Fesoasoani ia Vaioleti

Na mau le uu a Ema i lana ato faafafa a o ia savali atu i lona potuaoga fou. O le aso muamua lea o le aoga. Sa ia ofuina le ofu e sili ona fiafia i ai, ma sa teu e Tina se meaai faapitoa faatasi ai ma meaai o le malologa—o masi manu.

“O le a sili ona lelei lenei aso,” o mafaufauga ia o Ema ia te ia lava. “Pe afai lava e—”

Sa tu Ema ma sioa atu i leisi itu o le potuaoga. O ia lale. Vaioleti.

O le tausaga ua tea, sa na o Vaioleti lava e faaaogaina ia pa uamea e taupe ai i malologa uma. Sa ia valaauina Ema i ni igoa. Sa ia faoina foi le uo mamae a Ema!

Na iloa atu e Vaioleti Ema ma faaeto atu i ai lona laulaufaiva. Na sioa mai i ai Ema, ma atili uumau ai lana ato faafafa. O le agaleaga ia o Vaioleti i le tausaga atoa lea ua tea, ma e foliga mai e leai lava se mea o le a ese ai lenei tausaga.

“E faafeiloai atu i lenei tausaga fou, vasega! O le tala lea a Miss Caldwell mai le pito i luma o le potu. “Sei o tatou faatulagaina ni nofoa.”

Sa laina tai lua kesi mai le isi itu i le isi itu o le potuaoga. Na faasolo e Miss Caldwell lona lima i lalo o le tauvalaauga; ona faasino lea i ni pea kesi o i tua. “Ema. O le a e nofo i tua i o.”

Sa nofo i lalo Ema i se tasi o kesi o i tua. Sa ia faamoemoe o le a nofo Liselle i ona autafa. Po o Jaime. Po o—

“Vaioleti.”

Na ea faafuasei ifo i luga le ulu o Ema. Na sao ea lana faalogo?

Ioe. Sa tusi pea Miss Caldwell i le kesi i ona autafa. “O le a avea oe ma tuaoi a Ema, Vaioleti,” o lana tala lea.

Na savali faatautau atu Vaioleti agai ia Ema ma le faauu. Na tuu e Ema lona ulu i luga o lana kesi ma sioa atu i le puipui. O le a avea ma se tausaga umi lava.

I le taimi o le matematika, na tusia e Miss Caldwell nisi o faafitauli [o le matematika] i luga o le laupapa e fai e le vasega. “E mafai ona e galue na o oe pe galulue ma lou tuaoi,” o lana tala lea.

Na vave ona punou Ema i luga o lana pepa ma faafoliga o loo pisi. Na faigofie lava ia faafitauli [faamatematika]. Ae sa na o lona taumafai lava e aloese mai ia Vaioleti. Na te lei tilotilo lava ia te ia i le taeao atoa.

Sa i ai se mea na tuiina mai lona tauau. Na lagona e pei o se penitala. E lei amanaiaina e Ema.

Sa toe tui mai. Sa tui o ia e Vaioleti! Sa faaauau pea ona galue Ema ma le faamaualuga.

O le tui lona tolu a Vaioleti na mamafa tele ma ua tiga. Na lagona e Ema ua amata ae lona ita. Mata o le mea lea o le a i ai lenei tausaga atoa? Sa ia mafaufau e sii i luga lona lima e tau ia Miss Caldwell. Pe masalo e na o lona sioa atu ia Vaioleti.

Ona faalogoina lea e Ema o se masusu. O tagi se tagata? Na tui mai o ia e le penitala. Na ia vaai atu ma iloa ai le faataupupula mai o Vaioleti ia te ia. Sa uu i lona lima lana penitala, ma sa i ai loimata i ona mata. Na lilofia lana pepa i osiosiga o le titina.

Na femilomilosai e Vaioleti le penitala sa i ona lima. “E mafai ona e fesoasoani mai ia te au?” na ia fesili lemu mai ai.

Na tilotilo atu Ema ia te ia mo se minute, ua tei. Na manao Vaioleti na te fesoasoani atu ia te ia? I le faafia ai ona ia agaleaga ia te ia? Na toe liliu atu Ema i lana ia pepa. E mafai ona galue lava Vaioleti ia na o ia. Na te le agavaa mo se fesoasoani mai ia Ema, e tusa lava pe o ia …

… lona tuaoi?

Na faasaga lemu atu Ema i luma. Sa ia lagonaina le tagi lemu o Vaioleti i ona autafa. E masani lava ona fai mai tusitusiga paia ia alofa i lona tuaoi—ae na ese lava Vaioleti ia! O le vasega lava lea ua ala ai ona nofo Ema i ona autafa!

Na toe faaauau pea le meaaoga a Ema. Ona ia tu lea. Atonu e le ese Vaioleti. Atonu na fai mai tusitusiga paia e alofa i lou tuaoi, o lona uiga o loo fai mai o tagata uma. E oo lava i tagata agaleaga ma e le alolofa. E tusa lava pe faigata.

Sa mapuea Ema ma tuu lemu i lalo lana penitala. Sa ia liliu atu ia Vaioleti ma taumafai i le mea sili na te mafaia e ataata. “E mafai ona ou fesoasoani atu?” o lana fesili lea.

Na luelue mai Vaioleti, ma soloese ona loimata i lona lima.

Na punou atu Ema i luga o le pepa a Vaioleti ma amata ona fesoasoani i le numera muamua. Ua leva ona ia lagonaina le mafanafana i totonu ia te ia. Sa ia mafaufau pe faamata e fiafia Vaioleti i masi manu.