Ngano nga ang Paghimo og mga Pagpili Importante

Aron makasabut nganong importante ang inyong mga pagpili, mobalik ta sa kinabuhi nga wala pa dinhi sa yuta. Sa dihang ang Langitnong Amahan mipresentar sa Iyang plano sa kaluwasan, dili tanan ang miuyon. Si Lucifer misupak sa plano ug “nagtinguha sa paglaglag sa kabubut-on sa tawo” (Moises 4:3). Tungod niini, siya nahimo nga Satanas ug siya ug kadtong misunod kaniya gisalikway gikan sa langit ug gikuhaan sa oportunidad sa pag-uswag pinaagi sa pagsinati sa pagka-mortal. Ang kabubut-on importante kaayo sa plano sa Dios nga kadtong kinsa gusto nga moguba niini gisalikway gikan sa langit!

Ang plano sa Langitnong Amahan naghatag nato og oportunidad sa pagpili alang sa atong mga kaugalingon tungod kay kana mao ang bugtong paagi nga kita makakat-on, motubo, ug mahimong mas mahisama Kaniya. Usa sa mga katuyoan sa kinabuhi mao ang pagkat-on sa paggamit sa atong kabubut-on sa maalamon nga paagi. Apan kita wala hatagi og kabubut-on aron makabuhat unsay gusto natong buhaton. Ang Alang sa Kalig-on sa Kabatan-onan nagtudlo, “Samtang ania sa yuta, kamo pagasulayan aron makita kon kamo mogamit ba sa inyong kabubut-on sa pagpakita sa inyong gugma sa Dios pinaagi sa pagsunod sa Iyang mga sugo.”¹ Ang pagpili sa pagsunod sa mga sugo nagpakita ngadto sa Dios nga kita nahigugma Kaniya ug andam sa pagsunod Kaniya. Ang mga pagpili nga atong pilion—lakip ang atong kinaiya sa paghimo niadto nga mga desisyon—usa ka dako nga bahin sa pagsulay sa pagka-mortal.

Gitudloan kamo og balik-balik nga ang pagpili sa pagsupak sa mga sugo sa Dios dunay mga sangputanan. Apan inyo ba nga gikonsiderar nga pareha ra usab kini alang sa maayong mga pagpili? Alang sa Kalig-on sa Kabatan-onan nagtudlo: “Samtang kamo gawasnon sa pagpili sa inyong pagabuhaton, kamo dili gawasnon sa pagpili sa mga sangputanan. Bisan kon alang sa maayo o dili maayo, ang mga sangputanan mosunod isip natural nga resulta sa pagpili nga inyong gihimo.”²

Busa unsa man ang mga sangputanan sa maayong mga pagpili? Makahimo tingali kamo og taas nga listahan sa mga panalangin nga moabut gikan sa paghimo og matarung nga mga pagpili. Ang maayong dapit sa pagpangita niini nga mga panalangin anaa sa mga kasulatan ug sa inyong booklet sa Alang sa Kalig-on sa Kabatan-onan. Sama pananglit: “Kon kamo magsunod sa akong mga sugo ug molahutay hangtud sa katapusan kamo makaangkon og kinabuhi nga dayon” (D&P 14:7); “Pagtuman sa Igpapahulay makapaduol kaninyo ngadto sa Ginoo ug sa inyong pamilya”³; o “Kon kamo masulundon [sa Pulong sa Kaalam], magpabilin kamo nga gawasnon gikan sa makadaut nga pagkaadik ug adunay kontrol sa inyong kinabuhi.”⁴ Kadto nindot kaayo nga mga panalangin, ug adunay daghan pa nga inyong makita.

Ang Ginoo miingon nga kita “kinahanglan nga matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa [atong] kaugalingon nga kabubut-on”, ug Siya misaad nga kita mahimong “magpahinabo sa daghan nga pagkamatarung” kon buhaton nato (D&P 58:27). Mao nga kita kinahanglang dili lang maglikay sa dili maayo nga mga butang apan usab aktibong magtinguha sa pagbuhat og maayo nga mga butang.

Usahay mabalaka kita pag-ayo sa tanan nga mga butang nga dili angay natong buhaton nga kita makalimot nga ang pagkamasulundon naglakip usab sa pagbuhat sa mga butang nga angay natong buhaton. Tingali kamo nakasabut kon sa unsang paagi nga ang pagsupak sa mga sugo negatibong makaapekto sa inyong kinabuhi, apan nakasabut ba kamo kon sa unsang paagi nga ang pagpili sa pagbuhat og maayo positibong makaapekto inyong kinabuhi ug sa kinabuhi sa uban?

Busa unsaon man ninyo pagsiguro nga kamo naghimo og maayong mga pagpili? Una, hunahunaa unsay inyong gusto sa inyong kinabuhi. Gusto ba kamo sa kinabuhing dayon? Gusto ba kamo nga ma-sealed sa templo? Gusto ba kamo nga moalagad og full-time nga misyon? Gusto ba kamo nga makagradwar sa kolehiyo ug makakuha og maayong trabaho? Kon mao, unsay inyong buhaton aron makaabut didto? Sama sa mga tigtukod nga nagkinahanglan og blueprint sa paghimo og usa ka skyscraper, nagkinahanglan kamo og plano sa pagtukod og usa ka matarung nga kinabuhi.

Isulat ang pipila sa inyong mga tumong ug kon sa unsang paagi nga makab-ot ninyo kini. Tipigi ang lista diin inyong makita kini kanunay. Dayon kon kamo mohimo og pagpili, makahunahuna kamo sa inyong listahan sa pagsiguro nga dili ninyo ibaylo ang unsay inyong labing gusto alang sa usa ka butang nga gusto ninyo karon. Ang paghimo og mga tumong usab makapahimo sa inyong mga pagpili nga giplanohan ug tinuyo imbis nga walay klaro, pasagad, o base lang sa sirkumstansya.

Sa unsang paagi kini dunay epekto? Pananglit usa sa inyong mga tumong mao ang pag-alagad og full-time nga misyon. Ug matag buntag kamo adunay kapilian sa pagbangon alang sa sayo nga seminary o matulog og dugang usa ka oras. Hain niadto nga mga pagpili ang makatabang ninyo sa pagkab-ot sa inyong tumong? O tingali kamo dunay tumong sa pagbasa sa Basahon ni Mormon sa katapusan sa tuig sa tingklase. Dayon, sa inyong pag-uli gikan sa eskwelahan o sa dili pa kamo matulog, kamo dunay kapilian sa pagbasa sa inyong mga kasulatan o sa pagbuhat og lain nga mga kalihokan, sama sa pagtan-aw sa inyong paborito nga mga salida sa TV. Asa man ang inyong pilion? Ang ingon niini nga mga pagpili inyong atubangon matag adlaw. Ang paghinumdom kanunay sa inyong mga tumong makatabang ninyo sa paghimo sa mga desisyon nga mogiya kaninyo ngadto sa mga butang nga inyong gusto gayud.