Ou Te Palauvale …

O le vaaiga i foliga o lou tina na tuia ai lou loto. Te’i. Faanoanoa. Le fiafia. Na faatumulia auauai uma ai ona mata ona tuufaatasia ai lea i se lagona se tasi—o le faalata.

E ui i lona aoaoina o au i ou tausaga uma e 15 ina ia faamamaluina le Tama Faalelagi i le upu ma galuega, ao lea ua ou tu atu, faanoanoa i le faatagaina o se upu aemaise lava o se upu masoa e tuua ou laugutu.

Ou te lei mafaufauina e palauvale. A o lei oo i lena tausaga, ou te lei faaaogaina lava se gagana masoa. Ae o lena taumafanafana, sa ou faigaluega ai mo le Utah’s Fish and Game Department ma maua mai ai se mausa mai isi alii o loo matou galulue faatasi.

O le matou galuega autu o le tatipiina lea o vao matutuia mai autafa o le auala o le malo. Na vave ona matou filifili o le Arctium minus po o vao matuituia o se vao matuai leaga lava. E tupu tele ma ola i soo se nofoaga, ma e tanumiaina isi laau. O ona mea maai e pipii i soo se mea e latalata atu i ai.

Suo i le lima, na matou tau ma lena laau faalafua i le taumafanafana atoa seia oo i le tulaga o le vaivai—ma le gagana masoa. I le taimi muamua sa ou le fiafia ai i le gagana a le matou aufaigaluega. Ona ou tatalia lea. Mulimuli ane, ua ou faaaogaina. E oo atu i le faaiuga o le taumafanafana, ua pipii le palauvale i a’u upu e pei o le mau o le pipii o vao matuituia i fulufulu o taifau.

Ae peitai, o uiga faaalia a lou tina i le sese o le gagana, na faatalitonuina ai a’u e tatau ona ou suia.

E le’i faigofie. O le palauvale e le na o se filifiliga o upu. O se mamanu foi o le mafaufau. O talanoaga tatou te faatagaina i o tatou olaga, o upu tatou te faitau ai, ma ata o tatou matamata ai e mamanuina ai o tatou manatu. Na ou iloaina vave e tatau ona ou suia ia mea sa ou valaauliaina i lo’u mafaufau pe afai ou te manao e sui ia upu na ou faaaogaina.

O le mea e faafetai ai, sa ou toaga e auai i le lotu ma le seminare. Na aveesea e le palauvale isi manatu sili atu, ae ina ua toe i ai i se siosiomaga lea na aafia ai i na manatu sili atu na mafai ai ona toe mauaa. Na ou taulai atu i le faitauina o tusitusiga paia i aso uma ma tatalo. Sa ou aloese mai ata tifaga ma polokalama a le televise lea na toe faalauiloa mai ai ni mafaufauga pogisa.

Na faasolosolo malie, ona ou iloaina le faaleleia atili o le gagana. E oo atu i le faaiuga o le tausaga, ua ou saoloto mai lo’u mausa o le palauvale.

Talu mai lena aafiaga, ua ou aoaoina ni mea se tele e uiga i le malosi o upu. E mafai e upu ona fatuai pe faaumatia. E mafai ona latou faatiga, pe faamaloloina foi. E mafai ona latou tuuina i lalo tagata, pe latou te totoina foi ia fatu o le faamoemoe ma le alofa.

E ese le mataina o le mafaufau i le Faaola Lava Ia, le Foafoa o le lagi ma le lalolagi, o le Upu (tagai i le Ioane 1:1–4; MF&F 93:6–11).

O le taunuuga lava la: E avea atili i tatou e faapei o le Upu pe afai o a tatou upu e faamamaluina ai o Ia ma atagia mai ai Lona mamalu.