Kamil blong Niu Yok Siti
Kamil we i gat naen yia i gat plante fren. “Samting we mi laekem tumas abaot ol fren blong mi, hem i we olgeta evriwan i defren,” hem i talem. “Oli kam long ol defren ples, mo oli gat ol defren wei blong mekem samting.” Kamil i laekem tumas blong lanem ol gudfala samting long ol fren blong hem, mo hem i laekem blong serem ol samting wetem olgeta. Nambawan samting we hem i oltaem wantem serem wetem wan fren, hem i gospel. Afta we hem i bin serem fas toktok blong bilif wetem fren blong hem Yailin, Kamil i invaetem famle blong fren blong hem blong mitim ol misinari. Kamil i bin tijim Yailin olsem wanem blong prea tu. Naoia Yailin mo mama blong hem oli memba blong Jos.
Ol singsing we mi laekem tumas oli “Mi Pikinini blong God” mo “Famle I Save Stap Tugeta blong Oltaem.” Skripja we mi laekem tumas, hem i Doctrine and Covenants 19:23; Lod i talem blong lanem long Hem, mo lisin long ol toktok blong mi; wokbaot folem smol voes ia blong Spirit, mo bae yu save gat pis long Hem. Skripja ia i oltaem mekem mi glad taem mi sore.
Fren blong mi Yailin i bin kasem baptaes long 2011. Mi laekem se mifala i save go tugeta long jos. Mi stap helpem hem blong lanem baehat ol Toktok blong Bilif. Mifala i stap wok long nambanaen toktok blong bilif.
Mama mo papa blong mi oli blong Dominiken Ripablik. Ating hemia nao from wanem mi laekem tumas blong kakae raes mo ol bin mo jiken. I mekem mi mi tingbaot ples we famle blong mi kam long hem.
I gat faef man long famle blong mi. Sista blong mi, Emili, we hem i kasem baptaes mo konfem long Disemba. Brata blong mi, Vikto, hem i karem nem blong papa blong mi. Mi no bin gat wan animol blong lukaot yet, be mi stap tingting blong karem wan totel. Mi laekem totel from oli naes mo oli slo, mo oli no save ronwe.
Mi laekem storian blong Kapten Moronae long Buk blong Momon. Papa blong mi i bin ridim long famle haos naet, mo inspiresen i kam long mi blong mekem wan flag blong miwan. Flag blong mi i rimaenem mi long huia mi mo we Papa long Heven i stap oltaem wetem mi.
Famle i bin glad blong givim ol foto, olsem nomo we i stap; Foto blong Ston blong Libeti © Getty Images; Kamaot I Kam, i kam long Wolta Rein, wetem gladhat blong Jos Histri Miusium.