Blong Stap Wet long Winta Kwota

Afta we Profet Josef Smit i bin ded, Nauvu, Ilinois, i bin kam wan denjeres ples. Ol Sent oli bin ronwe long ol hom blong olgeta blong faenem wan ples we i moa sef blong stap long hem. Long Febwari 1846, ol fas grup blong ol Sent oli bin statem wokbaot blong olgeta i go long wes, be rabis weta mo siknes i bin mekem se oli slo. Long taem we oli kam blong krosem Iowa, hem i bin let long yia ia blong go kasem Roki Maonten bifo winta (kolkol taem). Mekem se ol lida blong Jos oli bin jusum wan ples we Ol Sent i save stap long hem long taem blong winta ia. Mo oli singaotem ples ia Winta Kwota.

Sam man i bin bildim ol hom wetem ol wud o gras. Ol narawan oli stap long ol tenet mo ol hol blong ston. Ol Sent oli bin traem blong stap hapi long taem blong longfala kolkol winta ia. Oli bin helpem olgeta wanwan. Oli bin go long ol konset mo singsing mo danis. Oli bin bildim wan ples blong mekem flaoa, wan taon hol, mo wan faktri blong mekem basket.

Taem ia we ol Sent i bin spendem long Winta Kwota i bin had tumas. Plante man i bin ded. Be ol paeonea oli bin gat fet se Lod bae i blesem olgeta mo helpem olgeta blong save mekem go kasem Saeon. Taem spring (stat blong hot taem) i kam, fas grup blong ol paeonea i bin aot long Winta Kwota blong wokbaot i go long Sol Lek Vale.

Tedei yu save luk naesfala Winta Kwanta long Nebraska Tempol mo visitim Senta blong Ol Momon mo Wokbaot blong olgeta long Winta Kwata blong lanem moa abaot ol paeonea.