Mata e Toe Foi Mai Mataio?

Sa i ai se vaega malolosi o alii talavou i la matou uarota, ae o lo ma atalii o Mataio na amata ona lilifa atu i se tagata e le auai i le ekalesia lea e tutusa lo laua fiafia i taavale ma soo se mea e alu i le masini. Ae paga lea, o lenei alii talavou e sau mai se aiga e le faatauaina mataupu faalelotu. O ona matua e faatagaina le inupia ma le ulaula i lo latou fale ma e le talitonu e taua le ola mama.

Na maua e Mataio le faailoga maualuga i le Sikauti, ae na te lei auai i le sauniga mo tufatufaga o faailoga ona na le toe ola i tulaga faatonuina o le Sikauti. Sa ou aoina uma mai ana faailoga o le Sikauti ma faia se pusa e faaali ai. Ona ou tuu esea lea, ma le faamoemoe o le a i ai se aso o le a ia faatauaina ai. E oo ane i le 16 o ona tausaga, ua ulaula Mataio, inu ava malosi, ma faaaoga fualaau faasaina. Sa nofo ma le aoga ma siitia atu e nonofo faatasi ma lana uo teine. Sa seāseā ona ma vaai ia te ia mo le lua o tausaga.

Sa matuai o ma le fiafia lava. Ma te le’i iloa pe o le a ia toe foi mai i lona aiga ma le tapuaiga, peitai na ma filifii e mulimuli i le faataitaiga a Alema i le taulimaina o lona atalii faalogogata. Sa faaauau pea ona alofa Alema i lona atalii ma tatalo ma le faatuatua o le a “aumaia o [ia] i le malamalama o le upumoni” (Mosaea 27:14).

Na ma tatalo e le aunoa ia faasalavei le Alii i le olaga o Mataio, ma sa ma faaaogaina avanoa uma e faailoa atu ai e ala i le upu ma faatinoga lo ma alolofa tele ia te ia. Pe a sau o ia i le fale, ma te le’i fai atu soo se mea e mafai ona ia faauigaina o se faitioga pe faamasinoina ai. Na o le faaali lava o le ma fiafia i le vaai atu ia te ia.

I se tasi aso na sau ai Mataio i le fale ma faapea mai e fia talanoa mai. Sa fai mai sa feiloai i se teine i se pati na i ai ni ana fesili e uiga i le Ekalesia. A o le’i mafai ona ia ta’uina atu na te le o toe iloa ni tali, na amata o atu upu mai lona gutu. Na oo ina ia taliina ana fesili i le vave e pei ona ia fesiligia ai.Na fai mai Mataio na te le’i manatua le aoaoina o mea sa ia tautala atu ai, ae sa ia iloaina e moni ana upu. Sa mafaufau o ia pe aisea na ola ai i le tulaga sa ia ola ai a o lea o loo ia talitonu lava i le talalelei.

Ina ua mavae ni aso se tolu o sailiili ma mafaufau loloto, sa tonu ia te ia e tuuese le olaga sa ia ola ai. Na sau o ia i le aiga e fesili mai mo se fesoasoani e toe amata ai lona olaga.

Na valaau atu Mataio i sona tausoga i se isi setete lea na ia faatoilaloina foi ni faafitauli faapena, ma talosaga i ai pe mafai ona sau la te nonofo. Sa ioe lona tausoga, ma sa amata ona la auai ma Mataio i sauniga Lotu ma feiloai i le epikopo e aumai se fesoasoani i le faagasologa o le salamo. Sa ia lagonaina le alofa ma le lagolago ma toaga ai i le Ekalesia.

E le’i umi ae ia feiloai atu i se tamaitai talavou lalelei, ma amiotonu. Sa alofa le tasi i le isi ma faaipoipo i le malumalu.

Ina ua fanau le la tamaitiiti muamua, sa ou alu atu e asi ma avatu le pusa sa ou faia o ana faailoga o le Sikauti. Sa matuai fiafia o ia ma ona tautauina ma le mitamita i se nofoaga e iloafogie ai i totonu o lona fale.

E lei i ai se agelu na faaali mai i le ma atalii, e pei ona sa faia ia Alema le Itiiti. Ae o le toe foi mai o Mataio i le upumoni sa tutusa lava le faavavega.