Fesoasoani! O se Tasi o le a Tatalaina le Faaipoipoga
E alala le tusitala i Iuta, ISA.
A tatala faaipoipoga a matua, e masani ona lagona e tamaiti le fefe, popole, tausalaina, ita, le mautonu, fiafia, pe faanoanoa—o nisi taimi o mea uma ia i le taimi e tasi. Afai ua tupu lena mea ia te oe po o se tasi o au uo, o nisi nei o manatu e mafai ona fesoasoani.
Ou te lagona le faaesea. E foliga mai o tagata uma ae vagana ai au ua atoatoa aiga.
E leai se aiga e atoatoa ona lelei, e tusa lava pe e foliga mai e faapena.
Ia manatua o ou matua, epikopo, faiaoga o le Peraimeri, tuaoi ma uo i le uarota e alolofa uma lava ia te oe.
O nisi taimi atonu e fai mai e tagata ni mea e faatiga ai ou lagona e aunoa ma se manatu i ai. Pe a tupu lena mea, aua le fefe e ta‘u atu ia te i latou ou lagona ma fesoasoani ia i latou e vaai i se auala e sili atu e talanoa ai ia te oe e uiga i le tatalaina o faaipoipoga.
Ou te ita i lo‘u tina ma tama.
E faigofie lava ona lagona le ita pe a leai se mea e mafai ona e faia e uiga i se mea o loo tupu. Atonu foi e te manao e tuu atu ou lagona ita i isi. E ui lava e mafai ona faigata, ia e taumafai e faaali atu le alofa mo lou aiga. Tatalo mo se fesoasoani e vaai atu ai i ou matua e pei ona silasila Iesu ia i laua. E alofa o Ia ia i laua, ia te oe, ma tagata uma lava i lou aiga.
Afai e le mafai ona taofia ou lagona ita, talanoa i lou tina po o le tama po o se isi tagata e te talitonuina. E mafai ona la fesoasoani e saili ni auala lelei e maua ai se lagona lelei, e pei o le faamalositino le po o le faia o faatufugaga.
Pe o le a matou faatasi ma o‘u matua i le lagi?
Ona o le Togiola a Iesu, o le a lelei mea uma pe a tatou feoti. E le tatau ona e popole. E tusa lava po o le a le mea e tupu, o le a avea pea oe o se vaega o le aiga a ou matua faalelagi. Afai e te taumafai pea e filifili le mea sa‘o, o le a e maua faamanuiaga uma ua fuafuaina e le Tama Faalelagi mo oe.
Pe o au ea ua tatala ai le faaipoipoga a ou matua?
Atonu e te manatu sa mafai ona e fesoasoani i ou matua e nonofo faatasi. Ae o le mea moni e le o oe lava na mafua ai. Na la faia le faaiuga ina ia tatala le faaipoipoga. E le o tamaiti i le aiga na mafua ai ona tatala le faaipoipoga.
Ou te fefe i le mea o le a toe tupu mai.
Pe a tutupu ni suiga tetele, o se mea masani le popole e uiga i le lumanai. Talanoa i lou tina ma lou tama. La te fia iloa pe a e le fiafia, ma e mafai ona la fesoasoani i ou popolega ma fesili. Ia mautinoa ua e tatalo mo se faamafanafanaga.
Ou te lagona lava le faanoanoa i taimi uma.
E le afaina le lagona faanoanoa. O le faanoanoa e uiga i se suiga tele o se laasaga taua i se lagona e sili atu ona lelei mulimuli ane. E ui lava e te ono lagona le faanoanoa i nisi taimi, ia faaauau pea le faia o mea e te fiafia e fai. Faaalu se taimi i fafo. Faitau se tusi lelei. Faalogologo i musika fiafia. Ia taumafai malosi i le aoga. Ia fiafia ma au uo. Tatalo i le Tama Faalelagi.
Afai o ou lagona faanoanoa ua umi se taimi ma ua faafaigata ai ona e moe, ai, taulai atu i le aoga, po o le faia o mea e masani ona e manao e fai, talanoa i se tagata matua e te faatuatuaina ina ia mafai ona ia fesoasoani atu ia te oe e toe maua se lagona lelei.
O le a lelei mea uma.
E tusa lava po o a ou lagona i le taimi nei, o le a amata ona e maua se lagona lelei i se taimi. I le taimi nei, ia tatalo pea i le Tama Faalelagi mo se faamafanafanaga. Ia manatua o le Tama Faalelagi ma Iesu Keriso o loo leoleoina pea oe ma o le a le tuulafoaiina lava oe. La te alolofa ia te oe ma ou matua ma o le a fesoasoani ia te outou uma lava. O le a la tuuina atu ia te oe le malosi e lagona ai le toafilemu ma le fiafia.
Ata na tusia e Katie Payne