ongoʻi “fakalaumālie” ka naʻá ku ʻiloʻi ʻe tokoni e lotú ke u ongoʻi fiefia mo siʻisiʻi ange ʻeku fakafekikí. Hili e mavahe ʻeku faʻeé mei he lokí, ne u kamata fai ʻeku lotú. “Tamai Hēvani, kuó u ʻunuʻunu atu ki Hoʻo ʻAfió he pooni koeʻuhí …” ʻIkai. Ne u ʻāʻā leva pea tukuange hoku nimá; naʻe ongo faikehe. Ne u toe feinga. “Tamai Hēvani, ʻoku ou fie maʻu …” Naʻe toe ongo ngali kehe mo ia. Ne u ongoʻi kuo fakaʻaiʻai au ʻe Sētane ke tuku ʻeku lotu ʻo kole tokoni ki he Tamai Hēvaní.

Fakafokifā pē kuó u maʻu ha ueʻi ke u fai ha fakamālō! Ne u fai leva ia, pea kamata leva ke taumalingi mai e ngaahi fakakaukaú mei hoku ʻatamaí ki he ngaahi meʻa lahi te u lava ʻo fakamālō ai ki he Tamai ʻi Hēvaní. ʻI he ʻosi ʻeku fakamālō kiate Iá, ne u fakamatalaʻi leva e palopalema ʻoku lolotonga hokó.

Hili iá ne u ongoʻi ha nonga ʻi hoku lotó, ʻa e ongo fakalaumālie māfana ko ē ʻoku ou ʻilo ʻoku ʻofa ʻetau Tamai Hēvaní mo ʻeku ongomātuʻá ʻiate aú pea ko e fānau au ʻa e ʻOtuá. Naʻá ku lava ʻo kole fakamolemole ki heʻeku faʻeé pea mo tali ʻene kole fakamolemole maí.