Faamalolosia o le Aiga ma le Ekalesia e ala i le Perisitua

E ui na faalauiloa atu ia savali i le tolu masina ua tea, ae o suesuega ma talatalanoaga—ma faamanuiaga e o faatasi—o loo faaauauina i le asō, ma o lenei metotia ua tuuina mai ai se vaaiga fou i le faatulagaga o aoaoga i le Ekalesia. E le pei o aoaoga ua mavae atu, lea sa faapitoa lava i se faasalalauga e faatasi ona fai mo taitai o uarota ma siteki, ae o lenei aoaoga ua fuafuaina le faaauauina ai pea. O le mafuaaga lena ua tuu ai i luga o le initoneti ia vaega o le vitio i le wwlt.lds.org. O se saite e fesootai i ai, o le leadershiplibrary.lds.org, ua maua ai se sootaga i vitio faapea ma isi punaoa faaopoopo e fesoasoani ai i aiga, tagata taitoatasi, korama, vasega, ma aufono ina ia faalautele lo latou malamalama ma faaaoga mea latou te aoaoina.

O vaega taitasi o vitio o loo taulai atu i vaega eseese o le perisitua. Ua tuuina atu ai e sui o le Au Peresitene Sili ma le Korama a Aposetolo e Toasefululua, faatasi ai ma isi Pulega Aoao ma taitai aoao, ni aoaoga musuia i:

• Auala e mafai ai e aiga ona maua le malosi ma le filemu e ala i le mana o le perisitua.

• Auala e fesoasoani ai i aiga uma ia tofo i faamanuiaga o le perisitua.

• Auala e faamalolosia ai e i latou ua umia ki o le perisitua ia aiga ma auaiga.

• Auala e auauna atu ai i auala faaKeriso.

• Auala e tausi ai fanau i le malamalama ma le upumoni.

O le tele o mataupu faavae o le talalelei o loo faalauiloa atu i le Faamalolosia o le Aiga ma le Ekalesia e ala i le Perisitua o loo aoaoina foi i le Tusitaulima 2: Taitaiina o le Ekalesia, ma o le toe iloiloina o faamatalaga mai le tusitaulima atonu o le a aoga i le taimi o suesuega ma talanoaga. Atonu e aoga foi le toe faamanatu “O Le Aiga: O Se Folafolaga i le Lalolagi”.

Na faamalamalama mai e Peresitene Henry B. Eyring, Fesoasoani Muamua i le Au Peresitene Sili, e faapea o savali o i le Faamalolosia o le Aiga ma le Ekalesia e ala i le Perisitua ua “mamanuina ina ia fesoasoani ia i tatou ia iloa, e ala i le mana o le Agaga Paia, le auala ua finagalo le Tama Faalelagi tatou te auauna atu ai, aemaise lava i totonu o aiga.” O le vaega sili lena ona mamana o le aoaoga—e le o upu o i totonu o se vaega o le vitio ae o le mea na aoao mai e le Agaga Paia ia i tatou a o tatou mafaufau ai ma talatalanoa ai i mataupu faavae lea na aoaoina.

E tatau i taitai uma, tagata o le ekalesia, ma aiga ona maua se avanoa e faalogo ai ma talanoaina ia savali o i le Faamalolosia o le Aiga ma le Ekalesia e ala i le Perisitua, a le o le DVD o luga o le initoneti.

E faamanuiaina aiga i savali pe a latou faaaogaina i taimi o afiafi faaleaiga ma isi tulaga faaleaiga. O tane ma ava o ni paaga tutusa i le taitaiina o a latou fanau. “Atonu e i ai ni taimi e manaomia ai e le tama po o le tina le aoao atu o se mataupu faavae, ma e mafai ona la faaaogaina lenei punaoa ao la taumafai e fesoasoani i se atalii po o se afafine i le aluga o le ala,” o le faamalamalama mai lea a Elder M. Russell Ballard o le Korama a Aposetolo e Toasefululua i le vaega e faaulutalaina “O Lana Galuega Lenei.” Ma sa taua e Elder Dallin H. Oaks o le Korama a Aposetolo e Toasefululua e faapea “po o le a lava le taua o le aoaoga a se faufautua o le perisitua po o Tamaitai Talavou o loo i ai i le Ekalesia—ma e matou te faamoemoe e matuai aoga lava—ae e le taitai lava tutusa lena aoga e pei o se faataitaiga a se tina ma se tama.”

