Faaleleia o Au Tatalo Faaletagata Lava Ia

O le tatalo o le talanoa lea ma le Atua, le Tama Faavavau o o tatou agaga—e le o le talanoa atu ia te Ia ae o le talanoa faatasi ma Ia. E atoatoa lona alofa ia i tatou taitoatasi ma e tumu i le alofa mutimutivale ma le malamalama. Ua Ia silafia mea uma e uiga ia i tatou. Ua Ia silafia mea tatou te manaomia, e tusa lava pe na o mea tatou te mananao i ai e mafai ona tatou vaaia. O loo ia te Ia le mana ma le gafatia e le iu e lagolago ma taiala ai i tatou. E naunau lava o Ia i taimi uma e faamagalo i tatou ma fesoasoani ia i tatou i mea uma lava.

E mafai ona tatou talanoa leotele ma le Tama Faalelagi pe ala i le fatuina o mafaufauga ma lagona i o tatou mafaufau ma loto. O tatalo faaletagata lava ia e tatau ona avea ma ni faailoaga faamaoni ma paia o viiga ma le loto faafetai; o olega mai le loto mo manaoga ma faanaunauga faapitoa; o le tautauina atu o agasala ma le lotomaualalo ma le salamo ma talosaga mo le faamagaloga faamamaina; o aioiga mo le faamafanafanaga, taitaiga, ma faaaliga. O nei faailoaga o lagona e masani ona mafua ai ona sasaa atu o tatou agaga atoa i lo tatou Tama Faalelagi agaalofa.

E masani lava o le tatalo o se fesootaiga puupuu, ae e mafai foi ona avea o se talanoaga e tatala pea ma faifai pea i le ao atoa ma le po (tagai Alema 34:27).

I le fuafuaga paia a lo tatou Tama Faalelagi, o le tetea ese faaletino ma le faaleagaga mai Lona afioaga ua alagatatau lea. O le tatalo o se sootaga taua ma gafatia faaleagaga i le va o le Atua ma le tagata. A aunoa ma le tatalo, e leai se toe foi atu i le Tama. A aunoa ma le tatalo, o le a le mafai ona lava le faatuatua e malamalama ai ma tausi ai poloaiga. A aunoa ma le tatalo, o le a le maua le mana faaleagaga talafeagai e aloese ai mai faaosoosoga ma faatoilalo ai tofotofoga ma faigata. A aunoa ma le tatalo, e le mafai ona maua le salamo, faamagaloga, ma le mana faamama o le Togiola. Faatasi ai ma le mana o tatalo faaletagata lava ia, e mafai ai mea uma lava.

O le tatalo e mafai ona maua ai faaaliga faaletagata lava ia ma meaalofa faaleagaga e ala i le Agaga Paia. O le auala faaleagaga lea ua avanoa mo fanau uma a le Atua, tatou te o atu ai e le aunoa i lo tatou Tama e Faavavau, i Lona Alo Pele, ma le Agaga Paia. O le tatalo o se faamaoniga mamana ma faatauanau o le moni a’ia’i o le Atua le Tama e Faavavau. O tatalo faaletagata lava ia e taua e malamalama ai i le Atua ma lo tatou faasinomaga paia.

Ua toeitiiti 20 tausaga ua mavae, talu ona fanau mai le ma atalii lona lima, o Peniamina. Sa lagona e lo’u toalua na i ai se mea na le lelei i mata o Peniamina. Sa ma logoina se uo mamae matou te uarota ma e tomai faapitoa i i’oimata, o lē sa faamautuina mai o maua atugaluga ma maua ai le tulaga o Peniamnia o le retina palasatoma, o se ituaiga kanesa o le mata e seāseā tupu. O le tala sa matuai lofituina.

O ni nai vaiaso mulimuli ane, sa tatau ai ona faia le taotoga muamua o le tele o togafitiga o Peniamina. A o le’i faia le taotoga sa matou feiloai ma le fomai tipitipi ma ta’u atu ia te ia, ma te talitonu o le a ia iloa o le a toe lelei le mata o Peniamina ma e le manaomia ai ona aveeseina. Sa anapopogi ma tatalo lo matou aiga atoa ma le toatele o tagata o le uarota mo le ma atalii, ma sa i ai so ma faatuatua tele o le a faamaloloina ia Peniamina.

