យុវវ័យ និងសេចក្ដីសញ្ញាព្រះវិហារបរិសុទ្ធ
ជាមួយនឹងការបន្ថយអាយុសម្រាប់ពួកផ្សព្វផ្សាយសាសនាពេញម៉ោង នោះមានយុវវ័យជំទង់ចំនួនមួយម៉ឺននាក់ទៀតកំពុងធ្វើសេចក្តីសញ្ញាពិសិដ្ឋក្នុងព្រះវិហារបរិសុទ្ធនៅពេលនេះ ។
ក្នុងនាមជាអ្នកធ្វើការក្នុងព្រះវិហារបរិសុទ្ធ យើងមានពរជ័យដោយបានជួបនឹងពួកមជ្ឈិមវ័យវ័យក្មេងដែលកំពុងតែមកកាន់ព្រះវិហារបរិសុទ្ធ ដើម្បីទទួលអំណោយទានពិសិដ្ឋផ្ទាល់ខ្លួនរបស់ពួកគេ ។ យើងបានរកឃើញថា សិក្ខាសាលាសម្រាប់ការរៀបចំខ្លួនសម្រាប់ព្រះវិហារបរិសុទ្ធបានជួយពួកគេយ៉ាងច្រើន ប៉ុន្តែឥទ្ធិពលរបស់ឪពុកម្ដាយ និងពួកអ្នកដឹកនាំសុចរិតបានដើរតួយ៉ាងសំខាន់ នៅក្នុងការជួយពួកគេរៀបចំខ្លួនធ្វើសេចក្ដីសញ្ញាក្នុងព្រះវិហារបរិសុទ្ធ ។ ក្នុងនាមជាឪពុកម្ដាយ និងថ្នាក់ដឹកនាំទាំងឡាយ យើងត្រូវជួយយុវវ័យមិនត្រឹមតែរៀបចំខ្លួនសម្រាប់ការបម្រើបេសកកម្មពេញម៉ោង ដែលមានរយៈពេលតែប៉ុន្មានខែនោះទេ ប៉ុន្តែក៏ត្រូវជួយពួកគេសម្រាប់ការធ្វើ ហើយរក្សាសេចក្ដីសញ្ញាព្រះវិហារបរិសុទ្ធ ដែលមានរយៈពេលដ៏នៅអស់កល្បជានិច្ចផងដែរ ។ ជំហានទីមួយអាចចាប់ផ្ដើមពេលនៅជាកុមារភាព ។
ការរៀបចំខ្លួនកូនចៅ
ឪពុកម្ដាយអាចបង្ហាញដល់កូនចៅរបស់ខ្លួនពីសារៈសំខាន់ នៃព្រះវិហារបរិសុទ្ធដោយការថ្វាយបង្គំ នៅក្នុងព្រះវិហារបរិសុទ្ធ និងដោយការចែកចាយទីបន្ទាល់របស់ពួកគេពីកិច្ចការព្រះវិហារបរិសុទ្ធ ។ សូម្បីតែនៅក្នុងតំបន់ដែលការចូលរួមនៅក្នុងព្រះវិហារបរិសុទ្ធជាទៀងទាត់ ពុំធ្វើឡើងបានក្ដី ឪពុកម្ដាយក៏អាចបង្រៀនកូនចៅរបស់ខ្លួនពីក្ដីប្រាថ្នា ដើម្បីទៅព្រះវិហារបរិសុទ្ធបានដែរ ។
ប្រធាន ហាវើដ ដបុលយូ ហឹនធើរ ( ឆ្នាំ 1907–95 ) បានបង្រៀនដល់ឪពុកម្ដាយថា ៖ « ចូរយើងចែកចាយដល់កូនចៅរបស់យើងពីអារម្មណ៍ខាងវិញ្ញាណ ដែលយើងមាននៅក្នុងព្រះវិហារបរិសុទ្ធ ។ ហើយចូរយើងបង្រៀនពួកគេដោយស្មោះអស់ពីចិត្ត និងងាយស្រួលជាងពីរឿងទាំងឡាយ ដែលយើងអាចនិយាយបាន ដោយសមរម្យអំពីគោលបំណងទាំងឡាយនៃដំណាក់របស់ព្រះអម្ចាស់ » ។1 កូនចៅរបស់យើងត្រូវដឹងថា ព្រះវិហារបរិសុទ្ធគឺជាទីកន្លែងមួយដែលយើងបានទទួលចម្លើយចំពោះការអធិស្ឋានរបស់យើង និងជាទីកន្លែងដែលយើងទទួលអារម្មណ៍ពីសេចក្ដីស្រឡាញ់របស់ព្រះ ។
