“Ano ang dapat kong gawin kapag napag-usapan sa eskuwela ang isang paksa na salungat sa mga turo ng ebanghelyo, tulad ng aborsyon?”

Sa pagharap sa mga sitwasyong ito, sikaping tandaan na maaaring hindi katulad ng nadarama mo ang nadarama ng iba ukol sa paksa. Huwag magyabang o mamilit, pero huwag matakot na ipagtanggol ang iyong mga paniniwala. Alalahanin na kinakatawan mo si Cristo.

Pakiramdam ko dapat kong ibahagi ang opinyon ko sa magalang na paraan at sabihin din kung bakit ko pinaniniwalaan ang mga ito. Palagay ko hindi ko kailangang pilitin ang iba na maniwala sa opinyon ko, pero palagay ko dapat nilang malaman kung ano ang paniniwala ko tungkol sa ilang paksa at maunawaan nila ang aking pananaw.

Mahalagang marinig tayo ng iba, pero napakahalaga ring magpakita ng respeto sa mga paniniwala ng iba. Huwag makipagtalo. Magkakaroon ka ng mga kaaway at magkakagulo kapag nakipagtalo ka. Kung may binanggit na ideya laban sa ating relihiyon, manatiling mahinahon, magtuon, at magpakita ng respeto, at huwag kalimutang makinig sa Espiritu. May mga bagay tayong hindi nauunawaan ngunit nauunawaan ng Diyos. Dapat tayong makinig at matuto mula sa Kanyang Espiritu.

Sinisikap kong sagutin ang gayong mga tanong sa abot ng aking makakaya dahil hindi alam ng mga kaibigan at titser ko, maliban kung sabihin ko sa kanila, ang pananaw ng Simbahan tungkol sa gayong mga paksa. Sa paggawa nito, malalaman nila ito, at mapagpapala ka sa espirituwal. Alalahanin: “Lumiwanag na gayon ang inyong ilaw sa harap ng mga tao; upang mangakita nila ang inyong mabubuting gawa, at kanilang luwalhatiin ang inyong Ama na nasa langit” (Mateo 5:16).

Tapat na ibahagi ang iyong nadarama. Maraming paksa sa paaralan, tulad ng aborsyon, na madalas pagtalunan, kaya huwag mahiyang magsalita. Magandang pagkakataon iyon na ibahagi ang ebanghelyo at mga pamantayang pinaniniwalaan natin. Kung ibabahagi mo ang iyong mga paniniwala, matutulungan mo ang mga tao na isipin kung ano ang tama.

Kabilang tayo sa Simbahang nakatuon sa gawaing misyonero kung saan lahat tayo ay tinatawag na mangaral; kaya nga, hindi natin matutulutang lumaganap ang maling doktrina. Sa ganitong mga sitwasyon, dapat tayong magsalita para maitama ang anumang maling doktrina at maipaunawa sa mga tao ang pananaw ng ipinanumbalik na ebanghelyo tungkol sa paksa.

May kurso ako noon kung saan madalas talakayin ang mga kontrobersyal na paksa. Ang unang dapat gawin ay respetuhin ang mga paniniwala ng iba, tulad ng inaasahan mo sa iyong mga kaklase. Kung ang paksa ay tuwirang kumakalaban sa Simbahan, malayang sabihin ang iyong opinyon. Hindi mo kailangang banggitin ang Simbahan sa sagot mo. Gayon pa man, tiyaking alam mo ang pananaw ng Simbahan tungkol dito.

Ipaliliwanag ko ang aking opinyon, ipagtatanggol ko ang aking mga prinsipyo at ang mga doktrina ng Simbahan, habang nirerespeto ko ang mga ideya ng iba. Hindi ako makikipagtalo, na magtataboy sa Espiritu, na maaaring makaimpluwensya sa iba sa positibong paraan.