ដើរតាមស្នាមព្រះបាទាទ្រង់
ការប្រែក្លាយដូចជាព្រះអង្គសង្គ្រោះគឺជាដំណើរការបន្តិចម្ដងៗពេញមួយជីវិត ហើយអ្នកអាចចាប់ផ្ដើមដោយការបោះជំហានតូចមួយជារៀងរាល់ថ្ងៃ ។
ព្រះគម្ពីរលើកទឹកចិត្តយើងឲ្យប្រែក្លាយដូចជាព្រះយេស៊ូវគ្រីស្ទ ហើយ « ត្រូវតែប្រព្រឹត្តដូចជាទ្រង់ដែរ » ( យ៉ូហានទី 1 2:6 ) ។ ប៉ុន្តែការបោះជំហានដំបូងអាចមានការលំបាក—ជាពិសេសពេលអ្នកពុំដឹងថា ត្រូវចាប់ផ្ដើមយ៉ាងណានោះ ។
អ្នកអាចរកឃើញជំនួយនៅក្នុងប្រកាសដំណឹងល្អរបស់យើង ៖ មគ្គុទេសន៍ចំពោះការបម្រើជាអ្នកផ្សព្វផ្សាយសាសនា ។ អ្នកប្រហែលជាគិតថាវាគ្រាន់តែជាក្បួនខ្នាតមួយ សម្រាប់ពួកអ្នកផ្សព្វផ្សាយសាសនា ប៉ុន្តែតាមពិតទៅវាជាឧបករណ៍ដ៏អស្ចារ្យមួយ ដែលអាចជួយអ្នកចាប់ផ្ដើមនឹងគោលដៅរបស់អ្នកដើម្បីប្រែក្លាយដូចជាព្រះអង្គសង្គ្រោះ ។ ជំពូកទី 6 ត្រូវបានរៀបចំឡើងដើម្បីជួយអ្នកឲ្យយល់ ហើយអនុវត្តនូវលក្ខណៈដូចជាព្រះគ្រីស្ទដ៏ជាក់លាក់ទាំងប្រាំបួនយ៉ាង ។
នេះជាសេចក្ដីណែនាំមួយចំនួនពីរបៀបប្រើ ប្រកាសដំណឹងល្អរបស់យើងនិងព្រះគម្ពីរ នៅពេលអ្នកខិតខំដើម្បីអភិវឌ្ឍលក្ខណៈដូចជាព្រះគ្រីស្ទ ៖
-
ដើម្បីចាប់ផ្ដើម សូមបើកទៅផ្នែកសកម្មភាពកំណត់នៅចុងបញ្ចប់នៃជំពូកទី 6 ក្នុង ប្រកាសដំណឹងល្អរបស់យើង ( ទំព័រ 128 ) ។ សកម្មភាពនេះអាចជួយអ្នកកំណត់ថា តើលក្ខណៈមួយណាគឺជាភាពរឹងមាំខាងវិញ្ញាណរបស់អ្នកនៅសព្វថ្ងៃនេះ និងលក្ខណៈមួយណាដែលអ្នកត្រូវខិតខំអនុវត្ត ។
-
បន្ទាប់ពីបញ្ចប់សកម្មភាពនេះ សូមជ្រើសយកលក្ខណៈមួយប្រកបដោយការអធិស្ឋាន ដើម្បីធ្វើការផ្ដោតយកចិត្តទុកដាក់ ។ សូមពិចារណាអាននៅផ្នែកស្ដីពីលក្ខណៈនោះនៅក្នុងជំពូកទី 6 ។
-
