Lagonaina o Lona Alofa e ala i le Auauna Atu

Ua toe lua vaiaso aulia le Kerisimasi, ma sa ou feagai ma le fa’ātu masani o le vaitau. E tatau ona faatau meaalofa, o se laau e teuteu, ma meaalofa e tiliva.

E tele masina o o’u lofituina i feau o aso taitasi e feagai ma se tina o se fanau laiti e toalima. Ua oo lava ina ou manatu ua na ona ou alu lava i le Lotu a o ou tauivi e faafilemu la’u fanau laiti i le nofoa. Sa ou moomoo mo se faatelega o le Agaga ma ni aafiaga faaleagaga i lo’u olaga.

O le taimi foi lea na faatau ai e lo’u uso se fale fou i se setete tuaoi, ma sa taumafai e faamae’a ona faamautu mea uma a o lei oo i le Kerisimasi. O le matua tele lava o galuega mo soo se aiga, ae o le a sili atu ona faigata mo ia. Ua valu masina le maitaga o lo’u uso, o se tina o se fanau laiti e toalua, ma o ia foi e tausia lona toalua ua le aoga uma vae ma lima.

I le iloa ai o le tauiviga o loo feagai ma ia, sa ou valaau atu ai e vaai po o a mai. Sa fiafia o ia i lo latou sii mai i lo latou fale fou, ma sa faamoemoe o le a lagolagoina i latou e tagata o la latou uarota fou. Ina ua uma le ma talanoaga, sa tuu i lalo le telefoni, ma faamanuia atu ia te ia ma ou mafaufau pe mafai faapefea ona ou fesoasoani atu mai le 400 maila (650 km) le mamao.

Sa oo mai pea i lena afiafi se mafaufau, e tatau ona ou i ai iina e fesoasoani i ai. Peitai, a o ou vaavaai atu i la’u lisi o mea e fai, sa ou aveese lena manatu ae ou moe.

Na ou ala ae i le taeao e sosoo ai ma le uunaiga lava lea e tasi. Sa matua malosi le lagona ma sa le mafai ona ou faafitia. Sa ou vili i lo’u toalua ma fai atu i ai, “E tatau ona ou alu e fesoasoani i lo’u uso.” E aunoa ma se faatuai, sa ia tali mai, “O le mea foi lena na ou mafaufau i ai.”

Sa ou vili i lo’u uso, ma ta’u atu i ai la’u fuafuaga, ma fai so’u avanoa i le vaalele i lena afiafi. Sa vave ona teu la’u ato, sogi atu ma faatofa i la’u fanau, ae malaga atu i le malaevaalele.

Ina ua mavae aso e tolu, sa ou talaia pusa ma faatulaga ia potu, ma fesoasoani i teuteu se laau Kerisimasi. Ina ua uma ona talai le tele o pusa, sa matou saofafai i lalo ma lo’u uso ma lona aiga, ma matamata fiafia atu i la latou laau manaia. Na fai mai si o’u tei ua lima tausaga, ma ua fiafia ua saunia lona aiga mo le Kerisimasi, “O se Kerisimasi manaia tele lenei.”

Ina ua ou toe malaga i lo’u aiga, sa ou iloa o le tuuina atu o se vaega o a’u lava i lenei aiga lelei, sa ou lagonaina ai le Agaga, lea sa ou moomoo e maua. Na oo mai ona sa ou auauna atu i isi.

E faigofie lava ona talanoa e uiga i le tuuina atu o auaunaga i le taimi o le Kerisimasi, pau lava le mea ia fetaui lelei le tuuina atu o lena auaunaga ma le faasologa o a tatou mea e fai, ma e le taugata foi, pe aveesea mai ai i tatou mai mea tatou te fiafia e fai. Ae ina ia maua moni lava le agaga moni o le Kerisimasi, e ao ona tatou aapa atu i isi. O le faia o lena mea e fesoasoani tatou te malamalama ai i le alofa o le Faaola mo i tatou taitoatasi.