របៀប ដើម្បីមានប្រាជ្ញា
ដោយ អែលឌើរ នែល អិល អាន់ឌើរសិន
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពីសុន្ទរកថាដែលបានផ្ដល់នៅ សាកលវិទ្យាល័យព្រិកហាំ យ៉ង់ — អៃដាហូធ្វើឡើងនៅថ្ងៃទី 10 ខែ មេសា ឆ្នាំ 2009 ។
នៅក្នុងជំនោរនៃរលកព័ត៌មានសព្វថ្ងៃនេះ យើងពិតជាត្រូវការប្រាជ្ញាយ៉ាងខ្លាំង — ប្រាជ្ញាដើម្បី រៀបចំ និង ដឹង ដើម្បីអនុវត្តអ្វីដែលយើងកំពុងរៀន ។
សូមចងចាំ
-
យើងត្រូវតែស្វែងរកប្រជ្ញា ។
-
ប្រាជ្ញាមានច្រើនសណ្ឋាន និង មានលក្ខណៈផ្សេងៗពីគ្នា ។
-
ប្រាជ្ញាដែលទទួលបានភ្លាមៗ នាំមកនូវពរជ័យជាច្រើន ។
-
ប្រាជ្ញាលើផ្នែកអ្វីមួយ នោះវាមិនអាចផ្ទេរទៅផ្នែកមួយផ្សេងទៀតបានទេ ។
-
ថ្វើបើនៅក្នុងករណីជាច្រើនប្រាជ្ញារបស់លោកិយមានតម្លៃក៏ដោយ តែវាមានតម្លៃបំផុត នៅពេលវាឱនចុះយ៉ាងរាបទាបទៅនឹង ប្រាជ្ញារបស់ព្រះ ។
ព្រះគម្ពីរបានរៀបរាប់ពីប្រាជ្ញាពីរប្រភេទ ៖ ប្រាជ្ញារបស់លោកិយ និង ប្រាជ្ញារបស់ព្រះ ។ ប្រាជ្ញារបស់លោកិយមានទាំងចំណុចវិជ្ជមាន និង អវិជ្ជមាន ។ នៅក្នុងការរៀបរាប់ដ៏ងងឹតងងល់បំផុតនោះ វាអាចពិពណ៌នាបានថា ជាចំណែកនៃសេចក្តីពិតដែលលាយឡំជាមួយនឹងប្រាជ្ញា និង ឧបាយកល ដើម្បីសម្រេចនូវគោលបំណងនៃភាពអត្មានិយម ឬ បំណងអាក្រក់ទាំងឡាយ ។
មានប្រាជ្ញារបស់លោកិយមួយប្រភេទទៀត ដែលមិនអាក្រក់ណាស់ណាទេ ។ តាមពិតទៅគឺវាមានភាពវិជ្ជមាន ។ ប្រាជ្ញានេះគឺជាចំណេះដឹងដែលទទួលបានតាមរយៈ ការសិក្សា ការគិតពិចារណា ការអង្កេត និង ការខិតខំធ្វើការ ។ វាមានតម្លៃ និងមានប្រយជន៍ខ្លាំងណាស់ក្នុងអ្វីដែលយើងធ្វើ ៖ ចំពោះមនុស្សល្អ និង ត្រឹមត្រូវ ចំណេះដឹងទាំងនោះកើតមានមកតាម បទពិសោធន៍នៅក្នុងជីវិតរមែងស្លាប់របស់យើង ។
អ្វីដែលសំខាន់ជាងនេះ គឺប្រាជ្ញាដែលនាំមកនូវភាពជោគជ័យនៅក្នុងពិភពលោកនេះ ត្រូវតែមានឆន្ទៈដើម្បីពឹងផ្អែកលើប្រាជ្ញានៃព្រះ ហើយសូមកុំគិតថាវាអាចជំនួសប្រាជ្ញារបស់ព្រះបាននោះឡើយ ។
មិនមែនប្រាជ្ញាទាំងអស់គឺត្រូវបានបង្កើតមកស្មើគ្នានោះទេ ។ យើងត្រូវតែរៀនថា នៅពេលមានភាពផ្ទុយគ្នា រវាងប្រាជ្ញារបស់លោកិយ និង ប្រាជ្ញារបស់ព្រះ នោះយើងត្រូវតែ សម្របឆន្ទៈរបស់យើងទៅនឹងប្រាជ្ញារបស់ព្រះ ។
ខ្ញុំផ្តល់យោបល់ដល់អ្នកថា សូមដកយកបញ្ហាមួយចំនួនដែលអ្នកជួបប្រទះ ។ សូមគូសបន្ទាត់មួយនៅចំកណ្តាលក្រដាសមួយសន្លឹក ។ សូមធ្វើបញ្ជីនៃប្រាជ្ញារបស់លោកិយនៅផ្នែកខាងឆ្វេង និង ប្រាជ្ញារបស់ព្រះនៅផ្នែកខាងស្តាំ ។ សូមសរសេរពីបញ្ហាទាំងឡាយណាដែលមានការប្រកួតប្រជែងគ្នា ។
តើអ្នកនឹងជ្រើសរើសយកមួយណា ?
នៅក្នុងកណ្ឌទី 45 នៃ គោលលទ្ធិ និង សេចក្តីសញ្ញា ដែលបានប្រាប់ពីព្រឹត្តិការណ៍ដែលឆ្ពោះទៅរកការយាងមកជាលើកទីពីរនៃព្រះអង្គសង្គ្រោះ នោះព្រះអម្ចាស់បានប្រាប់ម្តងទៀតនូវរឿងអំពីស្ត្រីព្រហ្មចារីដប់នាក់ ហើយបានបន្សល់នូវបន្ទូលទាំងនេះថា ៖ « ត្បិតពួកអ្នកណាដែលមានប្រាជ្ញា ហើយបានទទួលសេចក្តីពិត ហើយបានទទួលយកព្រះវិញ្ញាណបរិសុទ្ធទុកជាអ្នកណែនាំរបស់ខ្លួន ហើយដែលពុំត្រូវគេបញ្ឆោត — យើងប្រាប់អ្នកជាប្រាកដថា ពួកគេនឹងពុំត្រូវកាប់បោះចោលទៅក្នុងភ្លើងឡើយ ប៉ុន្តែនឹងធន់នៅថ្ងៃនោះវិញ » ( សូមមើល គ និង ស 45:57 ) ។
សូមឲ្យយើង ស្វែងរកប្រាជ្ញារបស់ព្រះ ។ មានអ្វីៗជាច្រើនដែលយើងអាចរៀនពីប្រាជ្ញាក្នុងពេលឥឡូវនេះ ។ ខ្ញុំសូមសន្យានឹងអ្នកថា ពរជ័យរបស់ព្រះអម្ចាស់នឹងមានមកដល់អ្នកនៅពេលអ្នកស្វែងរកប្រាជ្ញា ដែលជាប្រាជ្ញារបស់ព្រះ ។ ទ្រង់ពិតជាមានព្រះទ័យចង់ប្រគល់ប្រាជ្ញាទ្រង់ដល់យើង ។ ហើយបើយើងនឹងគោរពតាម និងប្រកបដោយការអធិដ្ឋាន ហើយស្វែងរកវា វានឹងមក ។