ឪពុកម្ដាយក៏អាចបង្រៀនកូនចៅរបស់ខ្លួនឲ្យសម្លឹងឆ្ពោះទៅមុខ ហើយរស់នៅដោយសក្ដិសមចំពោះការប្រើប័ណ្ណមានកំណត់របស់ខ្លួន ដែលពួកគេមានឱកាសនឹងអាចទទួលបាន នៅពេលពួកគេឈានចូលអាយុ 12 ឆ្នាំ ។ នៅពេលវេលាបានមកដល់សម្រាប់យុវវ័យទាំងនេះចូលរួម នោះយើងសង្កេតឃើញពីសេចក្ដីអំណរ និងមោទនភាព នៅពេលពួកគេបានបង្ហាញប័ណ្ណទាំងនេះ នៅក្នុងព្រះវិហារបរិសុទ្ធ ។
ការរៀបចំខ្លួនយុវវ័យ
ឪពុកម្ដាយអាចជួយកូនចៅរបស់ខ្លួនឲ្យចូលរួមចំណែកនៅក្នុងការស្រាវជ្រាវរកប្រវត្តិគ្រួសារ ដើម្បីនៅពេលពួកគេឈានចូលអាយុ 12 ឆ្នាំ នោះពួកគេអាចយកឈ្មោះគ្រួសារទៅព្រះវិហារបរិសុទ្ធបាន ។ ចំពោះយុវវ័យដែលបានធ្វើដូច្នេះ អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់បានសន្យាថា ៖ « សេចក្ដីស្រឡាញ់ និងការដឹងគុណរបស់អ្នកចំពោះដូនតារបស់អ្នកនឹងកើនឡើង ។ ទីបន្ទាល់ និង ការផ្លាស់ប្រែចិត្តជឿរបស់អ្នកចំពោះព្រះអង្គសង្គ្រោះនឹងមានភាពជ្រាលជ្រៅ ហើយ ខ្ជាប់ខ្ជួន ។ ហើយខ្ញុំសូមសន្យាថា អ្នកនឹងទទួលការការពារប្រឆាំងនឹងឥទ្ធិពលរបស់មារសត្រូវដែលកំពុងរីកដុះដាល » ។2
យើងបានឃើញបទពិសោធន៍ជាច្រើនពីការសន្យានេះដែលត្រូវបានបំពេញ ។ ថ្មីៗនេះមានយុវនារីម្នាក់បានប្រាប់យើងថា បន្ទាប់ពីបានស្រាវជ្រាវរកឈ្មោះជីដូនរបស់នាង នោះនាងបានមកព្រះវិហារបរិសុទ្ធដើម្បីធ្វើកិច្ចការសម្រាប់គាត់ ។ នាងបាននិយាយថា នៅពេលនាងបានជ្រមុជទឹកឲ្យគាត់ នោះនាងមានអារម្មណ៍មួយដ៏ច្បាស់ថា ជីដូនរបស់នាងនឹងស្វាគមន៍នាងនៅជីវិតក្រោយ ។ បទពិសោធន៍បែបនេះបានពង្រឹងដល់ទីបន្ទាល់ ហើយផ្ទុកនូវក្ដីប្រាថ្នាមួយដើម្បីចូលរួមនៅក្នុងពិធីបរិសុទ្ធក្នុងព្រះវិហារបរិសុទ្ធបន្ថែមទៀត ។
មានយុវវ័យជាច្រើនបានប្រឈមមុខនឹងការល្បួងឲ្យស្លៀកសំលៀកបំពាក់ពុំថ្លៃថ្នូរ ។ នៅពេលឪពុកម្ដាយ និងពួកអ្នកដឹកនាំស្លៀកពាក់ស្អាតថ្លៃថ្នូរបិទបាំងសំលៀកបំពាក់បរិសុទ្ធនោះ នោះយុវវ័យនឹងយល់ថាពួកគេអាចធ្វើដូចគ្នានេះផងដែរ ។ យុវវ័យត្រូវយល់ថា របៀបដែលពួកគេស្លៀកពាក់ និងរបៀបដែលពួកគេប្រព្រឹត្តិចំពោះរូបកាយខ្លួនអាចបង្ហាញឲ្យឃើញពីភាពជាសិស្សរបស់ពួកគេ ។
