A Raraoi ni Bane

Bwaeoniia a tabeakiniia bon irouia n aki tabe ma aekara aroia, kaubwaia, ke aroia n taraan te tautaeka. E ngae ngke e kawaeremwea aia waaki, e karika te kangaanga, ke nanona bwa te anganano ni bon oin nanoia ao n te mwakuri korakora, a buokiia bon irouia.

Inanon nanora ni kani kakoroi nanon ara kouru ao ara boutoka n te aonaaba aei, kaantaninga iroun temanna ma temanna ke te bwatei e kona n tabeakina tararuaia tabeman ke ni kakorakora abanuean te Atua. Aomata n te aonaaba n taai aikai, karaoan nanon kouru aika a bwainaki a kona n riki bwa norakin taun arora.

Katean ao kakoroan nanon taian kouru a kona n riki bwa te bwai ae moan te kamiimi. Ma ngkana te tokanikai ni kakoroan kouru e reke man kakeaan, aki tabeakinan, ke ni kamarakiia tabeman, boon te mwakuri anne e na rangin ni uaana.

Bwaeoniia a tararuaia naake inanon aia kambwana, ma a tabeakiniia naba ake a rimwiia, n uniki aroka ibukin te turain ni waekon are e rimwi.

A ata korakoran te utu ao raoraoia. Ao bukina bwa a tabeakiniia ibon irouia, a riki ni korakora. Raao a riki bwa utu.

A tei bwaeoniia bwa te kauring ae tamaroa bwa bukin tera ae ti riai ni kamaenakoira man te kariiri ni kaonotira ao, irarikina, n roko ni buokia n tatabemaniia ao ni karekea te mwamwannano ao te tangira ibukiia tabeman.

“Waaki ngkami aika kam raoiroi.”

Te mwanewe aei e riki bwa te anene nakoia taani mwananga aika a kua. E kangaanga iangoan bwa a kanga ni mwakuri tamnei aika tamaroa aikai. Te nakonako bon teuana te kabanea ni bebete ni bwai ae a karaoia. A na bane ni uaia ni mwakuri ni karekean te amwarake, karaoan waekon, tararuakin maan, tabeakinaia aoraki ao aika mamaara, ukoukoran ao karekean te ran, ao ni kamanoia man korakoran kangaangan buakan ao kakamakun te buakonikai.

A uti n te moaningabong ma aia kantaninga ao kouru aika mataata ao ni kabwarabwaraaki raoi are a bane n ataia aia koraki: ni beku iroun te Atua ao raoraoia ao n roko n te Salt Lake Valley. Ni katoabong kantaninga ao kouru aikanne a bane n oota irouia; a ata te bwai ae a riai ni karaoia bwa e kakawaki irouia kanoan te bong.

N ara tai—ngkana angiin te bwai ae ti kainnanoia ti bane ni kona ni karaoi—e kai anaki nanom ni katikui ke ni bwarannano ngkana te kawai are imwaim e tara ni kiritabukibuki ke n rangin ni katati te kawai ane imwaira. N taai aikanne, ao e kona ni kaungaira ni iangoia riki mwaane, aine, ao ataei ake aki kariaia te aoraki, kangaanga, maraki, ao riki te mate ni kararoaia man kawaia are a tia n rineia.

A reiakinna bwaeoniia bwa karaoan bwaai aika kanganga e kakorakora ao ni kamatoa rabwataia, aia iango, ao tamneia; kakorakora aia atatai n aron rikia ma iroun te Atua; ao ni karikirakea aia nanoanga ibukiia tabeman. Te katei aei e kamatoai tamneia ao n riki bwa te kakabwaia nakoia n te tai ae maan imwiin tokin mwanangaia rinanon taian tabo aika aoraoi ao maunga.

Ngkana anene bwaoniia, a anenea te katenua n reirei: “Ma kukureim e kairiko ni kawaim.”

Bon te bwai teuana ae kamiimi ae ko aki kantaningaia bwa e na riki n ara roro are ti kakabwaiakaki ma aika mwaiti ma e ngae n anne ao ti kona n riki n rangin n nanokawaki. Kamimiin reken kaubwai ao bwaai n rabakau a taoniiira ao ni kaonira ma te kamanoaki, kakukureiaki, te kukurei ae teimatoa, ao ni bebete karaoana. Ma e ngae n anne ti kona n nori bwaai aika aki kakukurei aika katobibiira.

Bwaeoniia, ake a tia n anganano n ae bati, a nako n akea ao ni baki ibukin bwaai aika a rangin ni kainnanoaki ibukin kamaiuakiia. A ataia bwa e aki reke te kukurei mai imwiin te tekeraoi ke te kabuanibwai. E aki riki man koron bukin ara kantaninga bwa a na roko ni koaua. E aki riki te kukurei man bwaai aika riki mai itinanikura. A roko mai inanora—n aki tabe bwa tera te bwai ae riki ni katobibira.

A ata anne bwaeoniia, ao ma te tamnei anne a kunea te kukurei ni bwaai ni kabane ao ni kataaki ni kabane—riki n taian kataaki are e rota rikaaki ao ni karika te kangaanga nakon raan aika nano n tamneia.

N tabetai ti tanrikaaki n taraa te bwai ae a rinanoia n akea te ngurengure irouia bwaeoniia ao ma te raunnano ao taekina ae kangai, “Ai rabwara I aki mena n te tai anne.” Ma N na mimi ngkana bwaeoniia aika ninikoria nanoia aikanne, a tia ni kona n norira n te bong aei, a na bae n tia n aki taekina te aeka n tabeaianga anne.

E ngae ngke a tia ni bitaki taai ao aroaro, koaua ibukin kaitarakin kataaki ao te uaia ni maiu n ae nakoraoi kanga te botanaomata ae tabeaianga ao n nakoraoi iaan te Atua e tuai bitaki.

Ti kona n reiakinna mairouia bwaeoniia te onimaki ao te koaua iroun te Atua. Ti kona n reiakina te nanoanga ibukiia tabeman. Ti kona n reiakinna bwa te mwakuri ao te tabo ni karaobwai a kakabwaiaira tiaki ti n te maiu n rabwata ma n te maiu n tamnei naba. Ti kona n reiakinna bwa te kukurei e tauraoi nakoira n aki tarai arora.

Te kabanea n tamaroa ni kawai ae ti kona ni karineia ao ni kaota te kakaitau nakoia bwaeoniia bon man karinakina nakon maiura te kakaonimaki nakon ana tua te Atua, te nanoanga ao te tangira ibukiia raora, ao te tabo ni karaoibwai, te kantaninga, ao te kimwareirei ae a kaotia raoi bwaeoniia inanon maiuia.

Ngkana ti karaoia, ti kona n roko inanon bui n ririki, n anai baia bwaeoniia aika karineaki ni baira, ao ni karin oin bwanaara nakon taningaia ngkana ti anenea ma ngaia: “A raraoi ni bane! A Raraoi ni Bane!”