Ni Karekei Bwaai ni Kabane Ake Iroun te Tama: Te Kaikonaki ae Ngkai
Mairoun Unimwaane Carlos E. Asay (1926–1999) man te Itingaun, “The Oath and Covenant of the Priesthood,” Ensign, Nobembwa 1985, 45.
Te kairake n ataeinimwaane ae e katauraoia ni karaoa ana mwakuri ni mitinare. Ana karo a kariaia bwa a na kabane mwane ibukin ana mition ti ngkana e na teimatoa ni kawakina tuan te mition ao ni mwakuri korakora. E kariaia.
Imwiin rokona n te tabo ni mitinare, e kunea te mwakuri ni mitinare bwa e matoatoa riki nakon are e iangoia n aron taraakina. Reiakinan te taetae ae boou, ni kona ni karokoa ma te katei ae kaokoro, ao n kaitara te aki butimwaeaki are e na karekea te bwara n nano nakoina. Toana ma ana beretitenti n te mition a kataia ni kaunga, ma e bon taraa n ae e nang bwara nanona.
E tuanga ana beretitenti n te mition bwa e a tangiria ni kan okira mweengana. Ana beretitenti n te mition e wetea ana karo te kairake n ataeinimwaane ao e anganna te kariaia bwa e na taetae ma natina.
Te mitinare e tuanga ana karo bwa e a bwara nanona. E taku ana karo, “Ibukin ririki aika bati ngai ma tinam ti kakantaninga te bong are ko na karaoa am mwakuri ni mitinare ae bwanin taina. Ti ataia bwa e kakawaki bwa ko na anga reirei ana euangkerio Iesu Kristo nakoia naake a tuai karekea.”
E kaeka te nati te mwaane, “Tamau, I aki ataia bwa te mwakuri ni mitinare e korakora nanona nakoim.”
“Iai nanona irou ae bati,” e kabwarabwara te karo. “Inanon maiu I a tia ni mwakuri korakora, ni katea au bitineti, ao ni kawakinmwane ibukin iangoan temanna te aomata: are boni ngkoe. Au kouru bon katauraoan arom ni bwaibwai n ae mwaiti.”
“Ma, Tamau,” e taetae te nati te mwaane, “ma anne e aki bita te koaua are I aki kukurei iai …”
E katokia te karo, “N na kanga n onimakiniko n au bitineti ngkana ko aki kona ni beku ibukin te Uea ibukin ti uoua te ririki?”
Akea te karongoa ngkai e tabe te nati n iangoa ana titiraki ana karo.
Ngkanne e taku te karo, “Natiu, ngkana ko kakaonimaki n nakoam aei ao ni kakoauako bwa ko kororaoi i bon iroum, Au bwai ni kabane aika irou a na riki bwa am bwai.”
N rootakina n te berita aei, e taetae ma te ninikoria te nati aei nakon ana karo, “N na tiku.”
E tiku te nati, ao e beku ma te kakaonimaki. E toui mwiin tuan te mition ao e mwakuri korakora. Ao eng, tabeua te tai imwiin ana mition, e a tia ni karekea mairoun ana karo te berita ni bwaibwai, bwaai ni kabane ake iroun ana karo ake e na tibwauai.