Sa asiasi atu tamaiti Peraimeri o le Uarota Tolu a La Florida i Santiago, Chile, i lotoa o le malumalu faatasi ma o latou taitai Peraimeri ma lo latou au epikopo. A o latou maimoa faataamilo i togalaau mananaia, sa latou talanoa i faamoemoega o malumalu, ma sa latou usuina le pese “Ou Te Fia Vaai i le Malumalu” (Tusipese a Tamaiti, 99). Sa latou matamata foi i se vitio e uiga i le soifuaga o Iesu Keriso.

I le Peraimeri sa matou aoaoina ai le pese “O Le Talosaga Muamua a Iosefa Samita” (Viiga, nu. 14), ma o lea ua avea nei ma viiga e sili ona ou fiafia i ai. A avea au ma se faifeautalai, o le a ou faasoa atu le tala e uiga i le Togavao Paia i tagata ou te aoaoina. Ou te alofa ia Iesu Keriso ma le Perofeta o Iosefa Samita. Ou te iloa e moni le Ekalesia.

Na vave ona lagona e Helena C.,e 9 tausaga, mai Costa Rica, le pei sa avea o ia ma se tagata o le Ekalesia ina ua uma ona papatisoina o ia e lona tama. E fiafia o ia i lesona i afiafi faaleaiga e uiga ia Iesu Keriso. E fiafia o ia e alu i le aoga ma taaalo ma ana uo.

Ou te auina atu faamanuiaga mai le malumalu. Sa o se ata matagofie le taimi na matou o atu ai ma isi tamaiti mai le Siteki a Libertad Ekuatoa ma mafai ona matou asiasi i lotoa o le Malumalu o Guayaquil Ekuatoa. Matou te valaaulia ia tamaiti uma o le lalolagi ia vaai i le malumalu pe afai latou te mafaia—o se nofoaga e ese le matagofie.

I le umi e ono masina, sa fatuina ai e tamaiti Peraimeri o le Uarota a Fuji i Shizuoka, Iapani se chigiri-e, o se pepa tele o ata ma faamatalaga mai pepa na saeia, o loo faaalia ai Peresitene Thomas S. Monson. E tele se taimi ma ni galuega na alu ai, ae sa galulue faatasi tagata uma a o mafaufau ma aoao e uiga ia Peresitene Monson.