E Mafai Faapefea Ona Tatou Fafagaina le Anoano?

I le avea ai ma peresitene o le Aualofa, sa ou lagona le lofituina i manaoga ma luitau sa feagai ma nisi o aiga o le matou paranesi laitiiti. O taimi sa faigata, ma sa i ai ni nai tagata o le au paia na leai ni galuega.

I fafo atu o le Ekalesia, sa vaaia ai le faavaivai, faanoanoa, ma le leai o se faamoemoe i foliga o le toatele o e sa faafaigata ona tausi o latou aiga. Na oo lava foi i tamaiti ma le autalavou sa faaalia lagona o le le mautonu ma le fememea’i.

Sa lagona e taitai o le paranesi le manaomia ona tauave sina faamoemoe ma alofa mo i latou sa sili ona le tagolima—o se mea e mafai ai ona fesoasoani ia lagona e tagata o le matou lotoifale na silafia e se Tama Faalelagi alofa o latou tofotofoga ma sa ia tausia i latou.

A o latalata mai le Kerisimasi, sa matou fautuaina e valaaulia ia tamaiti aupito matitiva o le matou nuu i se taumafataga o le afiafi. Sa fai suegatupe a tagata o le Paranesi, faatau mai meaai mai se faleoloa gaosi meaai faavavave, ma tapena le matou falelotu mo le taliina o a matou malo. Sa aafia ai tagata uma, e aofia ai tamaiti o le Peraimeri, tamaitai ma alii talavou.

Sa matou faia se fetuunaiga ma le au gaosi meaai faavavave e saunia le meaai, ma sa matou faafesootaia tagata faigaluega lautele e sue aiga e sili ona i ai le tulaga manaomia. Sa tuuina mai e le aufaigaluega ia i latou se lisi pe a ma le 100 tamaiti, lea sa sili atu nai lo le mea sa matou fuafuaina. Sa le’i vaivai ai o matou agaga, ae sa foliga mai sa faigata ona maua se tupe talafeagai e faatau mai ai meaai mo na tamaiti e toatele.

Ina ua oo i le aso o le matou taumafataga o le afiafi, sa ave atu e le peresitene o le paranesi, faatasi ma nisi o le au tiakono, le tupe na matou maua ma o atu loa i le faleaiga, ma le mafaufau pe o le a faapefea ona matou fafagaina le anoano o tamaiti i la matou tupe utiuti. Sa latou tatalo ao o, ma mafaufau atonu e tatau ona matou valaaulia na o tamaiti aupito laiti, vaevae tai afa meaai, pe tolo foi le gaoioiga.

Ina ua latou taunuu atu i le faleaiga, sa tuu e le peresitene o le paranesi le tupe i luga o le fata. O le taimi lena na taliina ai a latou talosaga.

Sa tilotilo ane le pule o le faleaiga ia i latou ma, faatasi ai ma se ataata, ma fai mai o le a fiafia le faleaiga e foai mai pe fia lava ni meaai e manaomia—ae le totogia! E le mafai ona ou faamatalaina le fiafia sa matou lagonaina uma ina ua matou iloa lea galuega agalelei, lea na mafai ai ona matou aumaia sina alalaga fiafia—ma le tele o meaai—i se vaega toatele o tamaiti matitiva.

E faafetaia ai le agalelei o le faleaiga, sa mafai ona matou faaaogaina le tupe sa matou sailia e faatau mai ai meaai ma fai ai ni ato meaai mo aiga na sili ona matitiva.

Mai lenei aafiaga na matou aoao ai e leai se taumafaiga e maumau pe a faaaoga a tatou taleni ma faanaunauga lelei e auauna atu ai i o tatou uso a tagata. Sa faamalolosia a matou molimau e tatalaina e le Alii faitotoa pe a uma ona tatou faia mea uma tatou te mafaia.