Waniua Mwakoron Mooa aika Uarereke
Abigail Almeria, Cebu, Philippines
Ngai ma kainnabau ngkai akea ara mwakuri, karekean te mwane ibukin kainnanora ni kabane ibukiia ara utu ma niiman natira bon te kakaewenako. Tebongina imwain te kanakobwana n te maungatabu ni kabuta n Okitobwa 2013, ti noori mwaitin kanara ae tauraoi ao ti baireia bwa ti na katauraoa te katawanou ae bebete te moa ae baniaki ao te raiti n tain te bureiki imarenan taian tetere n te maungatabu.
E a roko te Tabati, ao ti a bane n tauraoi. Nikiraia ara utu ae bubura, irouia au karo ao tariu ma aia utu ti bane ni kaitibo n te titeiki tienta te itera n aoa imwain waakin te kanakobwana.
Bon te kukurei ao te kakabwaia n ongora nakoia burabeti, taan mamata, ao taan kaotioti n tibwai rongorongo are e kaineti nakoia ara roro. Ngke I ongora nakon te reirei ao ni kukurei inanon namakinan te rau n tamnei ao te tangira are I namakinna iroun Tamara are i Karawa, I karekea te kamatoa bwa bwaai ni kabane a na bane n nakoraoi, bwa kainnanoia au utu n te maiu n tamnei ao n rabwata a na bane ni kakoroaki nanoia, ao ngkana I reitinako ni kamwakura te onimaki ao n angan au tia Kamaiu bwa e na kaira maiu, ti na kainaomataaki man ana kabaebae te maiu ni kainnano ao kanganga riki tabeua.
Ni kukurei n tamaroan te tamnei ni ngainan te Tabati anne, I mwanuokina taekan te katawanou. Ti ngke e a roko n tain te motirawa imarenan te tetere I a ataia bwa ai bon 17 mwaitira. Ruaman ikawai ao waniman ataei ti na tibwaua kanara ae wanimwakoro te moa ae uarereke ao te raurau n raiti, ma te boora n nuuto are e uotia tariu.
Henry ae waniua ana ririki e anga te tataro ni kakaitau ao ni kakabwaia kanara, ni bubuti bwa ni kabane ake a kanna a na bane n nuai. Imwiina I korokorei mwakoro ni moa akekei ni kauarerekei riki ao n ananganiia ataei ngkai tariu e katoka te nuuto ao te raiti iaon aia raurau. I aki kona n taua rannimatau are e waanako ngke I a atia bwa e tau mwakoro aika uarereke ibukira ni kabane ao teuana riki te nikira imwiin uruakakin mwakororo ao te nuuto ao te raiti are ti tibwatibwaia imarenara. Ngaira ni kabane ti a tia n amwarake—ao ti bane n nuai.
I tuangiia au karo ao kainnabau bwa I ataa koauan te Tia Kamaiu are a tia n urui nimaua kariki ao uoman te ika ao e kamwarakeia aomata aika uanao aika “nimanga mwane, ao bon iai aine ao ataei” (taraa Mataio 14:14–21). Tabeman taan tiribure ao taan aki kakoaua a taekinna bwa te kakai bon taian karariki, aika betanaki, ke a bon aki kona n riki. Ma irouia au utu ao irou, e bon koaua te rongorongo ngke e koreaki.
Tamara are i Karawa e a tia n ongo n ana tataro te ataei ae kakaonimaki are e anga te kakaitau ao ni bubuti kakabwaia bwa ni kabane a na bane n amwarake ao n nuai ao ni butimwaea te amwarake.
Ngke ti oki rikaaki nakon te autinibootaki ibukin te maungatabu ni kabuta, I namakina te tamnei ae korakora. I namakinna ae ai aron ae I mena ibuakoia aomata aika uanao are e kamwarakeia Iesu, n tangiria n tiku ao n reirei mai Irouna are e berita bwa ngkana ti nakoina man onimakinna, ti na bon aki baki man taka (taraa Ioane 6:35).
Ma natira ti karaurau ni kaei ara kaintekateka inanon te umwantabu ao n tauraoi n ongora nakon ana toro are e a tia n rineia Tamara are i Karawa. Bon te tai ae ti na ururingnga n tainako.