Te Uea e Anganai Taeka ni Karaunano
Trisha Tomkinson Riggs, Arizona, USA
Natira te aine ae Carlie e wene n aoraki tabeua te bong, ao I taku irou bwa bon tii te mariri. Ma ngke a kaoti kanikina iaon rabwatana, I a moana n ataia bwa ngaia bon te aoraki ae kakaiaki.
E a moana n roko irou te maaku ao e kakorakoraaki ngke ti kaeka ana bontaeka ma ana taokita—Carlie e a reke irouna te tioka mai inanonuarerekena. E a roko inanon te matu n aki namakinaaba ibukin uarereken tiokana ao e riai n nakon te onaoraki n te tai ae waekoa. I tataro inanou bwa N na rau ao te taokita bwa e na kona ni buokia.
Ngke ti roko n te ruu ibukia aoraki aika karina, taokita ao neeti a waekoa ni kataia ni karekea buokana. I tataro nakon Tamau are i Karawa ibukin te raunnano ao te rau.
Inanon te tai ae rau, kainnabau ao tamana a angan Carie te kakabwaia n te nakoanibonga. N ana kakabwaia, kainnabau e kakoaua nakoina bwa ana kantaninga Tamana are i Karawa bwa e na maiu. I moanna n namakina te rau.
Imwiin tabeua riki te aoa ni matakuakiniia taokita n ewaria n te neiran, tuoia, ao n tuoa Carlie ibukin marurungina, I a taonaki n te kua. Ana ruu e a rau inanon te aoa 1:00 n te karangaina. I aki ataia bwa tera ae N na kantaningaia, I aki kona ni matu ao I a maroa.
I kaotinakoa ana Boki Moomon are e uotia tariu nakon te onaoraki ao man tataro bwa koroboki aika a tabu a na uota nakoiu te raunnano are I tangiria. Te boki e bwaka n uki nakon Aramwa 36:3. Ngke I warekia, I namakinna bwa e taetae nakoiu te Uea, “ I bon ataia bwa a ne e onimakina te Atua ao e na bon boutokaaki n rawawataia, ma aia kanganga, ma karawawataakia, ao a na tabeakirake n te kabanea ni bong.”
N te kauoua n tai n te tairiki anne, I namakina te rau. I ataia bwa Tamara are i Karawa e atai arora. E tangirai bwa N na ataai bwa E mena ikekei ao I kainnanoia ni karekea onimakinana.
Ngkana I uringi bwaai ake a riki n te bong arei, I iangoa aron te Uea ni kona ni kakabwaiaira. I a tia n namakina te kawaekoa n uota Carlie nakon te taokita. Ti a tia n roko n te onaoraki ma te kamanoaki. Mwane ake iai irouia te nakoanibonga a waekoa n roko n anga te kakabwaia.
Man te bong anne ti a rau inanon te tai n tutuoa mwaitin te tioka ao ni kateimatoai taian kabuki bwa a na tauraoi. Ti a reiakina aron te tioka ni kona n roota marurungin te rabwata. Aorakin Carlie e reitinako n riki bwa te kataaki, ma ti a tia n reiakinaki n onimakina Tamara are i Karawa ni katoa bong.
Te bong arei n te onaoraki bon tiaki ae I kan manga rinanona, ma bon teuana ae I kakaitau iai n aki toki. Bon te bong n reirei, ni kammwakura te onimaki, ao n namakina te kakaitau. I reiakinna bwa Tamara are i Karawa e ataia Natina n tatabemaniia ao E na bon boutokaira ni koaua inanon ara tai ni kataaki.