សូមដាក់គោលដៅជាក់លាក់ដែលអាចធ្វើទៅបានដែលនឹងជួយអ្នកឲ្យអភិវឌ្ឍលក្ខណៈនេះ ។ សូមដាក់ពេលកំណត់មួយដើម្បីអនុវត្តគោលដៅរបស់អ្នក ។ បន្ទាប់មកធ្វើការវាយតម្លៃពីការរីកចម្រើនរបស់អ្នក ។ ឧទាហរណ៍ ប្រសិនបើអ្នកកំពុងព្យាយាមឲ្យមានចិត្តសប្បុរសបន្ថែមទៀត អ្នកអាចដាក់គោលដៅមួយដើម្បីនិយាយរឿងវិជ្ជមានពីបងប្អូនប្រុសស្រីរបស់យើងបីដងក្នុងមួយថ្ងៃពេញមួយសប្ដាហ៍ ។ នៅចុងសប្ដាហ៍ អ្នកនឹងធ្វើការវាយតម្លៃថា តើអ្នកបានបំពេញគោលដៅរបស់អ្នកបានយ៉ាងណាដែរ ហើយធ្វើការកែតម្រូវ ដែលនឹងជួយអ្នកឲ្យបន្តធ្វើឲ្យបានប្រសើរឡើងថែមទៀត ។
-
ប្រកាសដំណឹងល្អរបស់យើងមានបទគម្ពីរដើម្បីសិក្សាពីលក្ខណៈនិមួយៗ ។ អ្នកអាចសិក្សាបទគម្ពីរដែលមានប្រកបដោយការអធិស្ឋាន ហើយសរសេរពីអារម្មណ៍ដែលអ្នកទទួលបានពេលអ្នកអានបទគម្ពីរទាំងនោះ ។
-
សូមទូលសុំជំនួយពីព្រះវរបិតាសួគ៌នៅក្នុងការអភិវឌ្ឍឥរិយាបថចរិតលក្ខណៈមួយដូចជាព្រះគ្រីស្ទ ។ សូមទូលសុំនូវជំនួយដ៏ជាក់លាក់ដូចជា « សូមប្រទានកម្លាំងដល់ខ្ញុំដើម្បីយកឈ្នះលើកំហឹងរបស់ខ្ញុំ នៅពេលបងប្អូនរបស់ខ្ញុំបានយករបស់ខ្ញុំ » ។ កាលណាការអធិស្ឋានរបស់អ្នកមានភាពជាក់លាក់ នោះវានឹងធ្វើឲ្យអ្នកមានភាពកាន់តែងាយស្រួយដើម្បីឲ្យអ្នកស្គាល់ពីចម្លើយរបស់ព្រះអម្ចាស់ ។
ការប្រែក្លាយដូចជាព្រះអង្គសង្គ្រោះរបស់យើង ព្រះយេស៊ូវគ្រីស្ទ គឺជាដំណើរការបន្តិចម្ដងៗ និងការស្វែងរកពេញមួយជីវិត ។ ពេលខ្លះ វាហាក់ដូចជារឿងមួយដ៏លំបាកណាស់ ។ ប៉ុន្តែកុំអស់សង្ឃឹម ។ ព្រះអម្ចាស់សន្យានឹងយើងថា ៖ « អ្នកណាដែលទទួលពន្លឺ ហើយនៅជាប់ក្នុងព្រះ នោះទទួលពន្លឺថែមទៀត ហើយពន្លឺនោះភ្លឺកាន់តែខ្លាំងឡើងៗរហូតដល់ថ្ងៃបានល្អឥតខ្ចោះ » ( គ. និង ស. 50:24 ) ។ នៅពេលយើងទទួល សិក្សា ហើយអនុវត្តពន្លឺ និងសេចក្ដីពិត ហើយបន្តដើរតាមព្រះរៀងរាល់ថ្ងៃ នោះយើងអាចប្រាកដថា យើងនឹងប្រែក្លាយដូចជាព្រះអង្គសង្គ្រោះរបស់យើង ព្រះយេស៊ូវគ្រីស្ទ ។
ការស្វែងរកមនុស្សម្នាក់ ដោយ លីស្ស លេមិន ស្វីនឌល ហាមថតចម្លង, រចនារូបថត © ឆេឡា ម៉ារី ហ្វឺសូវ, ផ្ទៃខាងក្រោយ © iStock/Thinkstock, ក្បាច់ © Hemera/Thinkstock
មេរៀនទាំងឡាយនៅថ្ងៃអាទិត្យ
ប្រធានបទក្នុងខែនេះ ៖ ការប្រែក្លាយកាន់តែដូចជាព្រះគ្រីស្ទ