Olioli i Talafaasolopito o Aiga

Suesue ma le agaga tatalo i mea nei, ma pe a talafeagai ai, ia talanoaina faatasi ma uso e te asia. Faaaoga fesili e fesoasoani ai ia te oe e faamalosia ai ou uso ma avea ai le Aualofa ma se vaega ola o lou lava olaga. Mo nisi faamatalaga, alu i le reliefsociety.lds.org.

Ata

Faamaufaailoga a le Aualofa

Faatuatua, Aiga, Toomaga

Ua aoao mai Elder Russell M. Nelson o le Korama a Aposetolo e Toasefululua e faapea, o le Agaga o Elia o “se faailoaga o le Agaga Paia o loo molimau mai i le natura paia o le aiga.”¹

I le avea ai ma tagata o le Ekalesia toefuataiina a Keriso, ua ia i tatou le tiutetauave e ala i se feagaiga e saili o tatou tuaa ma saunia sauniga faaola o le talalelei mo i latou. O i latou e aunoa ma i tatou e le mafai ona “faaatoatoaina” (Eperu 11:40), ma “pe mafai foi ona faaatoatoaina i tatou e aunoa ma o tatou tagata maliliu” (MF&F 128:15).

O le galuega o talafaasolopito o aiga e saunia ai i tatou mo faamanuiaga o le ola e faavavau ma fesoasoani e faateleina ai lo tatou faatuatua ma le amiotonu o le tagata lava ia. O le talafaasolopito o le aiga o se vaega taua o le misiona a le Ekalesia ma e mafai ai ona faatino le galuega o le faaolataga ma le faaeaga mo tagata uma.

Na saunoa mai Peresitene Boyd K. Packer, Peresitene o le Korama a Aposetolo e Toasefululua: “A tatou saili o tatou lava gafa e oo ina tatou fiafia i le sili atu nai lo o ni igoa. … O lo tatou fiafia e liliu atu ai o tatou loto i o tatou tama—tatou te taumafai e sue i latou ma ia iloa i latou ma ia auauna atu ia i latou.”²

Mai Tusitusiga Paia

Malaki 4:5–6; 1 Korinito 15:29; MF&F 124:28–36; 128:15

Mai lo Tatou Talafaasolopito

Na aoao mai le Perofeta o Iosefa Samita, “O le tiutetauave sili i lenei lalolagi ua tuuina mai i o tatou luga e le Atua, o le sailia lea o o tatou tagata ua maliliu.”³ E mafai ona tatou galulue e fai ma sui i le malumalu mo o tatou tuaa ua maliliu ma faataunuu sauniga manaomia mo i latou.

Sa maua e Sally Randall o Navu, Ilinoi, o lē na maliu sana tama tama e 14-tausaga le matua, le faamafanafanaga tele i le folafolaga o aiga e faavavau. Ina ua uma ona papatiso lona toalua mo lo la atalii, sa ia tusi atu i tagata o lona aiga: “Oka se mea ina a mamalu i lo tatou … papatiso mo o tatou [tuaa] uma ua maliliu ma faaolaina i latou i le mamao i tua i le mea e gata mai ai lo tatou iloa.” Ona ia talosaga atu lea i ona aiga e auina mai faamatalaga e uiga i o latou tuaa, ma faapea atu, “Ou te faamoemoe ou te faia le mea ou te mafaia e faaolaina ai [lo tatou aiga].”⁴