I faatulagaga a le Ekalesia, e mafai ona faaaoga ia savali i fonotaga a le au peresitene o le siteki ma au epikopo; fonotaga a le aufono a le siteki ma le uarota; fonotaga a le komiti a taitai o le perisitua; fonotaga o aoaoga a ausilali a le siteki; fonotaga a le au peresitene, e aofia ai ia au peresitene o korama a le Perisitua Arona ma au peresitene o vasega a Tamaitai Talavou; sauniga tuufaatasi i Aso Sa-lona lima a le perisitua ma le Aualofa; vasega i Aso Sa a le korama ma ausilali; fonotaga o konafesi faalesiteki po o le itu (e le o le sauniga aoao i le Aso Sa); ma fonotaga o konafesi a le uarota po o le paranesi (e le o le sauniga faamanatuga).

O talanoaga e mafai ona aofia ai le auala e faamalolosia ai le autalavou ma talavou nofofua matutua. E mafai e taitai ona faia ni tofiga e fuafua i nei talanoaga ma tulitatao e le aunoa ni tofiga i fonotaga a le aufono.

O le faamoemoega o le suesueina ma le talanoaina o nei savali ina ia fesoasoani lea i tagata taitoatasi ma aiga e faamalolosia lo latou faatuatua, fausia a latou molimau, ma faaloloto lo latou liua i le talalelei a Iesu Keriso.

“E pau lava le mea e manaomia e lo tatou saogalemu ma lo tatou manuia o le faaogatusaina lea o o tatou faamoemoega ma o tatou loto ma le finagalo o le Atua atoa ai ma Lona mana,” o le saunoa mai lea o Peresitene Eyring. O nei savali o “se taiala ma se faamalosiauga e faia ai lena tulaga ma tatou o faatasi ai ma isi.”

O le vaega o le “Auaunaga” o loo aumaia ai ni faataitaiga mamana o ni taitai perisitua o loo asiasi atu i tagata taitoatasi ma aiga, ma faaalia mai ai le ala e mafai ai ona fesoasoani nei ituaiga asiasiga i le laveaiina o tagata ua le o toe toaaga mai.

“A o tatou mafaufau i le tiute na tatou mauaina o le fesoasoani atu i e ua vaivai, sii i luga lima ua tautau i lalo, ma faamalosi tulivae ua vaivai, e leai lava se isi ala e sili atu e mafai ai ona tatou faia nai lo le i ai taitoatasi i le fale o se tagata, tuuina atu o lenei auaunaga ma le mamanu lea na faaaogaina e Iesu Keriso,” o le tala lea a le Epikopo Pulefaamalumalu o Gary E. Stevenson i le vaega o le “O Lana Galuega Lenei.” “Ou te manatu o le a oo mai faamanuiaga moni pe a tatou talanoa ma aoao, ona o atu lea ma fai,” o lana tala lea.

A o faaauau ai pea lenei aoaoga i le Ekalesia atoa, o le a maua e tagata ia faamanuiaga pe a latou faaaogaina ia mataupu faavae o le talalelei lea na aoaoina. “O le a faamanuiaina atalii ma afafine uma o le Atua pe a latou mulimuli i aoaoga ma faataitaiga o nei ata,” o le tala lea a Elder Ballard.

O le perisitua o loo auauna atu ai i isi ia tane ma ava, tama ma tina, autalavou, tagata nofofua, korama, ma aufono ma mauaina musumusuga a o latou mulimuli ai i le faataitaiga a Iesu Keriso. A o faaauau pea ona latou faia o lea, o le a faailoaina mai ia folafolaga ia na faia i le Faamalolosia o le Aiga ma Ekalesia e ala i le Perisitua. O le a vaaia e tagata o le ekalesia le faataunuuina o le folafolaga a Peresitene Eyring mai le vaega faaiu o le vitio: ma e oo lava i taimi faigata, “o le a malolosi lava o tatou aiga ma maua le filemu.”