Valaauliaina o le Faaola i Totonu

Ao ou laitiiti, i le vaitaimi o le Kerisimasi e faapiipii ai i luga e lo’u tina se ata o le Faaola o loo tuitui i le faitotoa. E lei avea i matou ma tagata o le Ekalesia i lena taimi, ma e masani lava ona ou fesili, “Aisea ua tuitui ai Iesu i le faitotoa? O ai o i le isi itu?”

I ni nai tausaga mulimuli ane, sa ou iloaina ai sa leai se au o le pito i fafo o le faitotoa lea na tuitui ai le Faaola. E tatau i le tagata o loo i totonu ona tatala mai le faitotoa. Ua ou iloa nei le tagata o loo i le isi itu o le faitotoa. O i tatou! O loo tu’itu’i mai le Faaola, ma o i tatou uma e tatau ona tatalaina le faitotoa ma valaaulia o Ia e afio mai i totonu o o tatou olaga.

A o avea au ma se talavou, sa ou filifili e valaaulia le Faaola i totonu o lo’u olaga e ala i le papatisoina ma avea ma se tagata o le Ekalesia. O a’u uo na avea ma ni faataitaiga lelei ia te au. Sa faapena foi ma lo’u tinamatua. Sa avea o ia ma se tagata faigaluega i le Malumalu o Los Angeles Kalefonia. Na te tuua lo matou fale i le 4 i le taeao e auauna atu i le Alii i le malumalu.

E na o le lua tausaga talu ona ou papatiso, ae ou filifili ou te manao e auauna atu i le Alii i le avea ai ma se faifeautalai faamisiona. I la’u misiona, sa ou fesoasoani i le toatele o tagata e aoao e uiga i le Faaola ina ia mafai ona latou valaauliaina o Ia i totonu o latou olaga.

Mulimuli ane, sa ou auauna atu o se peresitene o le misiona i Samoa. E masani ona ou fesiligia faifeautalai fou po o anafea na latou filifili ai e auauna atu i se misiona. O le toatele na fai ao latou i ai i le Peraimeri sa latou filifili ai e auauna atu!

O le Peraimeri o le a fesoasoani ia te oe e saunia ai mo le galuega faafaifeautalai. Aoao i ni mea se tele e te mafaia. Seti se sini e fai se misiona. Ona mafai foi lea e oe ona fesoasoani i tagata e valaaulia le Faaola i totonu o latou olaga. O le avea ma se faifeautalai o le a suia ai lou olaga—na suia ai lo’u olaga.