ឪពុកម្ដាយអាចជួយយុវវ័យឲ្យរៀបចំខ្លួនចូលព្រះវិហារបរិសុទ្ធ ដោយជួយពួកគេឲ្យយល់ពីសេចក្ដីសញ្ញាដែលពួកគេនឹងធ្វើនៅទីនោះ ។ សេចក្ដីសញ្ញាក្នុងព្រះវិហារបរិសុទ្ធរួមមាននូវការសន្យាដើម្បី « រក្សាក្រឹត្យវិន័យនៃគុណធម៌ និងព្រហ្មចារីភាពដ៏តឹងរឹង មានសេចក្ដីសប្បុរស ចិត្តមេត្តា អត់ឱន ហើយបរិសុទ្ធ ។ ត្រូវលះបង់ទាំងទេពកោសល្យ និងសម្ភារដើម្បីផ្សាយសេចក្ដីពិត និងការលើកស្ទួយដល់ [ គ្រួសារមនុស្ស ] ត្រូវបន្តលះបង់ចំពោះបុព្វហេតុនៃសេចក្ដីពិត ហើយស្វែងរកគ្រប់មធ្យោបាយ ដើម្បីចូលរួមចំណែកនៅក្នុងការរៀបចំខ្លួនដ៏ធំ ដើម្បីឲ្យផែនដីអាចរៀបចំខ្លួនជាស្រេចទទួលស្តេចរបស់ខ្លួន—ជាព្រះអម្ចាស់ ព្រះយេស៊ូវគ្រីស្ទ » ។3 ឪពុកម្ដាយអាចថ្លែងទីបន្ទាល់ថា យុវវ័យនឹងទទួលពរជ័យដ៏អស្ចារ្យផ្ទាល់ខ្លួន នៅក្នុងជីវិតរបស់ពួកគេ ដរាបណាពួកគេរក្សាសេចក្ដីសញ្ញាទាំងនេះ ហើយសេចក្ដីសញ្ញាទាំងនេះនឹងកាន់តែមានអត្ថន័យច្រើនថែមទៀត ចំពោះយុវវ័យ ពេលឪពុកម្ដាយរបស់ពួកគេជួយពួកគេឲ្យយល់ដឹងថា ទាំងពរជ័យ និង សេចក្ដីសញ្ញាគឺអាចកើតមានតាមរយៈដង្វាយធួននៃព្រះយេស៊ូវគ្រីស្ទ ។
មានរបៀបជាច្រើនដែលយើងអាចជួយរៀបចំកូនចៅ និងយុវវ័យរបស់យើង ដើម្បីទទួលពរជ័យនៃព្រះវិហារបរិសុទ្ធ ។ កាលណាពួកគេរៀបចំខ្លួនបានកាន់តែច្រើន នោះពួកគេនឹងមានសេចក្ដីសុខសាន្ត ហើយទទួលអារម្មណ៍ពីព្រះវិញ្ញាណ ព្រមទាំងអាចមានបទពិសោធន៍ខាងវិញ្ញាណដ៏អស្ចារ្យកាន់តែច្រើន នៅពេលពួកគេទទួលអំណោយទានពិសិដ្ឋរបស់ពួកគេនោះ ។ បទពិសោធន៍ល្អមួយពីព្រះវិហារបរិសុទ្ធដែលនឹងធ្វើឲ្យពួកគេតាំងចិត្តកាន់តែខ្លាំងឡើង ដើម្បីធ្វើជាសិស្សនៃព្រះគ្រីស្ទ និងជាពួកអ្នកផ្សព្វផ្សាយសាសនាដ៏ឆ្នើម—ដែលបានទទួលការលើកទឹកចិត្តដើម្បីជួយមនុស្សដែលពួកគេបង្រៀន ដើម្បីទទួលពិធីពិសិដ្ឋផ្ទាល់ខ្លួនរបស់ពួកគេនៅក្នុងព្រះវិហារបរិសុទ្ធ ។
រចនាដោយ ស្ទីវ ក្រប