2013
Tabu Misin blong Jisas Kraes: Stap Olsem Krieta
Oktoba 2013

Visiting Tijing Mesej

Tabu Misin blong Jisas Kraes: Stap Olsem Krieta

Wetem prea stadi long toktok ia mo lukaot blong save wanem nao blong serem wetem ol sista we yu visitim. ?Olsem wanem nao blong stap andastanem laef mo misin blong Sevya i bildimap fet blong yu long Hem mo i blesem olgeta we yu stap lukaot gud long olgeta? Blong moa infomesen, go long reliefsociety.lds.org

Fet, Famle, Help

Jisas Kraes “i bin krietem ol heven mo wol” (3 Nifae 9:15). Hem i bin mekem hemia tru long paoa blong prishud, folem daereksen blong Papa blong yumi long Heven (luk long Moses 1:33).

Presiden Tomas S. Monson i talem: “Yumi mas talem tangkyu tumas se wan waes Krieta i mekem wan wol, mo i putum yumi long ples ia … blong yumi save gotru long wan taem blong tes, wan janis blong yumi pruvum yumiwan blong save kwalifae from evri samting we God i bin rere blong yumi kasem.”1 Taem yumi yusum fridom blong joes blong yumi blong obei ol komanmen blong God mo sakem sin, yumi kam klin inaf blong gobak stap wetem Hem.

Long saed blong Kriesen, Presiden Dita F. Ukdof, Seken Kaonsela long Fas Presidensi i talem:

“!Yumi ia nao, yumi risen from wanem Hem i bin krietem yunives! …

“Hemia defren tingting blong man: taem yumi komperem man long God, man i nating nomo; be yet, yumi evri samting long God.”2 Taem yumi save se Jisas Kraes i bin krietem wol ia blong yumi from se yumi minim evri samting long Papa long Heven, i save helpem yumi blong gat moa lav long Tufala.

I Kamaot long Ol Skripja

Jon 1:3; Hibrus 1:1–2; Mosaea 3:8; Moses 1:30–33, 35–39; Abraham 3:24–25

I Kamaot long Histri blong Yumi

Oli bin krietem yumi folem pikja blong God (luk long Moses 2:26–27), mo yumi gat ol tabu paoa we yumi gat yet blong kasem. Profet Josef Smit i askem ol sista long Rilif Sosaeti blong oli “laef long wan mak we i inaf long ol spesel janis we oli gat.”3 Wetem gudfala toktok ia olsem wan fandesen, oli bin tijim ol sista insaed long Jos blong Jisas Kraes blong Ol Lata-dei Sent blong laef long mak blong ol tabu paoa ia we oli save kasem yet taem oli stap mekem ol stamba tingting we God i gat long olgeta i hapen. “Taem oli kam blong andastanem huia stret olgeta—ol gel blong God wetem wan paoa, we i stap insaed long olgeta finis, blong lavem mo tijim man—nao bae oli kasem ful paoa blong olgeta olsem ol tabu woman.”4

“Oli putum yufala long wan situesen we yufala i save mekem ol samting folem ol sore ia we God i bin putum insaed long hat blong yufala,” Profet Josef Smit i talem. “Sapos yufala i laef gud inaf folem ol prinsipol ia, !bae ol samting oli bigwan mo gud tumas!—sapos yufala i laef go kasem ol spesel janis blong yufala, bae oli no save blokem ol enjel blong kam ol patna blong yufala.”5

Ol Not

  1. Tomas S. Monson, “Resis blong Laef,” Konfrens Ripot, Epril 2012, 56.

  2. Dita F. Ukdof, “Yu Impoten long Hem,” Konfrens Ripot, Okt. 2011, 12.

  3. Josef Smit insaed long Daughters in My Kingdom: The History and Work of Relief Society (2011), 171.

  4. Luk long Daughters in My Kingdom, 171.

  5. Luk long Joseph Smith, insaed long Daughters in My Kingdom, 169.

Foto blong Kristus we i kam long Deved Nistul; pikja we i stap biaen i kam long Hemera/Thinkstock