O se itula mulimuli ane, sa toe foi mai ai le fomai tipitipi ma faamautu mai o le mata o Peniamina sa faaleagaina e sela o le tuma, ma o le isi ona mata sa i ai foi nisi o tuma ogaoga lea sa manaomia ai ona togafitia faavave. Sa ou le magagana. O le lofituina atoa ai i le faanoanoa ma le le talitonu, sa ou savali atu i fafo o le falemai i le taeao susu o San Francisco ma amata ona ou savali, ma ou tagitu’i lotulotu lava.

Sa ou faia mea uma sa aoaoina ai au e fai. Sa matou tatalo ma maua se uunaiga malosi e filifili le fomai lenei. Sa matou anapopogi ma tatalo ma lagona le mautinoa o le a faamaloloina le ma atalii laitiiti e ala i le faatuatua ma e ala i le mana o le perisitua. Peitai, sa le’i faasalavei mai le Alii. Sa foliga mai o lo matou faatuatua sa le sili atu nai lo o se faamoemoe faivavale. Sa amata ona ou fesiligia mea uma sa ou talitonu i ai. A o o’u savali, sa ou lagona le faalataina ma le ita. Sa faatoilaloina a’u i le tiga.

Ou te le o fiafia i le talanoaga sa ou faia ma le Tama Faalelagi a o ou savali ma tagi i lena taeao. Ina ua mavae se taimi, sa toe to’a mai ou lagona. Sa ou manatua le oo mai i lo’u mafaufau o upu o se pese a tamaiti Peraimeri. “Le Tama e, o e i ai iina? Pe o lagona mai tatalo uma?” Aua e manino lava e te le’i faalogo mai i la’u tatalo pe atonu foi e te le popole moni mai ia te a’u ma lo’u atalii. (“O Le Tatalo a le Tamaitiiti,” Tusipese a Tamaiti, 6.)

I lena taimi, sa oo mai ai se alofa mutimutivale agamalu. Sa ou lagonaina upu nei, i totonu o lo’u mafaufau ma lo’u loto: “O Kevin, o ia foi o lo’u atalii.” O le manino o le uunaiga sa le sese lava. Sa ou iloaina i lena taimi sa ou le malamalama i se mea e tasi o le faamoemoega o le tatalo. Sa ou manatu e faapea, talu ai ona sa i ai sa’u mafuaaga amiotonu, o lea e mafai ai ona ou faaaogaina le perisitua ma le anapogi ma le tatalo e sui ai le finagalo o le Atua.

Mo le taimi muamua i lo’u olaga, na ou iloa atoatoa ai e le o au e pule. Sa ou iloa na tatau ona ou gauai atu i le finagalo o le Tama Faalelagi. Sa le mafai ona ou maua le mea sa ou manao i ai i le taimi lena ma i le ala na ou manao i ai ona sa ou tausia poloaiga. O le faamoemoega o le tatalo e le o le ta’u atu i le Tama Faalelagi o le mea e fai, ae ia iloa le mea e finagalo o Ia ou te faia ma aoaoina. Sa manaomia le faaogatasi o lo’u loto ma Lona finagalo.

O le a matou feagai ma le isi ono tausaga o luitau faigata a o matou tauivi ma le tulaga o le ma atalii laitiiti ina ia faasaoina le isi ona mata ma lona ola. Ae ua ou iloa nei sa silafia ma e pule le Tama Faalelagi. Me e tusa lava po o le a le iuga na oo i ai ia mea, sa Ia faafofoga ma tali mai i la’u tatalo. O le taimi nei o le ma atalii faavavega o loo auauna atu nei o se faifeautalai faamisiona i Sepania.

Ua ia te au se faamaoniga a’ia’i i lo’u lava olaga o le Atua o lo tatou Tama Faalelagi alofa ma e moni e faafofoga ma tali mai i a tatou tatalo. A o faaauau ona e aoao ma malamalama i le mataupu faavae faalelagi o tatalo faaletagata lava ia e pei ona aoaoina mai e le Faaola, o le a avea le tatalo ma se puna o le mana maoae faaleagaga ma faaaliga i lou olaga.